ବ୍ରାଉନସୁଗର ହୋମ୍ ଡେଲିଭରି, ଧରାପଡ଼ିଲେ ଦୁଇ ବେପାରୀ
ଭୁବନେଶ୍ୱର,୪ ।୨(ବ୍ୟୁରୋ): ଏଣିକି ଘରେ ବସି ପାଇ ପାରିବେ ବ୍ରାଉନ୍ସୁଗର(ଧଳା ଜହର) । ଆଉ ଆପଣଙ୍କୁ ବେପାରୀଙ୍କ ପାଖକୁ ଯିବାକୁ ପଡ଼ିବନି । କାରଣ ଧଳା ଜହର ବେପାରୀମାନେ ଏବେ ହୋମ୍ ଡେଲିଭରି କରୁଛନ୍ତି । ଫୋନ୍ କଲାମାତ୍ରେ ପାଖରେ ପହଞ୍ଚାଇ ଦେଉଛନ୍ତି । ଏଭଳି ହୋମ୍ ଡେଲିଭରି କରୁଥିବା ଦୁଇ ବ୍ରାଉନ୍ସୁଗର ବେପାରୀଙ୍କୁ ଗିରଫ କରିଛି ଭୁବନେଶ୍ୱର ଅବକାରୀ ବିଭାଗ । ସେମାନେ ହେଲେ ଖଣ୍ଡଗିରି ଥାନା ଅଧୀନ ପାତ୍ରପଡ଼ାର ମୁନା ସେଠୀ(୨୬) ଓ ଘାଟିକିଆର ରାଘବ ଦାସ(୩୦) । ଦୁଇ ଜଣଙ୍କ ଠାରୁ ୧୫ ଗ୍ରାମ ବ୍ରାଉନ୍ସୁଗର ଓ ଏକ ବାଇକ୍ ଜବତ ହୋଇଛି ।
ଅବକାରୀ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ମୁନା ଓ ରାଘବ ଆଜି ବ୍ରାଉନ୍ସୁଗର ହୋମ୍ ଡେଲିଭରି ଦେବା ପାଇଁ ଯାଉଥିବା ବେଳେ ନାକାଗେଟ୍ ନିକଟରେ ଅବକାରୀ ଟିମ୍ ଚଢ଼ଉ କରି ସେମାନଙ୍କୁ ଧରିଥିଲେ । ଉଭୟଙ୍କ ଠାରୁ ୧୫ ଗ୍ରାମ ବ୍ରାଉନ୍ସୁଗର ଓ ଏକ ବାଇକ୍ (ଓଡି୩୩କେ-୭୦୩୫) ଜବତ କରିଥିଲେ । ଜବତ ବ୍ରାଉନ୍ସୁଗରର ମୂଲ୍ୟ ଦେଢ଼ ଲକ୍ଷ ଟଙ୍କା ହେବ । ବ୍ରାଉନ୍ସୁଗର କାରବାର ଅଭିଯୋଗରେ ମୁନା ପୂର୍ବରୁ ମଧ୍ୟ ଗିରଫ ହୋଇ ଜେଲ୍ ଯାଇଥିଲା ବୋଲି ଅବକାରୀ ବିଭାଗ କହିଛି । ଭୁବନେଶ୍ୱର ଅବକାରୀ ବିଭାଗ ଆଇଆଇସି ପ୍ରଭାତ କୁମାର ସେଠୀଙ୍କ ନେତୃତ୍ୱରେ ଏସ୍ଆଇ ସୁଜିତ ମୁଦୁଲି, ହୃଦୟାନନ୍ଦ ସାମନ୍ତ ଓ ଅନ୍ୟ କର୍ମଚାରୀମାନେ ଚଢ଼ଉରେ ସାମିଲ୍ ଥିଲେ ।
