ନୂଆଦିଲ୍ଲୀ: ଚୀନ୍ ବୁଲେଟ୍ ଟ୍ରେନ୍ ବେଗରେ ପରମାଣୁ ବୋମା ସଂଗ୍ରହ କରିବାରେ ଲାଗିଛି। ୨୦୩୦ ସୁଦ୍ଧା ସେ ନିଜର ପରମାଣୁ ଭଣ୍ଡାରକୁ ଦ୍ୱିଗୁଣିତ କରିବାକୁ ଲକ୍ଷ୍ୟ ରଖିଛି। ତାଇୱାନର ବିଶେଷଜ୍ଞ ମାନେ ଏକ ତାଜା ରିପୋର୍ଟରେ ଏହି ଦାବି କରିଛନ୍ତି ।ସେମାନେ କହିଛନ୍ତି ଯେ, ଆମେରିକାର ପରମାଣୁ ଅସ୍ତ୍ରର ଆଧୁନିକୀକରଣକୁ ଦୃଷ୍ଟିରେ ରଖି ଚୀନ୍ ପରମାଣୁ ଶକ୍ତି ବୃଦ୍ଧି କରିବାରେ ନିଜକୁ ବ୍ୟସ୍ତ ରଖିଛି । ମେନଲ୍ୟାଣ୍ଡ ଆଫେୟାର୍ସ କାଉନସିଲରେ ପ୍ରକାଶିତ ରିପୋର୍ଟରେ କୁହାଯାଇଛି ଯେ, ମେ ପର୍ଯ୍ୟନ୍ତ ଚୀନ୍ରେ ୫ଶହ ପରମାଣୁ ବୋମା ରହିଥିଲା, ଯାହା ସି ଜିନପିଙ୍ଗ ଏବେ ୧ ହଜାରରେ ପହଞ୍ଚାଇବାକୁ ବ୍ୟସ୍ତ ଅଛନ୍ତି।
ତାଇପେଇ ଟାଇମ୍ସ ଅନୁଯାୟୀ,ତାଇୱାନର ନ୍ୟାସନାଲ ଡିଫେନ୍ସ ୟୁନିଭରସିଟି ଚାଇନିଜ୍ ମିଲିଟ୍ରି ଷ୍ଟଡିଜ୍ ର ଆସୋସିଏଟ ପ୍ରଫେସର ତୁଙ୍ଗ ହୁଇ-ମିଙ୍ଗ କହିଛନ୍ତି ଯେ, ଚୀନ୍ ଇଣ୍ଟର କଣ୍ଟିନେଣ୍ଟାଲ ବାଲାଷ୍ଟିକ୍ ମିସାଇଲ୍ (ଆଇସିବିଏମ୍), ନ୍ୟୁକ୍ଲିୟର ପାଓ୍ବାର୍ଡ ବାଲିଷ୍ଟିକ୍ ସବମେରିନ୍, ଏଚ୍ -20 ବିସ୍ଫୋରଣକାରୀ ଏବଂ ପରମାଣୁ ଆକ୍ରମଣ ପାଇଁ ଉନ୍ନତ ଅସ୍ତ୍ର ପ୍ରଣାଳୀ ବିକାଶ କରୁଛି । ସେ କହିଛନ୍ତି ଯେ ଚୀନ୍ ପାଖରେ ପୂର୍ବରୁ DF-41 ଇଣ୍ଟର କଣ୍ଟିନେଣ୍ଟାଲ ବାଲିଷ୍ଟିକ୍ ମିସାଇଲ୍ ଅଛି, ଯାହା ସାଇଲୋ, ରୋଡ୍ ହ୍ବିଲ୍ସ ଏବଂ ରେଳବାଇରୁ ଉତକ୍ଷେପଣ କରାଯାଇପାରିବ। ଏହି ନମନୀୟ ଏବଂ ନିର୍ଭରଯୋଗ୍ୟ ବ୍ୟବସ୍ଥା ହେତୁ ଏହା ଚାଇନାର ପିପୁଲ୍ସ ଲିବରେସନ୍ ଆର୍ମିର ମେରୁଦଣ୍ଡ ଅଟେ। ଆଇସିବିଏମ୍ ମିସାଇଲ୍ର ସୀମା ୫୫୦୦ କିଲୋମିଟର ପର୍ଯ୍ୟନ୍ତ, ଅର୍ଥାତ୍ ଏହା ୩୪୦୦ ମାଇଲ୍ ଦୂରରୁ ମଧ୍ୟ ଟାର୍ଗେଟ ଉପରେ ଆକ୍ରମଣ କରିପାରିବ ।
ଗତ ବର୍ଷ ଆମେରିକାର ପ୍ରତିରକ୍ଷା ମନ୍ତ୍ରଣାଳୟ ପେଣ୍ଟାଗନ୍ ମଧ୍ୟ ସମାନ ରିପୋର୍ଟ ପ୍ରକାଶ କରିଥିଲା, ଯେଉଁଥିରେ କୁହାଯାଇଥିଲା ଯେ ଚୀନ୍ ୨୦୩୦ ସୁଦ୍ଧା ଆଣବିକ ଶକ୍ତି ଦ୍ୱିଗୁଣିତ କରିବ। ୨୦୨୧ ମସିହାରେ ଏହାର ୪୦୦ ପରମାଣୁ ଅସ୍ତ୍ର ଥିଲା, ବର୍ତ୍ତମାନ ଏହାର ୫ଶହ କାର୍ଯ୍ୟକ୍ଷମ ପରମାଣୁ ବୋମା ଅଛି ଏବଂ ୨୦୩୦ ସୁଦ୍ଧା ଏହି ସଂଖ୍ୟା ୧୦୦୦ରେ ପହଞ୍ଚିବ । ତଥାପି, ଏହାର ପରମାଣୁ ଶକ୍ତି ଆମେରିକା ଏବଂ ରୁଷ ତୁଳନାରେ ବହୁତ କମ୍ ରହିବ।
