ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ ନୂଆଦିଲ୍ଲୀ ଏବଂ ଇସଲାମାବାଦ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଭାରତ ପାକିସ୍ତାନ ବିରୁଦ୍ଧରେ ପ୍ରତିଶୋଧ ନେବା ପାଇଁ ଦୈନନ୍ଦିନ ବିଭିନ୍ନ ବିକଳ୍ପ ଗୁଡ଼ିକ ଉପରେ ବିଚାର କରୁଛି। ଏହି ସମୟରେ, ଚୀନ୍ ରାଷ୍ଟ୍ରଦୂତ ଜିଆଙ୍ଗ୍ ଜେଡୋଙ୍ଗ୍ ସୋମବାର ଦିନ ପାକିସ୍ତାନ ରାଷ୍ଟ୍ରପତି ଆସିଫ୍ ଅଲ୍ଲୀ ଜର୍ଦ୍ଦାରୀଙ୍କୁ ଭେଟିଛନ୍ତି ଏବଂ ପାକିସ୍ତାନକୁ ସମର୍ଥନ ଜଣାଇବେ ବୋଲି ଆଶ୍ବାସନା ଦେଇଛନ୍ତି । ଜେଡୋଙ୍ଗ କହିଛନ୍ତି ଯେ, ଦକ୍ଷିଣ ଏସିଆରେ ଶାନ୍ତି ଏବଂ ସ୍ଥିରତା ପାଇଁ ଚୀନ୍ ପାକିସ୍ତାନକୁ ସମର୍ଥନ ଜାରି ରଖିବ।
ଜେଡୋଙ୍ଗ ରାଷ୍ଟ୍ରପତି ଜର୍ଦ୍ଦାରୀଙ୍କୁ ଭେଟି ଭାରତ-ପାକିସ୍ତାନ ଉତ୍ତେଜନା ସମେତ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ। ସରକାରୀ ନିୟନ୍ତ୍ରଣାଧୀନ ରେଡିଓ ପାକିସ୍ତାନ ଏହା ରିପୋର୍ଟ କରିଛି। ରିପୋର୍ଟରେ କୁହାଯାଇଛି ଯେ,ବୈଠକ ସମୟରେ ଜର୍ଦ୍ଦାରୀ ପହଲଗାମ ଆକ୍ରମଣ ପରେ ଭାରତ ଦ୍ୱାରା ନିଆଯାଇଥିବା ପଦକ୍ଷେପ ଉପରେ ଆଲୋଚନା କରିଥିଲେ ଏବଂ କହିଥିଲେ ଯେ,ଏପରି ପଦକ୍ଷେପ ଆଞ୍ଚଳିକ ଶାନ୍ତି ଏବଂ ସ୍ଥିରତା ପାଇଁ ବିପଦ।
୨୨ ଏପ୍ରିଲରେ ଦକ୍ଷିଣ କାଶ୍ମୀରର ପହଲଗାମରେ ଏକ ଆତଙ୍କବାଦୀ ଆକ୍ରମଣ ହୋଇଥିଲା, ଯେଉଁଥିରେ ୨୬ ଜଣଙ୍କୁ ନିର୍ମମ ଭାବରେ ହତ୍ୟା କରାଯାଇଥିଲା। ମୃତକଙ୍କ ମଧ୍ୟରେ ଅଧିକାଂଶ ପର୍ଯ୍ୟଟକ ଥିଲେ। ଏହି ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କ ଖରାପ ହୋଇଛି।
ଭାରତ ଗତ ସପ୍ତାହରେ ପାକିସ୍ତାନରୁ ଆସୁଥିବା କିମ୍ବା ପାକିସ୍ତାନ ଦେଇ ପରିବହନ ହେଉଥିବା ସାମଗ୍ରୀ ଆମଦାନୀ ଏବଂ ପାକିସ୍ତାନୀ ଜାହାଜର ବନ୍ଦର ଗୁଡ଼ିକରେ ପ୍ରବେଶ ଉପରେ ନିଷେଧ କରିଥିଲା। ସେହି ସମୟରେ, ପ୍ରଧାନମନ୍ତ୍ରୀ ମୋଦି କହିଥିଲେ ଯେ ଭାରତ ଆତଙ୍କବାଦୀ ଏବଂ ସେମାନଙ୍କ ସହାୟକ ମାନଙ୍କ ବିରୁଦ୍ଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିବଦ୍ଧ।
ଆତଙ୍କବାଦୀ ଆକ୍ରମଣ ପରେ, ଭାରତ ପାକିସ୍ତାନ ବିରୁଦ୍ଧରେ ଅନେକ ରଣନୈତିକ ପଦକ୍ଷେପ ନେଇଛି । ଏଥିରେ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବା, ଅଟାରୀ ଚେକ୍ ପୋଷ୍ଟକୁ ବନ୍ଦ କରିବା ଏବଂ କୂଟନୈତିକ ସମ୍ପର୍କକୁ ହ୍ରାସ କରିବା ଅନ୍ତର୍ଭୁକ୍ତ।
