ରିୟାଦ,୧୧/୧୧: ଆମେରିକାର ଷ୍ଟାର୍ ଖେଳାଳି କୋକୋ ଗୌଫ୍ ସବୁ କଳ୍ପନା ଜଳ୍ପନାର ଅନ୍ତ ଘଟାଇ ଡବ୍ଲ୍ୟୁଟିଏ ଫାଇନାଲ୍ସ ଚାମ୍ପିଅନ୍ ହୋଇଛନ୍ତି । ଫାଇନାଲ୍ରେ ସେ ୩-୬, ୬-୪, ୭-୬ (୭-୨) ସେଟ୍ରେ ଅଲିମ୍ପିକ ଚାମ୍ପିଅନ୍ ଚୀନର କ୍ୱିନୱେନ ଝେଙ୍ଗଙ୍କୁ ପରାସ୍ତ କରିଥିଲେ । ଏହି ମ୍ୟାଚ୍ ଜିତିବା ପାଇଁ ତାଙ୍କୁ ୩ଘଣ୍ଟାରୁ ଊଦ୍ଧ୍ୱର୍ ସମୟ ଲାଗିଥିଲା । ଏଥିସହ ସେ କ୍ୟାରିୟରରେ ନବମ ଡବ୍ଲ୍ୟୁଟିଏ ଟୁର ସିଙ୍ଗଲ୍ସ ଟାଇଟଲ ହାସଲ କରିଛନ୍ତି । ଗୌଫ ଟ୍ରଫି ସହ ୪.୮ମିଲିୟନ ଡଲାର ପୁରସ୍କାର ରାଶି ପାଇଥିଲେ । ଡବ୍ଲ୍ୟୁଟିଏ ଇତିହାସରେ ଏହା ସିଙ୍ଗଲ୍ସରେ ସର୍ବାଧିକ ପୁରସ୍କାର ରାଶି ଅଟେ ।
୨୦ ବର୍ଷୀୟା ଗୌଫ୍ ଦୀର୍ଘ ଦୁଇ ଦଶନ୍ଧି ପରେ ସର୍ବକନିଷ୍ଠ ଖେଳାଳି ଭାବେ ଡବ୍ଲ୍ୟୁଟିଏ ଫାଇନାଲ୍ସ ଟାଇଟଲ୍ ଜିତିଛନ୍ତି । ପୂର୍ବରୁ ୨୦୦୪ରେ ମାରିଆ ସାରାପୋଭା ୧୭ବର୍ଷ ବୟସରେ ଏହି ଟାଇଟଲ୍ ଜିତିଥିଲେ । ଗୌଫ୍ ୨୧ ବର୍ଷରେ ପାଦ ଥାପିବା ପୂର୍ବରୁ ଚତୁର୍ଥ ଆମେରିକୀୟ ଖେଳାଳି ଭାବେ ଡବ୍ଲ୍ୟୁଟିଏ ଫାଇନାଲ୍ସ ଚାମ୍ପିଅନ୍ ହୋଇଛି । ପୂର୍ବରୁ କ୍ରିସ୍ ଏଭର୍ଟ (୧୯୭୨, ୧୯୭୩, ୧୯୭୫), ଟ୍ରାସି ଅଷ୍ଟିନ (୧୯୮୦) ଓ ସେରେନା ୱିଲିୟମ୍ସ (୨୦୦୧) ଏହି ଟ୍ରଫି ଜିତିଥିଲେ ।
ଡବ୍ଲ୍ୟୁଟିଏଫ୍ ଫାଇନାଲ୍ସ ଟାଇଟଲ ପଥରେ ଗୌଫ ବିଶ୍ୱର ଏକ ନମ୍ବର ଖେଳାଳି ଅର୍ନ୍ୟା ସାବାଲେଙ୍କା (ସେମିରେ) ଓ ୨ନଂ ଖେଳାଳି ଇଗା ସ୍ୱିଟେକ (ଗ୍ରୁପ୍ ମ୍ୟାଚ୍)ଙ୍କୁ ପରାଜିତ କରିଥିଲେ । ସେ ଟାଇଟଲ୍ ଲଢ଼େଇରେ ୩ଘଣ୍ଟା ୪ମିନିଟ୍ ମଧ୍ୟରେ ବିଜୟ ହାସଲ କରିଥିଲେ । ୨୦୦୮ରେ ଟାଇମିଂ ଲାଗୁ ହେବା ପରେ ଡବ୍ଲ୍ୟୁଟିଏ ଫାଇନାଲ୍ସ ଇତିହାସରେ ଏହା ସମୟ ବ୍ୟବଧାନରେ ସବଠୁ ବଡ଼ ଫାଇନାଲ୍ ମୁକାବିଲା ରହିଥିଲା । ଗୌଫ୍ କ୍ରମାନ୍ୱୟରେ ଦ୍ୱିତୀୟ ଥର ଡବ୍ଲ୍ୟୁଟିଏ ମାନ୍ୟତା ତାଲିକାରେ ତୃତୀୟ ସ୍ଥାନରେ ରହି ବର୍ଷ ସିଜନ ଶେଷ କରିଛନ୍ତି ।
