କେସିଙ୍ଗା,୨୧/୦୬: କଳାହାଣ୍ଡି ଜିଲ୍ଲା କେସିଙ୍ଗା ବିଜ୍ଞାପିତ ଅଞ୍ଚଳ ପରିଷଦରେ ଆବଶ୍ୟକତା ଦୃଷ୍ଟିରୁ ଆହୁରି କେତେକ କର୍ମଚାରୀଙ୍କୁ ନିୟୋଜିତ କରିବା ପାଇଁ ପ୍ରକ୍ରିୟା ଚାଲିଛି । ଏଥିରେ ଏନ୍ଏସିର କେତେକ ପୂର୍ବତନ କର୍ମଚାରୀଙ୍କୁ ପୁନଃ ନିଯୁକ୍ତି କରିବା ପାଇଁ ପ୍ରଚେଷ୍ଟା ଚାଲିଥିବା ନେଇ ବିଶ୍ୱସ୍ତ ସୂତ୍ରରୁ ଜଣାପଡିଛି । କିନ୍ତୁ ଏହାକୁ କେତେକ କାଉନସିଲର ବିରୋଧ କରିଛନ୍ତି । ଏନେଇ ୱାର୍ଡ ନମ୍ବର ୧ ର କାଉନସିଲର ମଞ୍ଜୁଲା ସାହୁ, ୱାର୍ଡ ନମ୍ବର ୨ ର ଭୁପେନ୍ଦ୍ର ଘିବେଲା, ୱାର୍ଡ ନମ୍ବର ୩ କଂଗ୍ରେସ କାଉନସିଲର ରୋହିତ ଜୈନ, ୱାର୍ଡ ନମ୍ବର ୫ ର ମଞ୍ଜୁ ମାଝୀ ଏବଂ ୱାର୍ଡ ନମ୍ବର ୧୧ କାଉନସିଲର ରମାକାନ୍ତ ଜେନାଙ୍କ ଦସ୍ତଖତରେ ଏନ୍ଏସି ନିର୍ବାହୀ ଅଧିକାରୀଙ୍କୁ ଲିଖିତ ଭାବେ ଜଣାଇଛନ୍ତି ଏବଂ ଏନ୍ଏସିର ପୂର୍ବତନ କର୍ମଚାରୀଙ୍କୁ ପୁନଃ ନିଯୁକ୍ତି ନକରିବା ସମ୍ବନ୍ଧରେ ନିବେଦନ କରିଛନ୍ତି ।
ଅଭିଯୋଗକାରୀ କାଉନସିଲରଙ୍କ ଅନୁଯାୟୀ ପ୍ରକାଶ ଯେ, ଏନ୍ଏସିରେ କର୍ମଚାରୀଙ୍କ ଆବଶ୍ୟକତା ଦୃଷ୍ଟିରୁ କେତେକ କର୍ମଚାରୀଙ୍କୁ ନିଯୁକ୍ତି ଦେବା ପାଇଁ ପଦକ୍ଷେପ ନେବା ବିଷୟ ସ୍ୱାଗତଯୋଗ୍ୟ । କିନ୍ତୁ ଏନ୍ଏସିରେ ପୂର୍ବରୁ ଚାକିରି କରି ଅବସର ନେଇଥିବା କେତେକ କର୍ମଚାରୀଙ୍କୁ ପୁନଃ ନିଯୁକ୍ତି ନଦେବାକୁ ଅନୁରୋଧ କରାଯାଇଛି । ବିଶ୍ୱସ୍ତ ସୂତ୍ରରୁ ଏଠାରେ ପ୍ରକାଶ ଯେ, ଯେଉଁ ଅବସରପ୍ରାପ୍ତ କର୍ମଚାରୀଙ୍କୁ ପୁନଃ ନିଯୁକ୍ତି ପାଇଁ ଚେଷ୍ଟା କରାଯାଉଛି ସେମାନଙ୍କ ନାମରେ ତାଙ୍କର ଚାକିରି କାର୍ଯ୍ୟକାଳ ସମୟରେ ଅନେକ ଅଭିଯୋଗ ରହିଛି ଓ ସେମାନଙ୍କ କାର୍ଯ୍ୟ ଶୈଳୀକୁ ମଧ୍ୟ କେସିଙ୍ଗା ଜନସାଧାରଣ ପସନ୍ଦ କରୁନଥିଲେ ବୋଲି ଅଭିଯୋଗ ହୋଇଛି । ତେଣୁ ଏ ବିଷୟରେ ଏନ୍ଏସି ନିର୍ବାହୀ ଅଧିକାରୀଙ୍କୁ ପରିଷଦର ପାଞ୍ଚ ଜଣ କାଉନସିଲର ଲିଖିତ ଭାବରେ ଜଣାଇଛନ୍ତି । ଏନେଇ ଏନ୍ଏସି ନିର୍ବାହୀ ଅଧିକାରୀ ଚିନ୍ମୟ ଆଚାର୍ଯ୍ୟଙ୍କୁ ପଚାରିବାରୁ କାଉନସିଲ ବୈଠକରେ ଆଲୋଚନା କରାଯାଇ ଆଉଟସୋର୍ସିଂ ଜରିଆରେ ଏନ୍ଏସିରେ କେତେକ କର୍ମଚାରୀଙ୍କ ନିଯୁକ୍ତି ଦେବା ନିମନ୍ତେ ଟେଣ୍ଡର ଡକାଯାଇଛି ହେଲେ ତାହା ଫାଇନାଲ ହୋଇନାହିଁ । ଆଉଟସୋର୍ସିଂ ଏଜେନ୍ସି ଜରିଆରେ କର୍ମଚାରୀ ନିଯୁକ୍ତି ପାଇବେ ବୋଲି ନିର୍ବାହୀ ଅଧିକାରୀ ଆଚାର୍ଯ୍ୟ ପ୍ରକାଶ କରିଛନ୍ତି ।
