ନୂଆଦିଲ୍ଲୀ,୦୭/୦୩; ମଧ୍ୟପ୍ରାଚ୍ୟରେ ମହାଯୁଦ୍ଧ । ବଢିଲା ତେଲ ଦର । ଯାହା ଅନୁମାନ କରାଯାଉଥିଲା ତାହା ହେଲା । ଇରାନ-ଇସ୍ରାଏଲ ଏବଂ ଆମେରିକା ମଧ୍ୟରେ ଯୁଦ୍ଧ ଘନଘଟା ବିଶ୍ୱ ଶକ୍ତି ବଜାରରେ ନିଆଁ ଲଗାଇ ଦେଇଛି । ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ୯୪.୫୧ ଡଲାର ଛୁଇଁଛି । ଅଶୋଧିତ ତୈଳ ମୂଲ୍ୟରେ ଏହି ବୃଦ୍ଧି ଗତ ୩୦ ମାସ କିମ୍ବା ଅଢ଼େଇ ବର୍ଷ ମଧ୍ୟରେ ସର୍ବୋଚ୍ଚ ସ୍ତର ଛୁଇଁଛି । ପୂର୍ବରୁ ସେପ୍ଟେମ୍ବର ୧୮, ୨୦୨୩ରେ ତୈଳ ମୂଲ୍ୟ ଏହି ସ୍ତର ପାଖାପାଖି ଦେଖାଯାଇଥିଲା । ୯୪ ଡଲାର ସର୍ବୋଚ୍ଚ ସ୍ତରରେ ପହଞ୍ଚିବା ପରେ ଭାରତରେ ପେଟ୍ରୋଲ ଡିଜେଲ ଦର ବଢିବା ଆଶଙ୍କା କରାଯାଉଛି ।
୮ ଦିନରେ ଐତିହାସିକ ୩୫% ! ଅଶୋଧିତ ତୈଳ ମୂଲ୍ୟରେ ଏହି ବୃଦ୍ଧି କେବଳ ଏକ ସଂଖ୍ୟା ନୁହେଁ, ବରଂ ଏକ ରେକର୍ଡ । ପେଟ୍ରୋଲିୟମ ମନ୍ତ୍ରଣାଳୟର ପେଟ୍ରୋଲିୟମ ଯୋଜନା ଏବଂ ବିଶ୍ଳେଷଣ ପ୍ରକୋଷ୍ଠ (PPAC)ର ସଦ୍ୟତମ ରିପୋର୍ଟ ଅନୁଯାୟୀ, ୫ ମାର୍ଚ୍ଚ, ୨୦୨୬ରେ ଭାରତୀୟ ଅଶୋଧିତ ତୈଳ ବାସ୍କେଟର ହାରାହାରି ମୂଲ୍ୟ ପ୍ରତି ବ୍ୟାରେଲ ୯୩.୪୧ ଡଲାରରେ ପହଞ୍ଚିଥିଲ । ଫେବୃଆରୀ ୨୦୨୬ରେ ଭାରତୀୟ ଅଶୋଧିତ ତୈଳ ହାରାହାରି ମୂଲ୍ୟ ପ୍ରତି ବ୍ୟାରେଲ ମାତ୍ର ୬୯.୦୧ ଡଲାର ଥିଲା । ଏହାର ଅର୍ଥ ଗତ ୮ ଦିନରେ ଅଶୋଧିତ ତୈଳ ମୂଲ୍ୟ ଆଶ୍ଚର୍ଯ୍ୟଜନକ ଭାବରେ ୩୫.୩୫% ବୃଦ୍ଧି ପାଇଛି । ଯୁଦ୍ଧ ଯୋଗୁଁ ଯୋଗାଣ ଶୃଙ୍ଖଳା ବିଭ୍ରାଟ ମୂଲ୍ୟକୁ ଏତେ ଅସ୍ଥିର କରିଛି ଯେ, ଯୁଦ୍ଧ ସାଧାରଣ ଲୋକଙ୍କ ପକେଟକୁ ପହଞ୍ଚିବ ବୋଲି ଆଶଙ୍କା କରାଯାଉଛି ।
ଭାରତ ପାଇଁ ଚିନ୍ତାର ବିଷୟ ? ଭାରତ ଏହାର ଆବଶ୍ୟକତାର ପ୍ରାୟ ୮୫% ଅଶୋଧିତ ତୈଳ ଆମଦାନୀ କରିଥାଏ । ଅଶୋଧିତ ତୈଳ ମୂଲ୍ୟରେ ପ୍ରତ୍ୟେକ ଡଲାର ବୃଦ୍ଧି ଭାରତର ଆମଦାନୀ ବିଲ୍ ହଜାର ହଜାର କୋଟି ଟଙ୍କା ବୃଦ୍ଧି କରେ । ଏହି ୩୫% ମୂଲ୍ୟ ବୃଦ୍ଧି ସିଧାସଳଖ ଭାରତର ବାଣିଜ୍ୟ ନିଅଣ୍ଟ ଏବଂ ବୈଦେଶିକ ମୁଦ୍ରା ଭଣ୍ଡାରକୁ ପ୍ରଭାବିତ କରୁଛି । ମଧ୍ୟପ୍ରାଚ୍ୟ ଯୁଦ୍ଧ ଭିତରେ ଲୋକଙ୍କ ମନରେ ପେଟ୍ରୋଲ-ଡିଜେଲକୁ ନେଇ ଚିନ୍ତା ବଢିଛି । ଭାରତ ପାଖରେ ୭ରୁ୮ ସପ୍ତାହ ତେଲ ଗଚ୍ଛିତ ଅଛି ।
ଏହା ବି ପଢନ୍ତୁ...ମଧ୍ୟପ୍ରାଚ୍ୟ ଯୁଦ୍ଧ ଭିତରେ ମହଙ୍ଗା ମାଡ଼, ଘରୋଇ ଗ୍ୟାସ୍ ସିଲିଣ୍ଡର ଦର ୬୦ ଟଙ୍କା ବଢିଲା
ପେଟ୍ରୋଲ ଏବଂ ଡିଜେଲ ମୂଲ୍ୟ ଉପରେ କ’ଣ ପ୍ରଭାବ ପଡ଼ିବ ? ସାଧାରଣ ଲୋକଙ୍କ ମନରେ ସବୁଠାରୁ ବଡ଼ ପ୍ରଶ୍ନ ହେଉଛି: ପେଟ୍ରୋଲ ଏବଂ ଡିଜେଲ ଏବେ ମହଙ୍ଗା ହୋଇଯିବ କି ? ଏହାର ସମ୍ଭାବ୍ୟ ପ୍ରଭାବରେ ଦେଖିବାକୁ ଗଲେ ବର୍ତ୍ତମାନର ମୂଲ୍ୟରେ ପେଟ୍ରୋଲ ଏବଂ ଡିଜେଲ ବିକ୍ରି କରିବା ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକ (OMCs) ପାଇଁ କ୍ଷତିକାରକ ପ୍ରସ୍ତାବ ହୋଇପାରେ । ଯଦି ଆନ୍ତର୍ଜାତୀୟ ମୂଲ୍ୟ ୯୫ ଡଲାରରୁ ଅଧିକ ହୁଏ ଏବଂ ସେହିପରି ରହିଥାଏ, ତେବେ ତୈଳ କମ୍ପାନୀଗୁଡ଼ିକ ପ୍ରତି ଲିଟର ପିଛା ୫ ରୁ ୭ ଟଙ୍କା ମୂଲ୍ୟ ବୃଦ୍ଧି ପ୍ରସ୍ତାବ ଦେଇପାରନ୍ତି ।
କୋଭିଡ୍ ପରେ ସପ୍ତାହିକ ସବୁଠୁ ଅଧିକ ଦରରେ ପହଞ୍ଚିଛି। ବିଶେଷ ଭାବେ ଇରାନ-ଆମେରିକା ଯୁଦ୍ଧ ପରେ ୨୫ ପ୍ରତିଶତ ବଢ଼ି ଯାଇଛି ଅଶୋଧିତ ତୈଳ ଦର । ତେଲ ସଂରକ୍ଷଣ ସମସ୍ୟା ନେଇ ମଧ୍ୟପ୍ରାଚ୍ୟ ଦେଶଗୁଡ଼ିକରେ ଚିନ୍ତା ବଢ଼ୁଛି । କୁଏତର କିଛି ତେଲ ରିଫାଇନାରୀ ନଷ୍ଟ ହେବା ପରେ ଉତ୍ପାଦନ କମିଛି। ବିଶେଷଜ୍ଞମାନଙ୍କ ଅନୁସାରେ, ସାଉଦି ଆରବ ଓ ୟୁଏଇର ସଂରକ୍ଷଣ ବି ପ୍ରାୟ ୨୦ ଦିନରେ ସରି ଯାଇପାରେ । ଯଦି ଏପରି ହୁଏ ତାହେଲେ ବଡ଼ ତୈଲ ଉତ୍ପାଦକ ଦେଶମାନେ ଉତ୍ପାଦନ ବନ୍ଦ କରିବାକୁ ବାଧ୍ୟ ହେବେ। ଏହା ତେଲ ବଜାରରେ ଅଧିକ ଚାପ ସୃଷ୍ଟି କରିପାରେ, କାରଣ ଉତ୍ପାଦନ ପୁନଃ ଆରମ୍ଭ କରିବା ପ୍ରକ୍ରିୟା ଅତ୍ୟନ୍ତ ଖର୍ଚ୍ଚସାଧ୍ୟ ଓ ଅନେକ ଦିନ ଲାଗିପାରେ। କେତେକ ସପ୍ତାହ ସମୟ ଲାଗିପାରେ।
