କଟକ,୧୯/୦୧: କଟକ ସହ ଅତି ଯୋଜନାବଦ୍ଧ ଭାବେ ବିଶ୍ୱାସଘାତ କରାଯାଇଛି । ବିଧିବଦ୍ଧ ଭାବେ କାର୍ଯ୍ୟାଳୟ ସ୍ଥାନାନ୍ତର ପୂର୍ବରୁ କୌଶଳକ୍ରମେ ଠିକଣାକୁ କଟକ ବଦଳରେ ଭୁବନେଶ୍ୱର କରି ଦିଆଯାଇଛି । ଏମିତି କରି ଆଗାମୀ ଦିନରେ କାର୍ଯ୍ୟାଳୟ ସ୍ଥାନାନ୍ତର ପାଇଁ ବାଟ ସଫା କରାଯାଇଥିବା ଅଭିଯୋଗ ଉଠିଛି । ରାଜ୍ୟ ପୁଲିସ୍ ମୁଖ୍ୟାଳୟରେ ଥିବା ଓଡ଼ିଶା ପୁଲିସ୍ ନିଯୁକ୍ତି (ରିକ୍ରୁଟ୍ମେଣ୍ଟ) ବୋର୍ଡ ବିଜ୍ଞପ୍ତିରୁ ଏଭଳି ସାଂଘାତିକ ସତ୍ୟ ଓ ତଥ୍ୟ ସାମ୍ନାକୁ ଆସିଛି । ବକ୍ସିବଜାର ପୁଲିସ୍ ମୁଖ୍ୟାଳୟରେ ଥିବା ଏହି ନିଯୁକ୍ତି ବୋର୍ଡର କାର୍ଯ୍ୟାଳୟ ଏବେ ବି କଟକରେ ଚାଲିଥିବା ବେଳେ ଏହାର ଠିକଣା ବଦଳି ଭୁବନେଶ୍ୱର ହୋଇଯାଇଛି । ପୁଲିସ୍ ରିକ୍ରୁଟମେଣ୍ଟ ବୋର୍ଡ ପକ୍ଷରୁ ଏସ୍ଆଇ ନିଯୁକ୍ତି ନିମନ୍ତେ ଆଜି ପ୍ରକାଶ ପାଇଥିବା ବିଜ୍ଞପ୍ତିରେ ଠିକଣା ଭୁବନେଶ୍ୱର ଲେଖାଯାଇଛି । କାର୍ଯ୍ୟାଳୟ ସ୍ଥାନାନ୍ତର ପାଇଁ ଏଭଳି କାରସାଦି ହୋଇଥିବା କଥା ଜଣାପଡ଼ିବା ପରେ ସହରବାସୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ମିଳିଥିବା ସୂଚନାନୁସାରେ, ଓଡ଼ିଶା ପୁଲିସ୍ ସବ୍-ଇନ୍ସପେକ୍ଟର, ଆର୍ମଡ୍ ପୁଲିସ୍, ଅଗ୍ନିଶମ ସେବା ସଂସ୍ଥା ଓ ଜେଲ୍ ବିଭାଗର ଏସ୍ଆଇ ପାହ୍ୟାରେ ମିଳିତ ପରୀକ୍ଷା ଲାଗି ରାଜ୍ୟ ସରକାର ୨୦୨୧ରେ ଓଡ଼ିଶା ପୁଲିସ୍ ରିକ୍ରୁଟମେଣ୍ଟ୍ ବୋର୍ଡ ଗଠନ କରିଥିଲେ । ବୋର୍ଡର କାର୍ଯ୍ୟାଳୟ କଟକ ବକ୍ସିବଜାରସ୍ଥିତ ପୁଲିସ୍ ମୁଖ୍ୟାଳୟରେ ଖୋଲିଥିଲା । ୨୦୨୧ରେ ଗଠନ ହୋଇଥିବା ଏହି ବୋର୍ଡ ଇତିମଧ୍ୟରେ ଚାରି ଥର ଏସ୍ଆଇ ପରୀକ୍ଷା ପରିଚାଳନା କଟକରୁ ହିଁ କରିଛି । ମାତ୍ର ଗତ ୧୭ ତାରିଖରେ ଜାରି ହୋଇଥିବା ନିଯୁକ୍ତି ବିଜ୍ଞପ୍ତିରେ ପୁଲିସ୍ ନିଯୁକ୍ତି ବୋର୍ଡ କାର୍ଯ୍ୟାଳୟ, ଭୁବନେଶ୍ୱର ବୋଲି ଲେଖାଯାଇଛି ।
କଟକସ୍ଥିତ ପୁଲିସ୍ ମୁଖ୍ୟାଳୟରେ ଅଦ୍ୟାବଧି ଉକ୍ତ ଅଫିସ କାର୍ଯ୍ୟ ଚାଲିଥିବା ବେଳେ ଠିକଣା ଭୁବନେଶ୍ୱର ଉଲ୍ଲେଖ କରାଯିବା ପଛରେ ଏକ ବିରାଟ ଷଡ଼ଯନ୍ତ୍ର ରହିଛି ବୋଲି ଚର୍ଚ୍ଚା ହେଉଛି । ମିଳିଥିବା ତଥ୍ୟ ମୁତାବକ, ଭୁବନେଶ୍ୱରରେ ଉକ୍ତ କାର୍ଯ୍ୟାଳୟ ଅଦ୍ୟାବଧି ନିର୍ମାଣ ହୋଇନଥିଲେ ମଧ୍ୟ ଏହାକୁ ସ୍ଥାନାନ୍ତର କରିବା ପାଇଁ ଏବେ ଭିତିରି ଯୋଜନା ଚାଲିଛି । ପୂର୍ବରୁ କଳ୍ପନା ଛକ ନିକଟରେ ଥିବା ଏକ ସରକାରୀ କ୍ୱାର୍ଟର୍ସରେ ଚାଲିଥିବା କୋଷ୍ଟାଲ ସିକ୍ୟୁରିଟି କାର୍ଯ୍ୟାଳୟ ଇତିମଧ୍ୟରେ ରସୁଲଗଡ଼କୁ ସ୍ଥାନାନ୍ତର ହେବା ପରେ ଖାଲି ପଡ଼ିଥିବା ଉକ୍ତ କ୍ୱାର୍ଟର୍ସରେ ପୁଲିସ୍ ରିକ୍ରୁଟ୍ମେଣ୍ଟ ବୋର୍ଡ କାର୍ଯ୍ୟାଳୟ ଖୋଲିବା ପାଇଁ ପ୍ରସ୍ତୁତି ଚାଲିଛି । କ୍ୱାର୍ଟର୍ସ ମରାମତି ଶେଷ ହେବା ପରେ କଟକରୁ ଫାଇଲ୍ ପତ୍ର ଭୁବନେଶ୍ୱରକୁ ବୁହା ହେବ ବୋଲି ଖବର ମିଳିଛି ।
ସୂଚନାଯୋଗ୍ୟ, ଏହି ନିଯୁକ୍ତି ବୋର୍ଡର ପ୍ରଥମ ଚେୟାରମ୍ୟାନ୍ ଯଶୋବନ୍ତ ଜେଠୱା ଥିଲେ । ତାଙ୍କ ପରେ ବରିଷ୍ଠ ଆଇପିଏସ୍ ଡକ୍ଟର ସୁଂଧାଶୁ ଶେଖର ଷଡ଼ଙ୍ଗୀ ଓ ପରେ ରାଜେଶ କୁମାରଙ୍କୁ ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଥିଲା । ଗତବର୍ଷ ଅବସରପ୍ରାପ୍ତ ଆଇପିଏସ୍ ସନ୍ତୋଷ ଉପାଧ୍ୟାୟଙ୍କୁ ଚେୟାରମ୍ୟାନ୍ ଭାବେ ନିଯୁକ୍ତି ମିଳିଥିଲା । ମାତ୍ର ଏବେ ଏହି କାର୍ଯ୍ୟାଳୟକୁ କଟକରୁ ଭୁବନେଶ୍ୱରକୁ ଉଠାଇ ନେବା ପାଇଁ ପ୍ରସ୍ତୁତି ଚାଲିଛି
