ପାଟଣାଗଡ଼, ୭/୭(ଆପ୍ର): ବଲାଙ୍ଗିର ଜିଲ୍ଲା ପାଟଣାଗଡ଼ ବ୍ଲକ ଖୁଣ୍ଟସମଲାଇ ପଞ୍ଚଯାତ ଦଲପାଲି ଗାଁକୁ ରାଜସ୍ୱ ଗ୍ରାମ ମାନ୍ୟତା ମିଳିଛି। ୨୦୦୨ ମସିହାରୁ ଗ୍ରାମବାସୀ ମାନେ ଦଲପାଲିକୁ ରାଜସ୍ୱ ଗ୍ରାମ କରିବା ପାଇଁ ପ୍ରୟାସ ଜାରି ରଖିଥିବା ବେଳେ ରାଜସ୍ୱ ବିଭାଗରୁ ଦଲପାଲି ରାଜସ୍ୱ ଗ୍ରାମ ହେବା ଶୁଣିବା ପରେ ଗ୍ରାମରେ ଖୁସିର ମାହୋଲ ଖେଳିଯାଇଛି।
ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ପ୍ରଚେଷ୍ଟାରେ ଦଲପାଲି ରାଜସ୍ୱ ଗ୍ରାମ ମାନ୍ୟତା ପାଇଥିବାରୁ ଗ୍ରାମରେ ଏକ ସମ୍ବର୍ଦ୍ଧନା ସଭା ଅନୁଷ୍ଠିତ କରି ଗ୍ରାମବାସୀ ଉପମୁଖ୍ୟମନ୍ତ୍ରୀ ଶ୍ରୀ ସିଂଦେଓଙ୍କ ନିକଟରେ କୃତଜ୍ଞତା ଜ୍ଞ୍ୟାପନ କରିଛନ୍ତି। ଏହି ସମ୍ବର୍ଦ୍ଧନା ସଭାରେ ଉପମୁଖ୍ୟମନ୍ତ୍ରୀଙ୍କ ସହିତ ପାଟଣାଗଡ଼ ତହସିଲଦାର ରୁଦ୍ର ମୋହନ ନାୟକ ଓ ପାଟଣାଗଡ଼ ଏସଡ଼ିପିଓ ସଦାନନ୍ଦ ପୂଜାରୀ ଯୋଗ ଦେଇଥିଲେ।
ନୂଆ ରାଜସ୍ବ ଗ୍ରାମ ହେବା ଦ୍ୱାରା ରାଜସ୍ୱ ଗ୍ରାମର ମୌଳିକ ସୁବିଧା ପାଇବା ନେଇ ଗ୍ରାମବାସୀ ଆଶାବାଦୀ ଥିବା ବେଳେ ରାଜସ୍ୱ ଗ୍ରାମ ହେବାର ସମସ୍ତ ଶ୍ରେୟ ଉପମୁଖ୍ୟମନ୍ତ୍ରୀ ଓ ପାଟଣାଗଡ଼ ତହସିଲଦାର ରୁଦ୍ର ମୋହନ ନାୟକଙ୍କୁ ଦେଇଛନ୍ତି ଗ୍ରାମବାସୀ।
