ଆପଣ କେଉଁ କେଉଁ ଗ୍ୟାଜେଟ୍ ବ୍ୟବହାର କରୁଛନ୍ତି ? ଏଭଳି କିଛି ଗ୍ୟାଜେଟ୍ ରହିଛି ଯାହା ଉପରେ ପ୍ରତିବନ୍ଧକ ଲଗାଇଛନ୍ତି ସରକାର । ଯଦି ଆପଣ ଅଜାଣତରେ ବି ଏସବୁ ଗ୍ୟାଜେଟ୍ର ବ୍ୟବହାର କରୁଥାନ୍ତି, ତେବେ ସାବଧାନ ! ନହେଲେ ଘରୁ ଉଠାଇନେବ ପୋଲିସ । ଆଉ ତା’ ପରେ ସିଧା ଜେଲ୍ । ଆଜିର ପ୍ରଯୁକ୍ତିବିଦ୍ୟା ଯୁଗରେ କାମକୁ ସହଜ ଓ ସରଳ କରିବାକୁ ବଜାରରେ ନୂଆ ନୂଆ ଗ୍ୟାଜେଟ୍ ଆସୁଛି । ଲୋକେ ତାକୁ କିଣିଥାନ୍ତି । କିଛି ଗ୍ୟାଜେଟ୍ସଗୁଡ଼ିକୁ ଅପବ୍ୟବହାର କରାଯାଏ, ଯାହା ଆଇନ ଶୃଙ୍ଖଳା ଏବଂ ମାନବ ଜୀବନ ପାଇଁ ଏକ ବଡ଼ ବିପଦ ସୃଷ୍ଟି କରିପାରେ । ତେଣୁ ସରକାରଙ୍କୁ କିଛି ସବୁଠାରୁ ବିପଦପୂର୍ଣ୍ଣ ଗ୍ୟାଜେଟ୍ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଡ଼ିଛି, ସେଗୁଡ଼ିକର ବ୍ୟବହାର ସମ୍ପୂର୍ଣ୍ଣ ନିଷିଦ୍ଧ କରାଯାଇଛି । କିନ୍ତୁ, ସରକାର ଯେଉଁଗୁଡ଼ିକର ବ୍ୟବହାର ଉପରେ ପ୍ରତିବନ୍ଧକ ଲଗାଇଛନ୍ତି ସେସବୁ ଉପକରଣ କ’ଣ କ’ଣ ତାହା ଜାଣିନିଅନ୍ତୁ । ଆପଣ ଜେଲ୍ ଯିବାରୁ ବର୍ତ୍ତିଯିବେ ।
ନମ୍ବର ପ୍ଲେଟ୍ ଲୁଚାଇବା ଡିଭାଇସ୍ । ଏହି ଡିଭାଇସର ଉଦ୍ଦେଶ୍ୟ ଥିଲା ବେଆଇନ କାର୍ଯ୍ୟକଳାପ କରିବା । ଏହାକୁ ବାଇକ୍ କିମ୍ବା କାର୍ର ନମ୍ବର ପ୍ଲେଟ୍ରେ ଲଗାଯାଉଥିଲା । ରିମୋଟ୍ ଦବାଇବା ମାତ୍ରେ ନମ୍ବର ପ୍ଲେଟ୍ ଉପରକୁ ଓଲଟି ପଡ଼ି ଲୁଚିଯାଉଥିଲା । ଚୋର ଏବଂ ଅପରାଧୀମାନେ ସହଜରେ ଅପରାଧ କରିବା ଏବଂ ଖସିଯିବା ପାଇଁ ଏହି ଡିଭାଇସକୁ ବ୍ୟବହାର କରୁଥିଲେ । ଏହାର ଅପବ୍ୟବହାରର ବ୍ୟାପକ ଅଭିଯୋଗ ପରେ, ସରକାର ଏହାକୁ ସମ୍ପୂର୍ଣ୍ଣ ନିଷିଦ୍ଧ କରିଥିଲେ । ସେହିଭଳି ରିଙ୍ଗ ପିସ୍ତଲକୁ ଆଙ୍ଗୁଠିରେ ମୁଦି ପରି ପିନ୍ଧାଯାଇପାରିବ । ଏହି ଛୋଟ ପିସ୍ତଲଟି ଘାତକ ଆକ୍ରମଣ ପାଇଁ ବ୍ୟବହାର କରାଯାଏ । ଏକ ବଟନ୍ ଦବାଇବା ମାତ୍ରେ ଗୁଳି ଚଳାଇଥାଏ, ଏଥିରେ ୮ ରାଉଣ୍ଡ ଗୁଳି ଚାଳନା କରାଯାଇପାରେ । ଏହାକୁ ଆତ୍ମରକ୍ଷା ପାଇଁ ଡିଜାଇନ୍ କରାଯାଇଥିଲା, କିନ୍ତୁ ପରେ ଲୋକଙ୍କୁ ଭୟଭୀତ କରିବାକୁ ବ୍ୟବହାର କରାଗଲା । ଏକ ଦୁର୍ଘଟଣାରେ ଜଣେ ପିଲାର ମୃତ୍ୟୁ ପରେ ଏହାକୁ ନିଷିଦ୍ଧ କରାଯାଇଥିଲା । ଫ୍ଲେମ୍ ଥ୍ରୋଅର୍ । ଏହି ଉପକରଣଟି ଅତ୍ୟନ୍ତ ବିପଦପୂର୍ଣ୍ଣ । ଏହା ଅନେକ ଫୁଟ୍ ପର୍ଯ୍ୟନ୍ତ ନିଆଁ ଲଗାଇପାରେ । ନିଆଁର ଝାସ ଏତେ ଅଧିକ ଥାଏ ଯେ, ପାଖରେ ଠିଆ ହୋଇଥିବା ଯେକୌଣସି ବ୍ୟକ୍ତିଙ୍କୁ ଗମ୍ଭୀର କ୍ଷତି ପହଞ୍ଚାଇପାରେ । ବିଦେଶରେ ଏହାକୁ ବରଫ ସଫା କରିବା କିମ୍ବା ଘାସ ପୋଡ଼ିବା ପାଇଁ ବ୍ୟବହାର କରାଯାଉଥିଲେ ମଧ୍ୟ, ଏହାର ବିପଦ ଯୋଗୁଁ ସରକାର ଭାରତରେ ଏହାକୁ ନିଷିଦ୍ଧ କରିଛନ୍ତି ।
ମାଷ୍ଟର ପିନ୍ । ଏହି ଲକ୍ ପିନ୍ଗୁଡ଼ିକ ଏକ କଭରରେ ଆସେ, ଯାହା କ୍ରେଡିଟ୍ କାର୍ଡ ପରି ଦେଖାଯାଏ । ଏହା ଭିତରେ ବିଭିନ୍ନ ପିନ୍ ଥାଏ, ଯାହା ଯେକୌଣସି ପ୍ରକାରର ତାଲା ଖୋଲିବାରେ ସକ୍ଷମ । ଚୋରି କରିବାରେ ଏଗୁଡ଼ିକର ବ୍ୟବହାର ବୃଦ୍ଧି ପାଇବା ପରେ ସରକାର ଏଗୁଡ଼ିକୁ ବେଆଇନ ଘୋଷଣା କରିଛନ୍ତି । କିଛି ଏଭଳି ଇୟରଫୋନ୍ ରହିଛି ଯାହା ସହଜରେ ଆଖିକୁ ଦେଖାଯାଏନାହିଁ । ଏହି ଛୋଟ ଇୟରଫୋନ୍ କାନ ଭିତରେ ଭଲ ଭାବେ ଫିଟ୍ ହୋଇଯାଏ । ଏହାର ମାଇକ୍ରୋଫୋନକୁ ଅତି ସହଜରେ ପିନ୍ଧିଥିବା ପୋଷାକ ଭିତରେ ଲୁଚାଇ ରଖାଯାଇପାରିବ । କଲେଜ ଏବଂ ପରୀକ୍ଷା ହଲ୍ରେ କପି କରିବା ପାଇଁ ଏହା ବହୁଳ ଭାବରେ ବ୍ୟବହୃତ ହେଉଥିଲା । ଏହାର ଅପବ୍ୟବହାର ଯୋଗୁଁ ସରକାର ଏହି ଡିଭାଇସକୁ ନିଷିଦ୍ଧ କରିଥିଲେ । ସେହିଭଳି ରେଡିଓଆକ୍ଟିଭ୍ ଘଣ୍ଟାର ଡିଜାଇନ୍ ଏତେ ଅଦ୍ଭୁତ ଥିଲା ଯେ, ଏହା ଏକ ରେଡିଓଆକ୍ଟିଭ୍ ଡିଭାଇସ୍ ପରି ଦେଖାଯାଉଥିଲା । ଏହାର ଡିଜାଇନ୍ ବିଷୟରେ ବଢ଼ୁଥିବା ଅଭିଯୋଗ ପରେ ଏହାକୁ ନିଷିଦ୍ଧ କରିଥିଲେ ସରକାର । ଅତ୍ୟନ୍ତ ଶକ୍ତିଶାଳୀ ଉପକରଣ ଲେଜର୍ ପଏଣ୍ଟ । ଏହାର ରେଞ୍ଜ ଶହ ଶହ କିମି ପର୍ଯ୍ୟନ୍ତ ବ୍ୟାପିପାରେ ଏପିରିକି ଏହା କାଗଜ, ପୋଷାକ, ପଶୁ ଏବଂ ମଣିଷକୁ ମଧ୍ୟ କ୍ଷତି ପହଞ୍ଚାଇପାରେ । ଏକ ଘଟଣାରେ, ଲେଜର୍ରେ ପୋଡ଼ିଯାଇ ଜଣେ ପିଲାର ମୃତ୍ୟୁ ହୋଇଥିଲା । ଏପରି ଘଟଣା ପରେ ସରକାର ଏହାକୁ ସ୍ଥାୟୀ ଭାବରେ ନିଷିଦ୍ଧ କରିଥିଲେ ।
