ନୂଆଦିଲ୍ଲୀ, ୪।୯: ଦୁଇ ଦଶନ୍ଧିରେ ଜଙ୍ଗଲ କ୍ଷୟ ଯୋଗୁଁ ୫ ଲକ୍ଷ ଲୋକ ପ୍ରାଣ ହରାଇଛନ୍ତି । ଏନେଇ ଏକ ଚାଞ୍ଚଲ୍ୟକର ରିପୋର୍ଟ ଦେଇଛି ନେଚର୍ କ୍ଲାଇମେଟ ଚେଞ୍ଜ ପତ୍ରିକା । ଏବେଠୁ ସତର୍କ ନହେଲେ ଆଗକୁ ତାପମାତ୍ରା ବୃଦ୍ଧି ଯୋଗୁଁ ଜୀବନ ହାରିବେ ଲକ୍ଷ ଲକ୍ଷ ଲୋକ । ଦକ୍ଷିଣ-ପୂର୍ବ ଏସିଆରେ ୫୦ ପ୍ରତିଶତରୁ ଅଧିକ ମୃତ୍ୟୁ ରେକର୍ଡ । ତାପମାତ୍ରା ବୃଦ୍ଧି ଏବଂ ଜଳବାୟୁ ପରିବର୍ତ୍ତନ ଏବେ କେବଳ ପରିବେଶଗତ ସଙ୍କଟ ନୁହେଁ ବରଂ ମାନବ ଜୀବନ ପାଇଁ ବଡ଼ ବିପଦ ପାଲଟିଛି । ନେଚର କ୍ଲାଇମେଟ ଚେଞ୍ଜ ପତ୍ରିକା ଏନେଇ ଏକ ଚାଞ୍ଚଲ୍ୟକର ରିପୋର୍ଟ ଦେଇଛି । ଯେଉଁଥିରେ ଜଣାପଡ଼ିଛି ଯେ, ଗତ ୨୦ ବର୍ଷ ମଧ୍ୟରେ ଅନିୟମିତ ଜଙ୍ଗଲ କ୍ଷୟ ଯୋଗୁଁ ସାରା ବିଶ୍ୱରେ ୫ ଲକ୍ଷରୁ ଅଧିକ ଲୋକଙ୍କ ମୃତ୍ୟୁ ହୋଇଛି । ଏହି ମୃତ୍ୟୁ ବର୍ଦ୍ଧିତ ତାପମାତ୍ରା ଏବଂ ଏହା ଦ୍ୱାରା ହେଉଥିବା ରୋଗ ସହିତ ସିଧାସଳଖ ଭାବେ ଜଡ଼ିତ ।
ବ୍ରାଜିଲ, ଘାନା ଏବଂ ବ୍ରିଟେନର ବୈଜ୍ଞାନିକମାନଙ୍କ ଏକ ଟିମ୍ର ମିଳିତ ଅଧ୍ୟୟନରୁ ଏହି ରିପୋର୍ଟ ପ୍ରକାଶ ପାଇଛି । ଯେଉଁଥିରେ ଜଙ୍ଗଲ କ୍ଷୟ, ସୁରକ୍ଷିତ ଅଞ୍ଚଳଗୁଡ଼ିକରେ ତାପମାତ୍ରା ବୃଦ୍ଧି ଏବଂ ବିନା ଦୁର୍ଘଟଣାରେ ମୃତ୍ୟୁ ଉପରେ ତଥ୍ୟ ସଂଗ୍ରହ କରାଯାଇଥିଲା । ଏହା ସ୍ପଷ୍ଟ ହୋଇଥିଲା ଯେ, ଯେଉଁଠାରେ ଜଙ୍ଗଲ କଟା ହୋଇଥିଲା, ସେଠାରେ ତାପମାତ୍ରା ଅନେକ ଗୁଣ ବୃଦ୍ଧି ପାଇବା ସହ ମୃତ୍ୟୁହାର ମଧ୍ୟ ଅଧିକ ଥିଲା । ଅଧ୍ୟୟନ ଅନୁଯାୟୀ, ୨୦୦୧ରୁ ୨୦୨୦ ପର୍ଯ୍ୟନ୍ତ ପରିବେଶ ଓ ବାୟୁମଣ୍ଡଳକୁ ନେଇ ବିଶ୍ଳେଷଣ କରାଯାଇଥିଲା । ଏଥିରୁ ଜଣାପଡ଼ିଥିଲା ଯେ, ଜଙ୍ଗଲ କ୍ଷୟ ଯୋଗୁଁ ବୃଦ୍ଧି ହେଉଥିବା ତାପମାତ୍ରା କାରଣରୁ ପ୍ରାୟ ୩୪ କୋଟି ୫୦ ଲକ୍ଷ ଲୋକ ପ୍ରଭାବିତ ହୋଇଥିଲେ । ଏଥିମଧ୍ୟରୁ ପ୍ରାୟ ୨୬ ଲକ୍ଷ ଲୋକଙ୍କୁ ୩ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ଅତିରିକ୍ତ ଗରମ ସହିବାକୁ ପଡ଼ିଥିଲା । ଏହି ଅତିରିକ୍ତ ଗରମ ଯୋଗୁଁ ପ୍ରତିବର୍ଷ ହାରାହାରି ୨୮ ହଜାର ୩୩୦ ଜଣଙ୍କ ମୃତ୍ୟୁ ରେକର୍ଡ କରାଯାଇଥିଲା ।
