ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ଗାଜା ଦଖଲ ଯୋଜନାକୁ ସମର୍ଥନ କରିଛନ୍ତି। ତଥାପି, ଇସ୍ରାଏଲର ଏହି ଯୋଜନାକୁ ମଧ୍ୟ ବିଭିନ୍ନ ମହଲରେ ସମାଲୋଚନା କରାଯାଉଛି। ଏହି କାରଣରୁ ଟ୍ରମ୍ପ ଏହା ଆମେରିକାର ନୁହେଁ ବରଂ ଇସ୍ରାଏଲର ଯୋଜନା ବୋଲି ଦେଖାଇବାକୁ ଚେଷ୍ଟା କରୁଛନ୍ତି । ଏକ ଆମେରିକୀୟ ଗଣମାଧ୍ୟମ ସଂଗଠନ ତାଙ୍କ ରିପୋର୍ଟରେ ଏହି ଦାବି କରିଛି।
ରିପୋର୍ଟରେ କୁହାଯାଇଛି ଯେ, ଟ୍ରମ୍ପ ଗାଜାକୁ ମାନବିକ ସହାୟତା ଯୋଗାଇବା ପାଇଁ ସମର୍ପିତ ହେବା ବିଷୟରେ କହିଥିଲେ, କିନ୍ତୁ ଗାଜାରେ ଇସ୍ରାଏଲର କାର୍ଯ୍ୟକୁ ସମାଲୋଚନା କରି ନଥିଲେ। ନିକଟରେ ତାଙ୍କର ଏକ ବିବୃତ୍ତିରେ, ଟ୍ରମ୍ପ ଇସ୍ରାଏଲର ଗାଜା ଯୋଜନା ଉପରେ କହିଥିଲେ ଯେ 'ମୁଁ ଏହା ବିଷୟରେ ଅଧିକ କିଛି କହିପାରିବି ନାହିଁ, ଏହା ଇସ୍ରାଏଲ ଉପରେ ନିର୍ଭର କରେ। ସୂଚନାଥାଉକି, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ଗାଜା ଦଖଲ ଯୋଜନାକୁ ଇସ୍ରାଏଲ ସରକାରଙ୍କ ସୁରକ୍ଷା ପରିଷଦ ମଧ୍ୟ ଅନୁମୋଦନ କରିଛି । ତଥାପି, ଇସ୍ରାଏଲର ଯୋଜନାକୁ ମଧ୍ୟ କଡ଼ା ବିରୋଧର ସମ୍ମୁଖୀନ ହେବାକୁ ପଡୁଛି। ଇସ୍ରାଏଲର ଅନେକ ସହଯୋଗୀ ମଧ୍ୟ ଏହାକୁ ସମାଲୋଚନା କରିଛନ୍ତି।
ବହୁ ୟୁରୋପୀୟ, ଆରବ ଏବଂ ଉପସାଗରୀୟ ଦେଶ ମଧ୍ୟ ଇସ୍ରାଏଲର ଏହି ଯୋଜନା ପ୍ରତି ଅସନ୍ତୋଷ ପ୍ରକାଶ କରିଛନ୍ତି ଏବଂ ଏହା ଯୋଗୁଁ ଇସ୍ରାଏଲ ଏକାକୀ ହୋଇଯିବାର ସମ୍ଭାବନା ରହିଛି । ଜର୍ମାନୀ ଇସ୍ରାଏଲକୁ ଅସ୍ତ୍ରଶସ୍ତ୍ର ଯୋଗାଣ ବନ୍ଦ କରିବାକୁ ଘୋଷଣା କରିଛି। ସେହିପରି ଫ୍ରାନ୍ସ, କାନାଡା ଏବଂ ବ୍ରିଟେନ ମଧ୍ୟ ଇସ୍ରାଏଲର ଗାଜା ଦଖଲ ଯୋଜନାକୁ ବିରୋଧ କରିଛନ୍ତି ଏବଂ ଏହି ପ୍ରସଙ୍ଗରେ ସୁରକ୍ଷା ପରିଷଦର ବୈଠକ ଦାବି କରିଛନ୍ତି। ଇସ୍ରାଏଲରେ ମଧ୍ୟ ଏହାକୁ ବିରୋଧ କରାଯାଉଛି ଏବଂ ବହୁ ସଂଖ୍ୟକ ଲୋକ ରାସ୍ତାକୁ ବାହାରି ସରକାରଙ୍କୁ ଏହା ପୁନଃବିଚାର କରିବାକୁ ଦାବି କରିଛନ୍ତି।
ସମାଲୋଚନା ପ୍ରତି ନିରବ ରହି ଇସ୍ରାଏଲର ପ୍ରଧାନମନ୍ତ୍ରୀ ନେତାନ୍ୟାହୁ କହିଛନ୍ତି ଯେ ଆମେ ଗାଜା ଦଖଲ କରିବାକୁ ଯାଉନାହୁଁ, ଆମେ କେବଳ ଗାଜାକୁ ହମାସ ଠାରୁ ମୁକ୍ତ କରିବୁ। ନେତାନ୍ୟାହୁ କହିଛନ୍ତି ଯେ ଆମେ ଗାଜାରେ ଏକ ନାଗରିକ ପ୍ରଶାସନ ପ୍ରତିଷ୍ଠା କରିବୁ, ଯାହା ଦ୍ୱାରା ଏହି ଅଞ୍ଚଳରେ ଶାନ୍ତି ରହିପାରିବ ଏବଂ ଇସ୍ରାଏଲ ପ୍ରତି କୌଣସି ବିପଦ ରହିବ ନାହିଁ।
