ନୂଆଦିଲ୍ଲୀ,୦୭/୧୧: ରିପବ୍ଲିକାନ୍ ନେତା ଡୋନାଲ୍ଡ ଟ୍ରମ୍ପ ଆମେରିକାର ନୂଆ ରାଷ୍ଟ୍ରପତି ହେବା ନିଶ୍ଚିତ ହୋଇଯାଇଛି । ତାଙ୍କୁ ମୋଟ ୫୩୮ ଆସନ ମଧ୍ୟରୁ ୨୯୨ ମିଳିଛି । ଯେବେ କି ବହୁମତ ପାଇଁ ୨୭୦ ଦରକାର ଥିଲା । ଭୋଟ ଫଳ ଆଜି ଯଦିଓ ମୋଟାମୋଟି ଭାବେ ସ୍ପଷ୍ଟ ହୋଇଯାଇଛି, କିନ୍ତୁ ଟ୍ରମ୍ପଙ୍କ ଶପଥ ସମାରୋହ ୨୦୨୫ ଜାନୁଆରୀ ୨୦ରେ ଅନୁଷ୍ଠିତ ହେବ । ଅର୍ଥାତ ଭୋଟ ଫଳ ଆସିବାର ୭୫ ଦିନ ପରେ ହିଁ ଟ୍ରମ୍ପ ଆମେରିକାର ପରବର୍ତ୍ତୀ ରାଷ୍ଟ୍ରପତି ହୋଇପାରିବେ । ଏହି ୭୫ ଦିନ ମଧ୍ୟରେ ବିଭିନ୍ନ ଔପଚାରିକତା ସମ୍ପନ୍ନ ହେବ । ପ୍ରଥମ ପର୍ଯ୍ୟାୟରେ ସମସ୍ତ ୫୦ ରାଜ୍ୟର ଭୋଟ ଗଣତି ପରେ ନିର୍ବାଚନ ଅଧିକାରୀ ବିଧିବଦ୍ଧ ଭାବେ ଫଳାଫଳ ଘୋଷଣା କରିବେ । ଏଥିସହ ପ୍ରମାଣପତ୍ର ଜାରି କରିବେ ।
ଦ୍ୱିତୀୟ ପର୍ଯ୍ୟାୟରେ ରାଜ୍ୟଗୁଡ଼ିକର ଗଭର୍ନର ରାଜ୍ୟରେ ନିର୍ବାଚିତ ହୋଇଥିବା ଇଲେକ୍ଟରମାନଙ୍କ ‘ସାର୍ଟିଫିକେଟ ଅଫ୍ ଆସର୍ଟନମେଣ୍ଟ’ରେ ଦସ୍ତଖତ କରିବେ । ଏହାର ଶେଷ ସମୟସୀମା ଡିସେମ୍ବର ୧୧ ରହିଛି । ଏହାର ନକଲଗୁଡ଼ିକୁ ଆମେରିକା କଂଗ୍ରେସକୁ ପଠାଇ ଦିଆଯିବ । ତୃତୀୟ ପର୍ଯ୍ୟାୟ ଭାବେ ଡିସେମ୍ବରର ଦ୍ୱିତୀୟ ବୁଧବାର ପରେ ଆସିବାକୁ ଥିବା ମଙ୍ଗଳବାରରେ ସମସ୍ତ ଇଲେକ୍ଟର ନିଜ ନିଜ ରାଜ୍ୟରେ ଏକାଠି ହେବେ ଏବଂ ରାଷ୍ଟ୍ରପତି ଓ ଉପ ରାଷ୍ଟ୍ରପତିଙ୍କ ଲାଗି ଭୋଟ ଦେବେ । ଏଥର ଏହି ତାରିଖ ଡିସେମ୍ବର ୧୭ ଧାର୍ଯ୍ୟ କରାଯାଇଛି । ଚତୁର୍ଥ ପର୍ଯ୍ୟାୟରେ ଡିସେମ୍ବର ଚତୁର୍ଥ ବୁଧବାର ସୁଦ୍ଧା ସମସ୍ତ ଭୋଟ ଆମେରିକା କଂଗ୍ରେସ ପର୍ଯ୍ୟନ୍ତ ପହଞ୍ଚିଯିବା ଆବଶ୍ୟକ । ଏଥର ଏହି ତାରିଖ ଡିସେମ୍ବର ୨୫ ରହିଛି । ପଞ୍ଚମ ପର୍ଯ୍ୟାୟରେ ୨୦୨୫ ଜାନୁଆରୀ ୬ରେ କଂଗ୍ରେସରେ ସମସ୍ତ ଇଲେକ୍ଟୋରାଲ ଭୋଟ ଗଣନା କରାଯିବ । ଏହି ଆଧାରରେ ଔପଚାରିକ ଭାବେ ରାଷ୍ଟ୍ରପତିଙ୍କ ନାମ ଘୋଷଣା ହେବ । ଷଷ୍ଠ ପର୍ଯ୍ୟାୟରେ ୨୦୨୫ ଜାନୁଆରୀ ୨୦ରେ ୟୁଏସ୍ କ୍ୟାପିଟଲ ବିଲ୍ଡିଂରେ ଆମେରିକାର ନୂଆ ରାଷ୍ଟ୍ରପତିଙ୍କ ଶପଥ ଗ୍ରହଣ ସମାରୋହ ଆୟୋଜିତ ହେବ ।
