ୱାଶିଂଟନ,୨୪/୦୧: ଆମେରିକାରେ ଜନ୍ମଗତ ନାଗରିକତା ଅଧିକାରକୁ ଉଚ୍ଛେଦ କରିବା ଲାଗି ନୂଆ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜାରି କରିଥିବା ଆଦେଶ ଉପରେ ସିଆଟେଲର ଏକ ସଂଘୀୟ କୋର୍ଟ ରୋକ୍ ଲଗାଇଛନ୍ତି । ଏହା ସମ୍ପୂର୍ଣ୍ଣ ଭାବେ ଅସାମ୍ବିଧାନିକ ବୋଲି କୋର୍ଟ କହିଛନ୍ତି ।
ଟ୍ରମ୍ପଙ୍କ ଆଦେଶ ବିରୋଧରେ ଆଗତ ପିଟିସନ ଉପରେ ଆମେରିକାର ଜିଲ୍ଲା ଜଜ୍ଙ୍କ କୋର୍ଟରେ ଶୁଣାଣି ହୋଇଥିଲା । ଶୁଣାଣି ସମୟରେ ବିଚାରପତି ଜନ୍ କଫେନାୱର କହିଛନ୍ତି ସେ ଗତ ୪୦ ବର୍ଷରୁ ଅଧିକ ସମୟ ଧରି ବିଚାରପତି ଭାବେ କାର୍ଯ୍ୟ କରିଆସୁଛନ୍ତି । କିନ୍ତୁ ଏଭଳି ଆଦେଶର ସେ କେବେ ବି ସାମ୍ନା କରି ନଥିଲେ । ଏହି ଆଦେଶ ସମ୍ପୂର୍ଣ୍ଣ ଭାବେ ସମ୍ବିଧାନର ଉଲ୍ଲଂଘନ । ଏଥିସହ ଜଜ୍ କଫେନାୱର ଏହି ଅଦେଶର ଆଇନଗତ ଦିଗ ଉପରେ ପ୍ରଶ୍ନ ଉଠାଇଛନ୍ତି । କୋର୍ଟରେ ଉପସ୍ଥିତ ଆଇନ ବିଭାଗର ଓକିଲ ବ୍ରେଟ ସୁମେଟଙ୍କୁ ମଧ୍ୟ ସମାଲୋଚନା କରିଛନ୍ତି । ଶୁଣାଣି ସମୟରେ ନିଜର ଜବାବ ଦାଖଲ କରିବା ଲାଗି ସୁମେଟ କୋର୍ଟଙ୍କୁ ଅଧିକ ସମୟ ମାଗିଥିଲେ । କୋର୍ଟ ତାଙ୍କୁ ସମୟ ଦେବା ସହ ଟ୍ରମ୍ପଙ୍କ ଆଦେଶ ଉପରେ ରୋକ୍ ଲଗାଇଥିଲେ । ଆମେରିକାରେ ଜନ୍ମ ହେଉଥିବା ବିଦେଶୀ ନାଗରିକଙ୍କ ପିଲାଙ୍କୁ ସେଠାକାର ନାଗରିକତା ପ୍ରଦାନ କରିବା ଲାଗି ଆଇନଗତ ବ୍ୟବସ୍ଥା ରହିଛି । ଏଥିପାଇଁ ସମ୍ବିଧାନରେ ସଂଶୋଧନ ମଧ୍ୟ ହୋଇଛି । ହେଲେ ଟ୍ରମ୍ପ ତାକୁ ଗ୍ରହଣ ନକରି ନାଗରିକତା ଉଚ୍ଛେଦ ଆଦେଶନାମା ଜାରି କରିଛନ୍ତି ।
କେବଳ ସିଆଟେଲ ନୁହେଁ ଆରିଜୋନା, ଇଲିନୟ, ଓରେଗନ ଓ ୱାଶିଂଟନ ଭଳି ଜିଲ୍ଲା କୋର୍ଟରେ ଟ୍ରମ୍ପଙ୍କ ଜନ୍ମଗତ ନାଗରିକତା ଅଧିକାର ଉଚ୍ଛେଦ ଆଦେଶକୁ ବିରୋଧ କରି ପିଟିସନ ଦାଖଲ ହୋଇସାରିଛି । ସେସବୁ କୋର୍ଟରେ ଶୁଣାଣି ଚାଲିଛି । କ୍ଷମତାକୁ ଆସୁ ଆସୁ ଟ୍ରମ୍ପ ଜାରି କରିଥିବା ଆଦେଶ ଉପରେ ସିଆଟେଲ କୋର୍ଟଙ୍କ ଏଭଳି ରୋକ୍ ତାଙ୍କୁ ଶକ୍ତ ଝଟ୍କା ଦେଇଛି । ଗତ ୨୦ ତାରିଖରେ ଦାୟିତ୍ୱ ଗ୍ରହଣ କରିବା ଦିନ ହିଁ ଟ୍ରମ୍ପ କେତେକ ଆଦେଶନାମାରେ ସ୍ୱାକ୍ଷର କରିଥିଲେ । ଯେଉଁଥିରେ ଆମେରିକାରେ ବେଆଇନ୍ ଭାବେ ପ୍ରବେଶ କରିଥିବା କିମ୍ବା ଭିସାରେ ରହୁଥିବା ଅନ୍ୟଦେଶର ଲୋକଙ୍କ ପିଲାଙ୍କୁ ଆଉ ନାଗରିକତା ମିଳିବ ନାହିଁ । ଟ୍ରମ୍ପଙ୍କ ଏଭଳି ଆଦେଶନାମାକୁ ନେଇ ସେଠାରେ ବହୁବର୍ଷ ଧରି ବସବାସ କରିଆସୁଥିବା ଭାରତୀୟ ସମେତ ଅନ୍ୟ ଦେଶର ଲୋକମାନେ ଚିନ୍ତିତ ହୋଇପଡିଛନ୍ତି ।
