ନୂଆଦିଲ୍ଲୀ,୦୬/୦୫: ବନ୍ଧୁତା, ପ୍ରେମ, ନିର୍ବନ୍ଧ ପୁଣି ପ୍ରତାରଣା । ଦୁଷ୍କର୍ମ ଅଭିଯୋଗରେ ଗିରଫ ହୋଇଛନ୍ତି ଇଣ୍ଡିଆନ ପ୍ରିମିୟର ଲିଗ୍ର ମୁମ୍ବାଇ ଇଣ୍ଡିଆନ୍ସର ପୂର୍ବତନ ପ୍ଲେୟାର ଶିବଲିକ ଶର୍ମା । ଜଣେ ଯୁବତୀ ଶିବଲିକଙ୍କ ନାମରେ ଦୁଷ୍କର୍ମ ଅଭିଯୋଗ ଆଣିଛନ୍ତି । ଏହି ଆଧାରରେ ରାଜସ୍ଥାନ ଯୋଦ୍ଧପୁର ପୋଲିସ ତାଙ୍କୁ ଗିରଫ କରିଛି ।
୨୬ ବର୍ଷୀୟ ଶିବଲିକ ଶର୍ମା ଯିଏ କି ବରୋଦା ଟିମ୍ ପାଇଁ ଖେଳୁଛନ୍ତି । ପାଣ୍ଡ୍ୟା ବଦର୍ସ ହାର୍ଦ୍ଦିକ ଓ କୃନାଲଙ୍କ ଟିମ୍ମେଟ୍ ଶିବଲିକ । ତାଙ୍କ ନାମରେ ଜଣେ ଯୁବତୀ ଦୁଷ୍କର୍ମ ଅଭିଯୋଗ ଆଣିଛନ୍ତି । ଅଭିଯୋଗ ଆଧାରରେ ରାଜସ୍ଥାନ ପୋଲିସ ତାଙ୍କୁ ହେପାଜତରେ ନେଇଛି । ମିଡ଼ିଆ ରିପୋର୍ଟ ଅନୁସାରେ, ଶିବଲିକ ଶର୍ମାଙ୍କୁ କୋର୍ଟରେ ହାଜର କରାଯାଇଛି । ଯୋଦ୍ଧପୁରର ଭାଗାତସନି ଥାନାରେ ଯୁବତୀ ଜଣଙ୍କ ଅଭିଯୋଗ କରିଥିଲେ କି, ଶିବଲିକ ତାଙ୍କୁ ବିବାହ କରିବାକୁ ମିଛ ପ୍ରତିଶ୍ରୁତି ଦେଇ ଶାରିରୀକ ସମ୍ପର୍କ ରଖିଥିଲେ ।
ଅଭିଯୋଗ ଆଣିଥିବା ଯୁବତୀ ଜଣଙ୍କ ଶିବଲିକଙ୍କ ବନ୍ଧୁ । ଦୁହିଁଙ୍କ ମଧ୍ୟରେ ସୋସିଆଲ ମିଡିଆରୁ ବନ୍ଧୁତା ହୋଇଥିଲା । ଏହା ପ୍ରେମରେ ପରିଣତ ହୋଇଥିଲା । ଏହାପରେ ଦୁହିଁଙ୍କର ନିର୍ବନ୍ଧ ହୋଇଥିଲା । ପରବର୍ତ୍ତୀ ସମୟରେ ଶିବଲିକଙ୍କ ଘରଲୋକ ନିର୍ବନ୍ଧ ଭାଙ୍ଗି ଦେଇଥିଲେ । ଏହାପରେ ଶିବଲିକ ଯୁବତୀଙ୍କୁ ଧୋକା ଦେଇଥିବା ନେଇ ଅଭିଯୋଗ କରିଥିଲେ । ଆଇପିଏଲରେ ମୁମ୍ବାଇ ଇଣ୍ଡିଆନ୍ସ ଦଳରେ ଥିଲେ । ବର୍ତ୍ତମାନ ସେ କୌଣସି ଆଇପିଏଲ ଦଳରେ ନାହାନ୍ତି । ବରୋଦା ଟିମ୍ରେ ହାର୍ଦ୍ଦିକ ପାଣ୍ଡ୍ୟା ଓ କୃନାଲଙ୍କ ସହ ବି ଖେଳିଛନ୍ତି । ଘରୋଇ କ୍ରିକେଟରେ ୫୦ରୁ ଅଧିକ ମ୍ୟାଚ ଖେଳି ସାରିଛନ୍ତି ।
ଶିବଲିକ ଜଣେ ବାମହାତୀ ବ୍ୟାଟ୍ସମ୍ୟାନ । ୨୦୧୮ରେ ଘରୋଇ କ୍ରିକେଟରେ ପଦାର୍ପଣ କରିଥିଲେ । ୧୮ଟି ଫାଷ୍ଟକ୍ଲାସ ମ୍ୟାଚରେ ଟିମ୍କୁ ପ୍ରତିନିଧିତ୍ୱ କରିଛନ୍ତି । ସେଥିରେ ୧୦୮୭ ରନ୍ କରିଛନ୍ତି । ୧୩ଟି ଲିଷ୍ଟ ଏ ଗେମ୍ ଏବଂ ୧୯ଟି ଟି-ଟ୍ୱେଣ୍ଟି ମ୍ୟାଚ ଖେଳି ଯଥାକ୍ରମେ ୩୨୨ ଓ ୩୪୯ରନ କରିଛନ୍ତି । ତାଙ୍କ ନାମରେ ୩ଟି ୱିକେଟ ରହିଛି । ଶେଷଥର ପାଇଁ ଚଳିତ ବର୍ଷ ଜାନୁଆରୀରେ ବରୋଦାର ରଣଜୀ ଟ୍ରଫି କ୍ୟାମ୍ପେନରେ ଦେଖିବାକୁ ମିଳିଥିଲା । ୨୦୨୩ ଆଇପିଏଲରେ ଶିବଲିକଙ୍କୁ ୨୦ ଲକ୍ଷ ଟଙ୍କାରେ କିଣିଥିଲା ମୁମ୍ବାଇ ଇଣ୍ଡିଆନ୍ସ ।
