ନୂଆଦିଲ୍ଲୀ: ଗାଜାର ସ୍ୱାସ୍ଥ୍ୟ ମନ୍ତ୍ରଣାଳୟ ଆଜି (ଗୁରୁବାର) କହିଛି ଯେ ଯୁଦ୍ଧବିରତି ଚୁକ୍ତି ଘୋଷଣା ହେବା ପର ଠାରୁ ଇସ୍ରାଏଲ ଏୟାର ଷ୍ଟ୍ରାଇକ୍ରେ ଅତି କମରେ ୭୨ ଜଣଙ୍କର ମୃତ୍ୟୁ ହୋଇଛି । ମନ୍ତ୍ରଣାଳୟ କହିଛି ଯେ, ଏହି ସଂଖ୍ୟା କେବଳ ଗାଜା ସହରର ଦୁଇଟି ହସ୍ପିଟାଲରେ ପହଞ୍ଚିଥିବା ମୃତଦେହ ସହିତ ଜଡିତ ଏବଂ ପ୍ରକୃତ ସଂଖ୍ୟା ଅଧିକ ହୋଇପାରେ।
ମନ୍ତ୍ରଣାଳୟର ପଞ୍ଜୀକରଣ ବିଭାଗର ମୁଖ୍ୟ ଜାହିର ଅଲ-ୱାହିଦି କହିଛନ୍ତି ଯେ, ଗତକାଲି ଏକ ରକ୍ତାକ୍ତ ଦିନ ଥିଲା ଏବଂ ଆଜି ପରିସ୍ଥିତି ଆହୁରି ଖରାପ ରହିଛି"। ଏହା ପୂର୍ବରୁ, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଥିଲେ ଯେ, ହମାସ ସହିତ "ଶେଷ ମୁହୂର୍ତ୍ତର ସଙ୍କଟ" ଯୋଗୁଁ ଇସ୍ରାଏଲ ଏକ ଅସ୍ତ୍ରବିରତି ଚୁକ୍ତିକୁ ଅନୁମୋଦନ କରିବାରେ ବିଳମ୍ବ କରୁଛି । ଏହି ଅସ୍ତ୍ରବିରତି ଚୁକ୍ତିନାମାର ଲକ୍ଷ୍ୟ ହେଉଛି ଗାଜାପଟ୍ଟିରେ ସଂଘର୍ଷ ବନ୍ଦ କରିବା ଏବଂ ଅନେକ ବନ୍ଧକଙ୍କୁ ମୁକ୍ତ କରିବା।
ଆମେରିକା ରାଷ୍ଟ୍ରପତି ଜୋ ବାଇଡେନ ଏବଂ କତରଙ୍କ ମଧ୍ୟସ୍ଥତାରେ ହୋଇଥିବା ଯୁଦ୍ଧବିରତି ଚୁକ୍ତି ଘୋଷଣା ହେବାର କିଛି ଘଣ୍ଟା ପରେ ନେତାନ୍ୟାହୁ ଚୁକ୍ତିନାମାରେ କିଛି ଅସୁବିଧା ପ୍ରତି ଇଙ୍ଗିତ କରିଥିଲେ । ବୁଧବାର ଦିନ ଘୋଷିତ ଚୁକ୍ତି ଅନୁଯାୟୀ, ଗାଜାରୁ ଅନେକ ବନ୍ଧକଙ୍କୁ ମୁକ୍ତ କରାଯିବ ଏବଂ ପାଲେଷ୍ଟାଇନୀ କଏଦୀ ମାନଙ୍କୁ ଇସ୍ରାଏଲରୁ ଫେରିବାକୁ ଅନୁମତି ଦିଆଯିବ । ଯୁଦ୍ଧବିରତି ପରେ, ଯୁଦ୍ଧ ସମାପ୍ତ କରିବା ପାଇଁ ପଦକ୍ଷେପ ନିଆଯିବ । ସୂଚନାଥାଉକି, ଇସ୍ରାଏଲ ଏବଂ ହମାସ ମଧ୍ୟରେ ଗତ ପନ୍ଦର ମାସ ଧରି ଯୁଦ୍ଧ ଚାଲିଛି।
