ନୂଆଦିଲ୍ଲୀ: ଗାଜାରୁ ପରିଚାଳିତ ହମାସ ସଂଗଠନକୁ ବଡ଼ ଝଟକା ଦେଇଛି ଇସ୍ରାଏଲ । ଗାଜାରେ ହମାସର ମୁଖ୍ୟ ମହମ୍ମଦ ସିନୱାର ନିହତ । ଇସ୍ରାଏଲୀ ସେନା ସିନଓ୍ବାରକୁ ନିପାତ କରିଥିବା ସ୍ପଷ୍ଟ କରିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ । ଏହା ପୂର୍ବରୁ ମେ’୧୪ରେ ଆଇଡିଏଫର ଆକ୍ରମଣରେ ସିନୱାର ଗୁରୁତର ହୋଇଥିବା ବୋଲି ଖବର ମିଳିଥିଲା । କିନ୍ତୁ ଏନେଇ କୌଣସି ସ୍ପଷ୍ଟ ସୂଚନା ଦେଇନଥିଲା ଇସ୍ରାଏଲ ସେନା ।
ହମାସର ମୁଖ୍ୟ କମାଣ୍ଡର ୟାହା ସିନଓ୍ବାରର ଭାଇ ଥିଲା ମହମ୍ମଦ ସିନୱାର । ଅକ୍ଟୋବର ୨୦୨୪ରେ ଇସ୍ରାଏଲ ସେନାର ଗୁଳିରେ ପ୍ରାଣ ହରାଇଥିଲା ୟାହା ସିନୱାର । ଗାଜାରେ ହମାସର ଅବଶିଷ୍ଟ ଶୀର୍ଷ କମାଣ୍ଡରଙ୍କ ମଧ୍ୟରୁ ଜଣେ ମହମ୍ମଦ ସିନୱାର । ମେ ୧୪ରେ ଇସ୍ରାଏଲର ପ୍ରତିରକ୍ଷା ବାହିନୀ ଡ୍ରୋନ୍ ଆକ୍ରମଣ କରିଥିବା ବେଳେ ସେ ଆତଙ୍କବାଦୀ ଗୋଷ୍ଠୀର କମାଣ୍ଡ ସେଣ୍ଟର ଭାବରେ ବ୍ୟବହୃତ ସୁଡ଼ଙ୍ଗରେ ଲୁଚି ଯାଇଥିଲା ।
ଖାନ ୟୁନିସରେ ଥିବା ୟୁରୋପୀୟ ହସ୍ପିଟାଲ ତଳେ କମାଣ୍ଡ ସେଣ୍ଟରଟି ଥିଲା। ଇସ୍ରାଏଲର ସେନା ଆକ୍ରମଣ ପରେ ଏକ ଭିଡିଓ ଜାରି କରିଥିଲା, ଯେଉଁଥିରେ ହସ୍ପିଟାଲ ତଳେ ଏକ ସୁଡ଼ଙ୍ଗ ଦେଖିବାକୁ ମିଳିଥିଲା । ଏହି ସୁଡ଼ଙ୍କ ଭିତରେ ହମାସ ନିଜର କାର୍ଯ୍ୟକଳାପ ଜାରି ରଖିଥିଲା ।
ଇସ୍ରାଏଲା ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ କହିଛନ୍ତି ଯେ, ‘ଆମେ ମହମ୍ମଦ ସିନୱାରକୁ ନିପାତ କରିଛୁ । ପ୍ରଧାନମନ୍ତ୍ରୀ ନେତାନ୍ୟାହୁ ଇସ୍ରାଏଲର ସଂସଦରୁ କହିଛନ୍ତି, ଆମେ ଇସମାଇଲ ହାନିୟେ, ମହମ୍ମଦ ଦୈଫ୍, ୟାହା ସିନୱାର ଏବଂ ଏବେ ମହମ୍ମଦ ସିନୱାରଙ୍କୁ ସଫା କରିଦେଇଛୁ।
