ଚଣ୍ଡିଖୋଲ,୨୬/୦୭: ହୋଟେଲରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର। ଯାଜପୁର ଜିଲ୍ଲା ଚଣ୍ଡିଖୋଲ ସ୍ଥିତ ମିଡ୍ଇଷ୍ଟ ହୋଟେଲରୁ ଜଣେ ଯୁବକଙ୍କ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରିଛି ପୁଲିସ । ମୃତ ଯୁବକ ଜଣକ ଖୋର୍ଦ୍ଧା ଜିଲ୍ଲା ବାଳକାଟି ଅଞ୍ଚଳର ଅଲିପ କୁମାର ସାହୁ ବୋଲି ଜଣାପଡ଼ିଛି । ଯୁବକଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ଘଟଣା ସ୍ଥଳରେ ସାଇଣ୍ଟିଫିକ୍ ଟିମ୍ ସହ ତଦନ୍ତ ଚଳାଇଛି ବଡ଼ଚଣା ପୁଲିସ ।
ସୂଚନା ମୁତାବକ, ଅଲିପ କୁମାର ସାହୁ ଜଣେ ବ୍ୟବସାୟୀ ଅଟନ୍ତି । ସେ ଦୀର୍ଘ ଦିନ ଧରି ଚଣ୍ଡିଖୋଲ ସ୍ଥିତ ମିଡ୍ଇଷ୍ଟ ହୋଟେଲରେ ରହି ଆସୁଥିଲେ। ଶୁକ୍ରବାର ସନ୍ଧ୍ୟା ସମୟରେ ହୋଟେଲର ୱେଟର ଚା ନେଇ ରୁମ୍ର କବାଟ ବାଡେଇ ଥିଲେ । ହେଲେ ରୁମ୍ ଭିତରୁ ଲକ୍ ହୋଇଥିଲା । ହୋଟେଲ କର୍ତ୍ତୃପକ୍ଷଙ୍କ ସନ୍ଦେହ ହେବାରୁ ବଡ଼ଚଣା ପୁଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ବଡ଼ଚଣା ଥାନା ଅଧିକାରାଣୀ ମଧୁସ୍ମିତା ବେହେରା ପହଞ୍ଚି ରୁମ୍ ଖୋଲିବା ପରେ ଝୁଲନ୍ତା ଅବସ୍ଥାରେ ଯୁବକଙ୍କ ମୃତଦେହ ଦେଖିବାକୁ ପାଇଥିଲେ। ଯୁବକଙ୍କ ମୃତଦେହ ଉଦ୍ଧାର କରିଥିଲେ । ଏସମ୍ପର୍କରେ ଜାଣିବାକୁ ପାଇ ଘଟଣାସ୍ଥଳରେ ଯୁବକଙ୍କ ପରିବାର ଲୋକେ ପହଞ୍ଚି ବଡ଼ଚଣା ଥାନାରେ ଲିଖିତ ଅଭିଯୋଗ କରିଛନ୍ତି। ତେବେ କେଉଁ କାରଣରୁ ଯୁବକଙ୍କ ମୃତ୍ୟୁ ହୋଇଛି, ସେ ନେଇ ଘଟଣାସ୍ଥଳରେ ବଡ଼ଚଣା ପୁଲିସ ଓ ସାଇଣ୍ଟିଫିକ୍ ଟିମ୍ ତଦନ୍ତ ଚଳାଇଛି ।
