ନ୍ୟୁୟର୍କ,୩୦।୧୦: ଆମେରିକାର ହ୍ବାଇଟ୍ ହାଉସରେ ଦୀପାବଳି ଉତ୍ସବର ରହିଥାଏ ଧୁମ୍। ବାରାକ ଓବାମା, ଡୋନାଲ୍ଡୋ ଟ୍ରମ୍ପଙ୍କଠାରୁ ନେଇ ବାଇଡେନ୍ଙ୍କ ପର୍ଯ୍ୟନ୍ତ ଯିଏବି ରାଷ୍ଟ୍ରପତି ହୋଇଛନ୍ତି, ସେମାନେ ହ୍ବାଇଟ ହାଉସରେ ଦୀପାବଳି ସେଲିବ୍ରେସନ୍ କରିଥାନ୍ତି। କେବଳ ସେତିକି ନୁହେଁ ସ୍ଥାନୀୟ ସ୍ତରରେ ମଧ୍ୟ କାର୍ଯ୍ୟକ୍ରମ ଆୟୋଜିତ କରିଥାନ୍ତି। ହେଲେ ଏଥର ନ୍ୟୁୟର୍କରେ ଦୀପାବଳି ଅବସରରେ ସ୍କୁଲ ବନ୍ଦ ରହିବ। ନ୍ୟୁୟର୍କ ସିଟି ମେୟର କାର୍ଯ୍ୟାଳୟରେ ଡେପୁଟି କମିଶନର ଭାବରେ କାମ କରୁଥିବା ଦିଲ୍ଲୀପ ଚୌହାନ ଏହାର ସୂଚନା ଦେଇଛନ୍ତି। ସେ କହିଛନ୍ତି, ଚଳିତ ବର୍ଷ ଦୀପାବଳି ସ୍ପେଶାଲ ରହିଛି। ଇତିହାସରେ ପ୍ରଥମ ଥର ନ୍ୟୁୟର୍କର ସ୍କୁଲ ଦୀପାବଳି ଅବସରରେ ବନ୍ଦ ରହିବ। ସ୍କୁଲରେ ଶୁକ୍ରବାର ୧ ନଭେମ୍ବରରେ ଦୀପାବଳି ଛୁଟି ରହିବ।
ଚୌହାନ କହିଛନ୍ତି, ନ୍ୟୁୟର୍କରେ ଏଭଳି ନିଷ୍ପତ୍ତି ନେବା ସହଜ ନଥିଲା ସେଠାରେ ୧୧ ଲକ୍ଷ ଛାତ୍ର ପଢନ୍ତି। ସେ କହିଛନ୍ତି, ହିନ୍ଦୁ ସମ୍ପ୍ରଦାୟର ବହୁ ନେତାଙ୍କର କିଛି ବର୍ଷ ପୂର୍ବରୁ ହିଁ ଏହାକୁ ନେଇ ମୁଭମେଣ୍ଟ ଆରମ୍ଭ କରାଯାଇଥିଲା। ତାଙ୍କର ଦାବି ଥିଲା ଯେ, ଏଭଳି ଛୁଟି ହେବା ଦରକାର। ଏବେ ଯାଇ ଏହାକୁ ନ୍ୟୁୟର୍କ ସିଟି ମେୟାର ଏରିକ୍ ଆଡାମ୍ସ ସ୍ବୀକାର କରିଛନ୍ତି।
ଏବେ ପ୍ରଶାସନ ୧ ନଭେମ୍ବରରେ ଦୀପାବଳି ଛୁଟି ଘୋଷଣା କରିଛନ୍ତି। ଦିଲୀପ ଚୌହାନ କହିଛନ୍ତି, ହିନ୍ଦୁ ସମ୍ପ୍ରଦାୟ ପାଇଁ ଏହା ଗୁରୁତ୍ବପୂର୍ଣ୍ଣ ନିଷ୍ପତ୍ତି, କାରଣ ଦୀର୍ଘ ସମୟ ଧରି ପଡିଥିବା ଏହି ଦାବି ଉପରେ ଏଥର ମୋହର ଲାଗିଛି। ସେ କହିଛନ୍ତି, ଏପର୍ଯ୍ୟନ୍ତ ଛାତ୍ରଙ୍କୁ ଚୟନ କରିବାକୁ ପଢୁଥିଲା ଯେ, ଦୀପାବଳି ପାଳନ କରିବେ ନା ସ୍କୁଲ ଯିବେ। ଏମିତି ବି ଦୀପାବଳ ଦିନକର ନୁହେଁ ୫ ଦିନର ପର୍ବ।
