ଶୀତ ଦିନେ ଅଧିକାଂଶ ଲୋକଙ୍କ ମୁହଁ, ଓଠ ଫାଟିବା, ତ୍ବଚା ରୁକ୍ଷ ହେବା ଭଳି ସମସ୍ୟା ଦେଖାଯାଏ । ବିଶେଷକରି ଯେଉଁମାନଙ୍କ ତ୍ବଚା ରୁକ୍ଷ ବା ଡ୍ରାଏ ସ୍କିନ ସେମାନଙ୍କୁ ଅଧିକ ସମସ୍ୟା ହୁଏ । ତେବେ ଆସନ୍ତୁ ଜାଣିବା ଏପରି କିଛି ଘରୋଇ ଉପାୟ ବିଷୟରେ ଯାହାକୁ ଆପଣାଇବା ଦ୍ବାରା ନିଜର ଶୁଷ୍କ ରୁକ୍ଷ ତ୍ବଚାକୁ ନରମ ମୁଲାୟମ କରିପାରିବେ ।

ଆଲୋଭେରା: ରୁକ୍ଷ ତ୍ବଚା ପାଇଁ ମହିଳାମାନେ ଆଲୋଭେରା ବ୍ୟବହାର କରିପାରିବେ। ଡ୍ରାଏ ସ୍କିନରୁ ମୁକ୍ତି ଦେବାରେ ଏହା ଉପଯୋଗୀ । ସାଧାରଣତଃ ଶୀତ ଦିନେ ମୁହଁ ସହ ହାତଗୋଡ ମଧ୍ୟ ଶୁଷ୍କ ଲାଗିଥାଏ । ଆଲୋଭେରା ଜେଲକୁ ନିଜର ହାତଗୋଡରେ ଲଗାଇ ମୋଜା ଓ ଗ୍ଲୋଭରେ ଘୋଡାଇ ରଖିଲେ ଫାଇଦା ମିଳେ । ବିଶେଷକରି ଲୋକମାନେ ରାତିରେ ଶୋଇବା ପୂର୍ବରୁ ଏପରି କରିବାକୁ ପସନ୍ଦ କରନ୍ତି ।

ନଡିଆ ତେଲ:ଶୀତ ଦିନେ ଶୁଷ୍କ ତ୍ବଚାକୁ ନରମ ତଥା କୋମଳ କରିବା ପାଇଁ ନଡିଆ ତେଲ ବେଶ୍ ଉପଯୋଗୀ । 2014ରେ ଏକ ଅଧ୍ୟୟନରୁ ଜଣାପଡିଥିଲା ଯେ, ଶୁଷ୍କ ତ୍ବଚାର ଚିକିତ୍ସା ପାଇଁ ନଡିଆ ତେଲ ସୁରକ୍ଷିତ ଓ ପ୍ରଭାବଶାଳୀ । ଏହା ତ୍ବଚାକୁ ହାଇଡ୍ରେଟ ରଖେ । ଏଥିରେ ଥିବା ସାଚୁରେଟେଡ ଫ୍ୟାଟି ଏସିଡ ପ୍ରାକୃତିକ ମଇଶ୍ଚରାଇଜର ଭଳି କାମ କରେ । ଶୁଷ୍କ ତ୍ବଚାରେ ଥିବା ଖାଲି ଜାଗାକୁ ଭରିବା ସହ ତ୍ବଚା ନରମ କରେ ।

ପ୍ରଚୁର ପାଣି ପିଅନ୍ତୁ: ସାଧାରଣତଃ ଶୀତ ଦିନେ ଲୋକମାନେ କମ୍ ପାଣି ପିଇଥାନ୍ତି । ଶରୀରରେ ଜଳ ଅଭାବରୁ ସ୍କିନ ରୁକ୍ଷ ହୋଇଯାଏ । ତେଣୁ ଶୀତ ଦିନରେ ଅଧିକରୁ ଅଧିକ ପାଣି ପଇବା ଜରୁରୀ । ଶରୀର ହାଇଡ୍ରେଟ ରହିଲେ ତ୍ବଚା ରୁକ୍ଷ ଦେଖାଯିବ ନାହିଁ ।

ଉଷୁମ ପାଣିରେ ଗାଧାନ୍ତୁ ନାହିଁ: ସାଧାରଣତଃ ଶୀତ ଦିନେ ଲୋକମାନେ ସବୁଦିନ ଉଷୁମ ପାଣିରେ ଗାଧୋଇବା ପସନ୍ଦ କରନ୍ତି । ଏହାଦ୍ବାରା ତ୍ବଚା ଆହୁରି ଶୁଷ୍କ ହୋଇଯାଏ । ତେଣୁ ରୁକ୍ଷ ତ୍ବଚା ଥିବା ଲୋକମାନେ ଅଧିକ ଉଷୁମ ପାଣିରେ ନ ଗାଧୋଇବାକୁ ପରାମର୍ଶ ଦିଆଯାଏ ।

ମହୁ: ମହୁରେ ଔଷଧୀୟ ଗୁଣ ରହିଛି । ଏହା ବିଭିନ୍ନ ପ୍ରକାରର ଚର୍ମ/ତ୍ବଚା ସମସ୍ୟା ଦୂର କରିବାରେ ସହାୟକ ବୋଲି ରିସର୍ଚ୍ଚରୁ ଜଣାପଡେ । ତେଣୁକରି ଶୀତ ଦିନେ ଶୁଷ୍କ ତ୍ବଚାକୁ ମୁଲାୟମ ତଥା କୋମଳ କରିବାକୁ ଚାହୁଁଥିଲେ ମହୁ ଏକ ଉତ୍ତମ ଘରୋଇ ଉପଚାର । ଆପଣ ମହୁକୁ ସିଧାସଳଖ ମୁହଁରେ ଲଗାଇପାରିବେ । ଏହା ପ୍ରାକୃତିକ ହୋଇଥିବାରୁ ତ୍ବଚା ପାଇଁ ସମ୍ପୂର୍ଣ୍ଣ ସୁରକ୍ଷିତ ।