ଦୁବାଇ, ୨୩/୦୬: କାନାଡ଼ା ୧୩ତମ ଦଳ ଭାବେ ଆଗାମୀ ଆଇସିସି ପୁରୁଷ ଟି-ଟ୍ୱେଣ୍ଟି ବିଶ୍ୱକପ୍କୁ ଯୋଗ୍ୟତା ଅର୍ଜନ କରିଛି । ଚଳିତ ଆମେରିକୀୟ ଯୋଗ୍ୟତା ଟୁର୍ଣ୍ଣାମେଣ୍ଟରେ ଦଳ କ୍ରମାନ୍ୱୟରେ ପଞ୍ଚମ ବିଜୟ ସହ ବିଶ୍ୱକପ୍ ଟିକେଟ୍ ହାସଲ କରିଛି । ଆଗାମୀ ୨୦୨୬ ଟି-ଟ୍ୱେଣ୍ଟି ବିଶ୍ୱକପ୍କୁ ଭାରତ ଓ ଶ୍ରୀଲଙ୍କା ମିଳିତ ଭାବେ ଆୟୋଜନ କରିବେ ।
କାନାଡ଼ା ନବମ ଲିଗ୍ ମ୍ୟାଚ୍ରେ ବାହାମାସକୁ ୭ ୱିକେଟରେ ହରାଇଥିଲା । ବାହାମାସ ୧୯.୫ ଓଭରରେ ସମସ୍ତ ୱିକେଟ୍ ହରାଇ ୫୭ରନ୍ କରିଥିଲା । କାନାଡ଼ା ପକ୍ଷରୁ କଲିମ ସାନା ଓ ଶିବମ ଶର୍ମା ପ୍ରତ୍ୟେକ ୩ଟି ଲେଖାଏଁ ୱିକେଟ୍ ନେଇଥିବାବେଳେ ଅଂଶ ପଟେଲ ୨ଟି ୱିକେଟ୍ ହାସଲ କରିଥିଲେ । ଜବାବରେ କାନାଡ଼ା ୫.୩ ଓଭରରେ ୩ ୱିକେଟ୍ ବିନିମୟରେ ବିଜୟ ହାସଲ କରିଥିଲା । ଆସନ୍ତାକାଲି ଦଳ ଫାଇନାଲ୍ ମୁକାବିଲାରେ ବର୍ମୁଡାକୁ ଭେଟିବ । ବର୍ମୁଡା ଦଶମ ଲିଗ୍ ମ୍ୟାଚ୍ରେ କେମନ ଦଳକୁ ୯ ୱିକେଟ୍ରେ ପରାସ୍ତ କରିଥିଲା ।
ଆଗାମୀ ଟି-ଟ୍ୱେଣ୍ଟି ବିଶ୍ୱକପ୍ରେ ମୋଟ ୨୦ଟି ଦଳ ଭାଗ ନେବେ । ଆୟୋଜକ ଭାବେ ଭାରତ ଓ ଶ୍ରୀଲଙ୍କା ଏବଂ ଗତ ବିଶ୍ୱକପ୍ର ଶ୍ରେଷ୍ଠ ୭ଟି ଦଳ (ଆଫଗାନିସ୍ତାନ, ଅଷ୍ଟ୍ରେଲିଆ, ବାଂଲାଦେଶ, ଇଂଲଣ୍ଡ, ଦକ୍ଷିଣ ଆଫ୍ରିକା, ଆମେରିକା, ୱେଷ୍ଟଇଣ୍ଡିଜ) ସିଧାସଳଖ ଯୋଗ୍ୟତା ହାସଲ କରିଥିଲେ । ୨୦୨୪ ଜୁନ୍ ୩୦ ତାରିଖରେ ଘୋଷିତ ମାନ୍ୟତା ତାଲିକା ଅନୁସାରେ ଆୟର୍ଲାଣ୍ଡ, ନ୍ୟୁଜିଲାଣ୍ଡ ଓ ପାକିସ୍ତାନ ଟିକେଟ୍ ପାଇଥିଲେ ।
