ପ୍ରୟାଗରାଜ ୧୮/୦୨: ମହାକୁମ୍ଭ ଦଳାଚକଟାରେ ପ୍ରୟାଗରାଜର ଜଣେ ବ୍ୟକ୍ତିଙ୍କୁ ମୃତ ଘୋଷଣା କରାଯାଇଥିଲା । ମୃତ୍ୟୁର ତ୍ରୟୋଦଶ ଦିନର କର୍ମ ଚାଲିଥିବାବେଳେ ମୃତକ ଘରକୁ ଫେରିଆସିଲେ । ତ୍ରୟୋଦଶ କର୍ମରେ ସାମିଲ ପରିବାର ଓ ପରିଜନମାନେ ମୃତକଙ୍କୁ ଜୀବିତ ଦେଖି ବିଶ୍ୱାସ କରିପାରିଲେ ନାହିଁ । ବ୍ୟକ୍ତିଙ୍କ ନାଁ ଖୁଣ୍ଟି ଗୁରୁ । ସେ ପ୍ରୟାଗରାଜର ଜିରୋ ରୋଡ୍ ଅଞ୍ଚଳରେ ସ୍ଥିତ ଚାହଚନ୍ଦ ଗଳି ବାସିନ୍ଦା । ଗତ ଜାନୁଆରୀ ୨୯ ମୌନୀ ଅମାବାସ୍ୟା ଅବସରରେ ଘଟିଥିବା ଦଳାଚକଟାରେ ଗୁରୁଙ୍କୁ ମୃତ ଘୋଷଣା କରାଯାଇଥିଲା ।
ପ୍ରକୃତ କଥା ହେଉଛି, ସାଧୁମାନଙ୍କ ସହ ଚିଲମ ଟାଣିବାରେ ଗୁରୁ ଏତେ ମଜ୍ଜିଯାଇଥିଲେ ଯେ ସମୟ ଜାଣିପାରିଲେ ନାହିଁ । ପ୍ରାୟ ୨ ସପ୍ତାହ ପରେ ସେ ଘରେ ପହଞ୍ଚିଲେ । ଇତିମଧ୍ୟରେ ତାଙ୍କ ଆତ୍ମାର ସଦ୍ଗତି ପାଇଁ ତାଙ୍କ ପରିବାର ଓ ପଡ଼ୋଶୀ ତାଙ୍କର ଅନ୍ତିମ ସଂସ୍ଥାର ବିଧି ପାଳନ କଲେ । ଘରେ ତାଙ୍କର ତ୍ରୟୋଦଶ ଦିନର କର୍ମ ଚାଲିଥିବାବେଳେ ଗୁରୁ ଏକ ଇ-ରିକ୍ସାରେ ଆସି ଓହ୍ଲାଇଲେ । ତାଙ୍କୁ ଦେଖି ସମସ୍ତେ ହତଚକିତ ହୋଇଗଲେ । ସେ ହସ ହସ ମୁହଁରେ ପଚାରିଲେ ‘ତୁମେ ସବୁ କ’ଣ କରୁଛ?’
ସୂଚନାଯୋଗ୍ୟ, ମୌନୀ ଅମାବାସ୍ୟାରେ ସଙ୍ଗମରେ ବୁଡ଼ ପକାଇବାକୁ ଯାଉଛି କହି ଗୁରୁ ଗତ ଜାନୁଆରୀ ୨୮ ତାରିଖ ସନ୍ଧ୍ୟାରେ ଘରୁ ବାହାରିଥିଲେ । ତା’ପରଦିନ ଦଳାଚକଟା ହେଲା । ଏହା ପରେ ଗୁରୁଙ୍କର ଖୋଜ ଖବର ମିଳିଲା ନାହିଁ । ପରିବାର ତାଙ୍କୁ ମୃତ ମାନିନେଲେ । ବହୁ ଖୋଜାଖୋଜି ପରେ ବି ଗୁରୁଙ୍କ ବିଷୟରେ କିଛି ସୂଚନା ମିଳିଲା ନାହିଁ । ତେଣୁ ପରିବାର ପରମ୍ପରା ଅନୁସାରେ ତାଙ୍କର ଅନ୍ତିମ ସଂସ୍କାର ବିଧି ପାଳନ କଲେ ।
