ନୂଆଦିଲ୍ଲୀ ୧୩/୦୫: ପହଲଗାମ୍ ଆତଙ୍କବାଦୀ ଆକ୍ରମଣ ପରେ ପାକିସ୍ତାନରେ ଥିବା ଅନେକ ଆତଙ୍କୀ ଶିବିରକୁ ଧ୍ୱଂସ କରିଦେଇଛି ଭାରତ। ଗତ ମଙ୍ଗଳବାର-ବୁଧବାର ରାତିରେ ଅପରେସନ ସିନ୍ଦୂରରେ ପାକ୍ରେ ଥିବା ଲସ୍କର, ଜୈସ ଓ ହିଜବୁଲର ୯ଟି ଆଡ୍ଡା ଉପରେ ଭୟଙ୍କର ଏୟାରଷ୍ଟ୍ରାଇକ୍ ହୋଇଥିଲା । ଏହି ଆକ୍ରମଣ ଆତଙ୍କବାଦୀ ସଙ୍ଗଠନଗୁଡ଼ିକର ମୁଖିଆଙ୍କ ଅଣ୍ଟା ଭାଙ୍ଗି ଦେଇଛି । ୧୦୦ରୁ ଅଧିକ ଆତଙ୍କବାଦୀଙ୍କୁ ଭାରତ ସଫା କରିଦେଇଛି । ତଥାପି ଆତଙ୍କବାଦର ଅନ୍ତ ଘଟିଲା ବୋଲି କୁହାଯାଇ ପାରିବ ନାହିଁ । ଭାରତର ମୋଷ୍ଟ ୱାଣ୍ଟେଡ ତାଲିକାରେ ଥିବା ଆତଙ୍କବାଦୀମାନେ ଏବେ ବି ପାକିସ୍ତାନ ମାଟିରେ ନିଃଶ୍ୱାସ ମାରୁଛନ୍ତି । ପାକ୍ ସେନା ଓ ସରକାର ସେମାନଙ୍କୁ ସୁରକ୍ଷା ବଳୟରେ ରଖିଛନ୍ତି । ମୁମ୍ବାଇ ହମଲାଠାରୁ ଆରମ୍ଭ କରି ପୁଲୱାମା ଆକ୍ରମଣ ପର୍ଯ୍ୟନ୍ତ ଘଟଣାର ଦୋଷୀ ଆତଙ୍କୀମାନେ ପାକ୍ରେ ଏବେ ବି ଅଛନ୍ତି ।
ଆତଙ୍କୀ ସଂଗଠନ ଲସ୍କର-ଇ-ତଇବା ଓ ଜମାତ-ଉଦ-ଦାୱାର ମୁଖିଆ ହାଫିଜ ସଇଦ ଏବେ ପାକିସ୍ତାନରେ ଅଛି । ୨୦୦୮ ଡିସେମ୍ବର୧୦ରେ ଜାତିସଂଘ ତାକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିଥିଲା । ଭାରତରେ ଘଟିଥିବା ଅନେକ ଆତଙ୍କବାଦୀ ଆକ୍ରମଣ ପଛରେ ସେ ମାଷ୍ଟରମାଇଣ୍ଡ ରହିଆସିଛି । ୨୦୦୦ ଡିସେମ୍ବର ୨୨ର ଲାଲକିଲ୍ଲା ହମଲା, ୨୦୦୮ ଜାନୁଆରୀ ୧ର ରାମପୁର ହମଲା, ୨୦୦୮ ନଭେମ୍ବର ୨୬ର ମୁମ୍ବାଇ ଆକ୍ରମଣ, ୨୦୧୫ ଅଗଷ୍ଟ ୫ର ଜମ୍ମୁକାଶ୍ମୀରରେ ବିଏସ୍ଏଫ୍ର ଗାଡ଼ି ଉପରେ ଆକ୍ରମଣରେ ତା’ର ହାତ ରହିଛି । ୨୦୨୨ ଏପ୍ରିଲରେ ପାକିସ୍ତାନର ଅଦାଲତ ହାଫିଜ ସଇଦକୁ ୩୧ ବର୍ଷର ଜେଲଦଣ୍ଡ ଶୁଣାଇଥିଲେ । କିନ୍ତୁ କୁହାଯାଉଛି ଯେ ଫାଇନାନ୍ସିଆଲ ଆକ୍ସନ ଟାସ୍କଫୋର୍ସର ଛାଟରୁ ସୁରକ୍ଷିତ ରହିବା ପାଇଁ ପାକିସ୍ତାନ ଏଭଳି କରିଥିଲା ।
ସେହିଭଳି ଜୈସ-ଇ-ମହମ୍ମଦ ସଙ୍ଗଠନର ମୁଖ୍ୟ ମସୁଦ ଆଝାର ମଧ୍ୟ ଏବେ ପାକିସ୍ତାନରେ ଅଛି । ଅପରେସନ ସିନ୍ଦୂରରେ ତା’ର ପରିବାର ନିପାତ ହୋଇଥିଲା । ଏହି ସଙ୍ଗଠନ ଭାରତରେ ହୋଇଥିବା ଅନେକ ଆତଙ୍କବାଦୀ ଆକ୍ରମଣ ପାଇଁ ଦାୟୀ । ୨୦୧୯ ମେ ୧ରେ ଜାତିସଂଘ ମସୁଦ ଆଝାରକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିଥିଲା । ୨୦୦୧ ଅକ୍ଟୋବରରେ ଜମ୍ମୁ-କାଶ୍ମୀର ବିଧାନସଭା ପରିସରରେ ହୋଇଥିବା ହମଲା, ୨୦୦୧ ଡିସେମ୍ବରର ସଂସଦ ଆକ୍ରମଣ, ୨୦୧୬ ଜାନୁଆରୀରେ ପଠାନକୋଟ ଆକ୍ରମଣ ଜୈସ ଆତଙ୍କବାଦୀ ହିଁ କରିଥିଲେ । ୨୦୧୯ ଫେବ୍ରୁଆରୀ ୧୪ରେ ଜମ୍ମୁ-କାଶ୍ମୀରର ପୁଲୱାମାରେ ସିଆରପିଏଫ୍ର ଗାଡ଼ିଗୁଡ଼ିକ ଉପରେ ଯେଉଁ ଆକ୍ରମଣ ହୋଇଥିଲା, ସେଥିରେ ୪୦ ଯବାନ ସହିଦ ହୋଇଥିଲେ । ଏହାପରେ ଭାରତ ବାଲାକୋଟରେ ଏୟାରଷ୍ଟ୍ରାଇକ୍ କରି ଜୈସର ଆତଙ୍କୀ ଶିବିରକୁ ଉଡ଼ାଇ ଦେଇଥିଲା ।
ହାଫିଜ ସଇଦର ସହଯୋଗୀ ଜକୀ-ଉରରହମାନ ଲକ୍ଭୀ ଲସ୍କର-ଇ-ତଇବାର କମାଣ୍ଡର ଏବଂ ପ୍ରତିଷ୍ଠାତା ସଦସ୍ୟଙ୍କ ମଧ୍ୟରେ ଅନ୍ତର୍ଭୁକ୍ତ । ୨୬/୧୧ ମୁମ୍ବାଇ ଆକ୍ରମଣରେ ମଧ୍ୟ ଲକ୍ଭୀର ହାତ ଥିଲା । ୨୦୦୮ ଡିସେମ୍ବରରେ ଜାତିସଂଘ ତାକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିଥିଲା । ହାଫିଜ ସଇଦ ଲକ୍ଭୀ ମଧ୍ୟ ଲାଲକିଲ୍ଲା ଆକ୍ରମଣ, ରାମପୁର ହମଲା ଏବଂ ବିଏସ୍ଏଫ୍ର ଗାଡ଼ି ଉପରେ ହୋଇଥିବା ଆକ୍ରମଣରେ ସାମିଲ ଥିଲା । ୨୦୦୯ରେ ଲକ୍ଭୀ ବିରୋଧରେ ରେଡ୍-କର୍ଣ୍ଣର ନୋଟିସ୍ ଜାରି ହୋଇଥିଲା । ଜାତିସଂଘ ମୁତାବକ, ଲକ୍ଭୀ ପାକିସ୍ତାନର ରାଜଧାନୀ ଇସଲାମାବାଦ ଏବଂ ଓକରା ଜିଲ୍ଲାରେ ରହୁଛି ।
ଜଫର ଇକବାଲ ଓରଫ ଜମାଲଦୀନ ଜମ୍ମୁକାଶ୍ମୀରର ବାସିନ୍ଦା । କିନ୍ତୁ ଏବେ ସେ ପାକିସ୍ତାନରେ ରହୁଛି । ଜାତିସଂଘ ତାକୁ ଅନ୍ତର୍ଜାତୀୟ ଆତଙ୍କବାଦୀ ତାଲିକାରେ ସାମିଲ କରିଛି । ସେ ଲାହୋରରେ ମସଜିଦ୍ ଅଲ୍-କଦେସିଆ ପାଖରେ ରହୁଛି । ଜଫର ଇକବାଲ ଭାରତରେ ବିଶେଷକରି ଜମ୍ମୁ-କାଶ୍ମୀରରେ ଅନେକ ଆତଙ୍କବାଦୀ ଆକ୍ରମଣ କରାଇଥିଲା । ହରକତ-ଉଲ-ଜିହାଦ-ଇ-ଇସଲାମୀ ନାମକ ଆତଙ୍କବାଦୀ ସଙ୍ଗଠନର ସେ କମାଣ୍ଡର । ଭାରତରେ ଏହି ସଙ୍ଗଠନ ଉପରେ ପ୍ରତିବନ୍ଧକ ଲଗାଯାଇଛି । ହିଜବୁଲ ମୁଜାହିଦ୍ଦିନର ମୁଖ୍ୟ ସଇଦ ସଲାହୁଦ୍ଦୀନ ମଧ୍ୟ ବର୍ତ୍ତମାନ ପାକିସ୍ତାନରେ ଲୁଚିଛି । ନିକଟରେ ରାୱଲପିଣ୍ଡିରେ ଆତଙ୍କୀ ଇମ୍ତିଆଜର ଅନ୍ତିମ ସଂସ୍କାର କାର୍ଯ୍ୟକ୍ରମରେ ଦେଖିବାକୁ ମିଳିଥିଲା । ବିଗତ ଦିନରେ ଜମ୍ମୁ-କାଶ୍ମୀରର ବାସିନ୍ଦା ଆତଙ୍କୀ ବଶୀର ଅହମ୍ମଦ ପୀର୍ ଓରଫ ଇମ୍ତିଆଜ ଆଲମକୁ ଅଜଣା ଆକ୍ରମଣକାରୀମାନେ ଗୁଳିକରି ପାକିସ୍ତାନରେ ହତ୍ୟା କରିଥିଲେ । ସେ ହିଜବୁଲ ମୁଜାହିଦ୍ଦିନ ସହ ଜଡ଼ିତ ଥିଲା ।
ଅଣ୍ଡରୱାର୍ଲଡ ଡନ୍ ଦାଉଦ ଇବ୍ରାହିମ ଏବେ ପାକିସ୍ତାନରେ ରହିଛି । ଅନେକ ଦେଶରେ ଆତଙ୍କୀ ଆକ୍ରମଣ, ଆତଙ୍କବାଦ ପାଣ୍ଠି ଚାଲାଣ, ନିଶା କାରବାର ଭଳି ଅପରାଧରେ ସେ ସମ୍ପୃକ୍ତ । ୧୯୯୩ ମାର୍ଚ୍ଚରେ ଦାଉଦ ଇବ୍ରାହିମ ଓ ତା’ର ସହଯୋଗୀମାନେ ମୁମ୍ବାଇରେ ସିରିଜ ବୋମା ବିସ୍ଫୋରଣ କରିଥିଲେ । ଏଥିରେ ୨୫୭ ଲୋକ ପ୍ରାଣ ହରାଇଥିଲା ବେଳେ ୧ ହଜାରରୁ ଅଧିକ ଆହତ ହୋଇଥିଲେ । ଏହାପରେ ଦାଉଦ ଇବ୍ରାହିମ ଭାରତରୁ ପଳାୟନ କରିଥିଲା । ୨୦୦୩ରେ ଜାତିସଂଘ ତାକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିଥିଲା । କରାଚୀରେ ସେ ରହିଆସୁଛି ।
ଏହାବ୍ୟତୀତ ପାକିସ୍ତାନରେ ବିଶ୍ୱର ଅନେକ ଭୟାନକ ଆତଙ୍କବାଦୀ ଆଶ୍ରୟ ନେଇଛନ୍ତି । ତା’ଛଡ଼ା ପାକିସ୍ତାନରେ ୧୫୦ରୁ ଅଧିକ ଆତଙ୍କବାଦୀ ସଙ୍ଗଠନ ରହିଛି । ଆମେରିକାର ତତ୍କାଳୀନ ରାଷ୍ଟ୍ରପତି ଜୋ ବାଇଡେନ୍ ପାକିସ୍ତାନକୁ ବିଶ୍ୱର ସବୁଠୁ ଭୟଙ୍କର ଦେଶ ବୋଲି ବିବେଚନା କରିଥିଲେ । ଏହାକୁ ନେଇ ପାକିସ୍ତାନ ନିରାଶ ହୋଇଥିଲା । ଜାତିସଂଘ ପାକିସ୍ତାନର ୧୫୦ରୁ ଅଧିକ ଆତଙ୍କୀ ସଂଗଠନ ଓ ଆତଙ୍କୀଙ୍କୁ ଅନ୍ତର୍ଜାତୀୟ ଆତଙ୍କବାଦୀ ତାଲିକାରେ ସାମିଲ କରିଛି ।
