ନୂଆଦିଲ୍ଲୀ,୦୨/୦୨: ବିଦେଶି ମୁଦ୍ରା ଭଣ୍ଡାରରେ ଲଗାତର ୭ ସପ୍ତାହ ଧରି ଲାଗି ରହିଥିବା ହ୍ରାସରେ ଏବେ ପୂର୍ଣ୍ଣଛେଦ ପଡ଼ିଛି। ଆମେରିକୀୟ ଡଲାର ତୁଳନାରେ ଭାରତୀୟ ଟଙ୍କା ୦.୫ ପ୍ରତିଶତ ମଜବୁତ ହୋଇଛି। ୨୪ ଜାନୁଆରୀ ୨୦୨୫ରେ ଶେଷ ହୋଇଥିବା ବାଣିଜ୍ୟିକ ସପ୍ତାହ ମଧ୍ୟରେ ଆମେରିକୀୟ ଡଲାର ତୁଳନାରେ ଭାରତର ଟଙ୍କା ୦.୫ ପ୍ରତିଶତ ମଜବୁତ ହୋଇଛି। ଏହି ମଜବୁତ ହେବାର କାରଣ ବୈଦେଶିକ ମୁଦ୍ରା ଭଣ୍ଡାର ମଧ୍ୟ ୫.୫ ବିଲିୟନ ଡ଼ଲାରରେ ବୃଦ୍ଧି ପାଇଛି। ତେବେ ବୈଦେଶିକ ମୁଦ୍ରା ଭଣ୍ଡାରକୁ ନେଇ ଭାରତ ପାଇଁ ଏକ ଖୁସି ଖବର ଥିବାବେଳେ ପଡ଼ୋଶୀ ଦେଶ ପାକିସ୍ତାନ ପାଇଁ ଏକ ଖରାପ ଖବର ଅଛି। କହିରଖୁଛୁ ଯେ, ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାରରେ ହ୍ରାସ ଘଟିଛି।
ଡୋନାଲ୍ଡ ଟ୍ରମ୍ପଙ୍କ ନିଷ୍ପତ୍ତିରୁ ପଡ଼ିଲା ପ୍ରଭାବ:
ଯେତେବେଳେ ନବ ନିର୍ବାଚିତ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆମେରିକାରେ କ୍ଷମତା ଗ୍ରହଣ କଲେ, ସେ ତୁରନ୍ତ ଶୁଳ୍କ ଲାଗୁ ନକରିବାକୁ ନିଷ୍ପତ୍ତି ନେଇଥିଲେ। ଏହା ଏସୀୟ ମୁଦ୍ରାକୁ ଆଶ୍ବସ୍ତି ଦେଇଥିଲା। ଟଙ୍କାର ମଜବୁତ ହେବାର ଏହା ଅନେକ କାରଣ ମଧ୍ୟରୁ ଗୋଟିଏ। ଭାରତୀୟ ରିଜର୍ଭ ବ୍ୟାଙ୍କ ଦ୍ବାରା ପ୍ରକାଶିତ ତଥ୍ୟ ଅନୁଯାୟୀ, ୨୪ ଜାନୁୟାରୀ ୨୦୨୫ ଶେଷ ସପ୍ତାହରେ ଭାରତର ବୈଦେଶିକ ମୁଦ୍ରା ଭଣ୍ଡାର ୫.୫୭୪ ବିଲିୟନ ଡ଼ଲାରରେ ବୃଦ୍ଧି ପାଇଛି।
ପାକିସ୍ତାନର ଅବସ୍ଥା ଖରାପ:
ଗୋଟିଏ ପଟେ ଭାରତର ପକେଟ ଡଲାରରେ ପରିପୂର୍ଣ୍ଣ ଥିବାବେଳେ ପଡ଼ୋଶୀ ଦେଶ ପାକିସ୍ତାନ ଆଜିକାଲି ବୈଦେଶିକ ମୁଦ୍ରା ଭଣ୍ଡାରର ଅଭାବର ସମ୍ମୁଖୀନ ହେଉଛି। ୨୪ ଜାନୁଆରୀ ୨୦୨୫ ଶେଷ ସପ୍ତାହରେ, ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାରରେ ୧୩୭.୨ ମିଲିୟନ ଡ଼ଲାରର ଅଭାବ ରେକର୍ଡ କରାଯାଇଥିଲା। ଏହି ହ୍ରାସ ଯୋଗୁଁ ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାର ବର୍ତ୍ତମାନ ୧୬.୦୫୨ ବିଲିୟନ ଡ଼ଲାରକୁ ହ୍ରାସ ପାଇଛି।
ସୁନା ଏବଂ ଏସ୍ଡିଆର୍ରେ ମଧ୍ୟ ହୋଇଛି ବୃଦ୍ଧି:
ଭାରତର ସୁନା ଭଣ୍ଡାର ଏବଂ ବିଶେଷ ଆହରଣ ଅଧିକାର (ଏସ୍ଡିଆର) ର ବୃଦ୍ଧି ଆର୍ଥିକ ସ୍ଥିରତାକୁ ଆହୁରି ମଜବୁତ କରିଛି। କେନ୍ଦ୍ର ବଜେଟ୍ ୨୦୨୫ ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ସୁନା ଏବଂ ମୂଲ୍ୟବାନ ଧାତୁ ଉପରେ ଆମଦାନୀ ଶୁଳ୍କ ହ୍ରାସ କରିବାକୁ ପ୍ରସ୍ତାବ ଦେଇଛନ୍ତି, ଯାହା ଘରୋଇ ବଜାରରେ ସେମାନଙ୍କର ଚାହିଦା ବୃଦ୍ଧି କରିବ ବୋଲି ଆଶା କରାଯାଉଛି। ବର୍ତ୍ତମାନ ଭାରତର ସୁନା ଭଣ୍ଡାର ୮୦୦ ଟନରୁ ଅଧିକ ବୃଦ୍ଧି ପାଇଛି, ଯାହା ବିଶ୍ୱ ଅର୍ଥନୈତିକ ଅନିଶ୍ଚିତତା ମଧ୍ୟରେ ଏକ ସୁରକ୍ଷିତ ବିନିଯୋଗ ବିକଳ୍ପ ଭାବେ ଉଭା ହୋଇଛି। ଏହାରି ଭିତରେ ଏସ୍ଡିଆର୍ ମଧ୍ୟ ବୃଦ୍ଧି ପାଇଛି, ଯାହାଦ୍ୱାରା ଭାରତର ଆନ୍ତର୍ଜାତୀୟ ଆର୍ଥିକ ସ୍ଥିତି ଦୃଢ଼ ହେବ।
