ନୂଆଦିଲ୍ଲୀ,୧୦/୦୭: ଚଳିତ ବର୍ଷ ଡିସେମ୍ବରରେ ନେପାଳ ଗସ୍ତ କରିବ ଭାରତୀୟ ଦଳ। ଶୁକ୍ରବାର ନେପାଳ କ୍ରିକେଟ ଆସୋସିଏସନ୍ (CAN) ପକ୍ଷରୁ ଏକ ବିବୃତ୍ତିରେ କୁହାଯାଇଛି ଯେ,' ଚଳିତ ବର୍ଷ ଡିସେମ୍ବରରେ ୩ ମ୍ୟାଚ ବିଶିଷ୍ଟ ଟି-୨୦ ସିରିଜ ଖେଳିବା ପାଇଁ ଇଣ୍ଡିଆ-ଏ ଦଳ ନେପାଳ ଗସ୍ତ କରିବ। ନେପାଳ କ୍ରିକେଟ ଆସୋସିଏସନ୍ ଆଗାମୀ ସିରିଜର କ୍ରିଡ଼ାସୂଚୀ ବା ସେଡ୍ୟୁଲ ମଧ୍ୟ ଜାରି କରିଛି। ଏହି ଟି ୨୦ ସିରିଜ ୯ ଡିସେମ୍ବରରୁ ୧୩ ଡିସେମ୍ବର ମଧ୍ୟରେ ଖେଳାଯିବ।

ନେପାଳ କ୍ରିକେଟ ଆସୋସିଏସନ (CAN) ଅଧ୍ୟକ୍ଷ ଚତୁର ବାହାଦୁର ଚାନ୍ଦ, CAN ସଚିବ ପାରସ ଖାଡକା ଏବଂ BCCI ସଚିବ ଦେବଜିତ ସାଇକିଆଙ୍କ ମଧ୍ୟରେ ହୋଇଥିବା ବୈଠକ ପରେ ଦ୍ୱିପାକ୍ଷିକ ସିରିଜ ସମ୍ପର୍କରେ ନିଷ୍ପତ୍ତି ନିଆଯାଇଛି। କୀର୍ତ୍ତିପୁରର ତ୍ରିଭୁବନ ବିଶ୍ୱବିଦ୍ୟାଳୟରେ ଅବସ୍ଥିତ ଟିୟୁ ଆନ୍ତର୍ଜାତୀୟ କ୍ରିକେଟ ଗ୍ରାଉଣ୍ଡରେ ଉଭୟ ଦଳ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟି-୨୦ ମ୍ୟାଚ୍ ଖେଳାଯିବ।

 

୯ ଡିସେମ୍ବର - ପ୍ରଥମ ଟି୨୦

୧୧ ଡିସେମ୍ବର - ଦ୍ୱିତୀୟ ଟି୨୦

୧୩ ଡିସେମ୍ବର - ତୃତୀୟ ଟି୨୦

ଏହା ନେପାଳ ପାଇଁ ଏକ ବଡ଼ ସୁଯୋଗ ହେବ, କାରଣ ଭାରତ A ଦଳରେ ବଡ଼ ବଡ଼ ଆଇପିଏଲ୍ ତାରକା ଏବଂ ଭାରତର ବରିଷ୍ଠ କ୍ରିକେଟ ଦଳର ଅଂଶ ଥିବା ଖେଳାଳିମାନେ ସାମିଲ ଏଥିରେ ଅଛନ୍ତି। ଗତ କିଛି ବର୍ଷ ଧରି ନେପାଳ କ୍ରିକେଟ ଦଳ ଉତ୍କୃଷ୍ଟ ଫର୍ମ ପ୍ରଦର୍ଶନ କରିଛି। ନେପାଳ ପୂର୍ବ ଦୁଇଟି ଟି-୨୦ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିଥିଲା। ୨୦୨୪ ବିଶ୍ୱକପ୍ରେ ଦଳ ଗୋଟିଏ ବି ବିଜୟ ହାସଲ କରିପାରି ନ ଥିଲେ ମଧ୍ୟ, ୨୦୨୬ ସଂସ୍କରଣରେ ସେମାନେ ସେମାନଙ୍କର ପ୍ରଦର୍ଶନରେ ଉନ୍ନତି ଆଣି ସ୍କଟଲାଣ୍ଡକୁ ପରାସ୍ତ କରିଥିଲେ। ବିଶ୍ୱକପ୍ରେ ସେମାନେ ଇଂଲଣ୍ଡକୁ ପରାସ୍ତ କରିବାର ନିକଟତର ହୋଇଥିଲେ ମଧ୍ୟ ଶେଷରେ ଚାରି ରନ୍ରେ ଏକ ସଂକୀର୍ଣ୍ଣ ପରାଜୟ ବରଣ କରିଥିଲେ।

ପ୍ରମେୟ ପୃଷ୍ଠାର ପ୍ରମୁଖ ଖବର: Teamindia: ବ୍ୟାକ୍ ଟୁ ବ୍ୟାକ୍ ପରାଜୟ ଛଡାଇ ନେଇପାରେ ଅଲମ୍ପିକ୍ସ ଟିକେଟ୍, ଜାଣନ୍ତୁ କଣ କହୁଛି ହିସାବ