ନୂଆଦିଲ୍ଲୀ,୨୧/୦୪; ବ୍ୟାକ୍‌ ଟୁ ବ୍ୟାକ୍‌ ୪ଟି ମ୍ୟାଚ ହାରିବା ପରେ ୫ଥର ଚାମ୍ପିଅନ ମୁମ୍ବାଇ ଶେଷରେ ବିଜୟ  ଟ୍ରାକକୁ ଫେରିଛି । ଆଇପିଏଲ୍‌ର ୩୦ତମ ଲିଗ୍‌ ମୁକାବିଲାରେ ଦଳ ୯୯ ରନ୍‌ରେ ଘରୋଇ ଗୁଜରାଟକୁ ପରାସ୍ତ କରିଛି । ଏହି ମ୍ୟାଚରେ ପ୍ରଥମେ ବ୍ୟାଟିଂ କରି ମୁମ୍ବାଇ ତିଳକ ବର୍ମାଙ୍କ ଧୂଆଁଧାର ଶତକ ବଳରେ ୫ ୱିକେଟ୍‌ ହରାଇ ୧୯୯ ରନ ସଂଗ୍ରହ କରିଥିଲା । ଜବାବରେ ଗୁଜରାଟ ୧୫.୫ ଓଭରରେ ୧୦୦ ରନ କରି ଅଲ୍‌ ଆଉଟ୍‌ ହୋଇ ଯାଇଥିଲା । ପଏଣ୍ଟ ତାଲିକାର ଅନ୍ତିମ ସ୍ଥାନରେ ରହିଥିବା ମୁମ୍ବାଇ ଏହି ବିଜୟ ସହ ସପ୍ତମ ସ୍ଥାନକୁ ଉଠିଛି । ଅପରାଜିତ ଶତକୀୟ ଇନିଂସ୍‌ ଖେଳି ଦଳ ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିବା ତିଳକ ବର୍ମା ପ୍ଲେୟାର ଅଫ୍‌ ଦ ମ୍ୟାଚ୍‌ ବିବେଚିତ ହୋଇଥିଲେ । ୭ ଛକା, ୮ ଚୌକା ସହ ପ୍ରଥମ ଶତକ ସହ ତିଲକ ବର୍ମାଙ୍କ ଝଡ଼ରେ ଅନେକ ରେକର୍ଡ ଭାଙ୍ଗିଛି । 

ତିଳକ ଖେଳିଥିଲେ ଚିତ୍ତାକର୍ଷକ, ସ୍ମରଣୀୟ ଇନିଂସ । ସଞ୍ଜୁ ସାମସନ ଓ କ୍ୱିଣ୍ଟନ ଡି କକଙ୍କ ପରେ ତୃତୀୟ ବ୍ୟାଟର ଭାବେ ଚଳିତ ସିଜନରେ ସେ ଶତକ ଅର୍ଜନ କରିଥିଲେ । ତିଳକ ୫ନଂ ସ୍ଥାନରେ ବ୍ୟାଟିଂ କରି ୪୫ଟି ବଲ୍‌ରେ ଶତକ ପୂରଣ କରିଥିଲେ । ପ୍ରଥମ ୨୦ଟି ବଲ୍‌ରେ ସେ ସଂଗ୍ରହ କରିଥିଲେ ମାତ୍ର ୧୭ ରନ । ପରବର୍ତ୍ତୀ ୨୫ଟି ବଲ୍‌ରେ ଧୂଆଁଧାର ବ୍ୟାଟିଂ କରି ଆଉ ୮୪ ରନ ଯୋଡ଼ିଥିଲେ । ଆଇପିଏଲ୍‌ ଇତିହାସରେ ତୃତୀୟ ବ୍ୟାଟର ଭାବେ ସେ ବ୍ୟାଟିଂ କ୍ରମର ୫ନଂ କିମ୍ବା ନିମ୍ନରେ ବ୍ୟାଟିଂ କରିବାକୁ ଆସି ଶତକ ପୂରଣ କରିଥିଲେ । ତାଙ୍କ ପୂର୍ବରୁ ଜୋସ ବଟଲର ୨ଥର ଓ ୟୁସୁଫ ପଠାନ ଥରେ ଏହି ସଫଳତା ଅର୍ଜନ କରିଛନ୍ତି । ମୁମ୍ବାଇ ଇଣ୍ଡିଆନ୍ସ ଶେଷ ୬ ଓଭରରେ ୯୯ ରନ ସଂଗ୍ରହ କରିଥିଲା । ଏଥିରୁ ତିଳକ କେବଳ ୮୨ (୨୩ବଲ୍‌) ରନ କରିଥିଲେ ।