ନୂଆଦିଲ୍ଲୀ,୦୧/୦୫; ଚଳିତ ଆଇପିଏଲର ୪୩ତମ ଲିଗ୍ ମୁକାବିଲାରେ ଆଜି ରାଜସ୍ଥାନ ନିଜ ଘରୋଇ ଗ୍ରାଉଣ୍ଡରେ ଦିଲ୍ଲୀକୁ ଭେଟିବ । ଏହି ମ୍ୟାଚ ଜରିଆରେ ପଏଣ୍ଟ ତାଲିକାର ଶୀର୍ଷ ସ୍ଥାନକୁ ଫେରିବା ପାଇଁ ରାଜସ୍ଥାନ ରୟାଲ୍ସ ପ୍ରୟାସ କରିବ । ୮ଟିରୁ ୫ଟି ମ୍ୟାଚ ପରାଜିତ ହୋଇ ସାରିଥିବା ଦିଲ୍ଲୀ ପାଇଁ ଏଣିକି ବିଜୟ ଜରୁରି ହୋଇ ପଡ଼ିଥିବାରୁ ଆଜି ଏକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ । ସମସ୍ତଙ୍କ ନଜରରେ ରହିବ ବୈଭବ ସୂର୍ଯ୍ୟବଂଶୀ ଓ ମିଚେଲ ଷ୍ଟାର୍କଙ୍କ ମଧ୍ୟରେ ଲଢ଼େଇ ।
ଚଳିତ ସଂସ୍କରଣରେ ବୈଭବ ବିଶ୍ୱର ପ୍ରାୟତଃ ସବୁ ଶ୍ରେଷ୍ଠ ପେସ୍ ବୋଲରଙ୍କୁ ନିର୍ମମ ପ୍ରହାର କରିସାରିଛନ୍ତି । ଯଶପ୍ରୀତ ବୁମରା, ଜୋସ ହାଜେଲଉଡ୍, ପ୍ୟାଟ୍ କମିନ୍ସ, ମାର୍କୋ ଜାନସେନ, କାଗିସୋ ରାବାଡାଙ୍କ ଭଳି ବୋଲର ମଧ୍ୟ ବାଦ ପଡ଼ି ନାହାନ୍ତି । କେବଳ ବାକି ରହି ଯାଇଛନ୍ତି ଷ୍ଟାର୍କ । ଆହତ ଥିବାରୁ ସେ ଏପର୍ଯ୍ୟନ୍ତ କୌଣସି ମ୍ୟାଚ ଖେଳି ନଥିଲେ । ମାତ୍ର ସେ ଆଜି ଏକାଦଶରେ ସ୍ଥାନ ପାଇବେ ଓ ଗ୍ରାଉଣ୍ଡକୁ ଓହ୍ଲାଇବେ । ଷ୍ଟାର୍କଙ୍କ ଉପସ୍ଥିତି ଦିଲ୍ଲୀର ମନୋବଳ ବୃଦ୍ଧି କରିଛି । ଲୁଙ୍ଗି ଏନଗିଡ଼ି ଆହତ ହେବା ପରେ ଦଳର ବୋଲିଂ ବିଭାଗର ସନ୍ତୁଳନ ବିଗିଡ଼ି ଯାଇଥିଲା । ଅବଶ୍ୟ ଏନଗିଡି ଫିଟ୍ ହୋଇ ଅଭ୍ୟାସ ଆରମ୍ଭ କରିଛନ୍ତି । ତଥାପି ସେ ଆଜି ଖେଳିବେ ନାହିଁ । ନିୟମ ଅନୁଯାୟୀ ମୁଣ୍ଡରେ ଆଘାତ ଲାଗିଲେ ଉକ୍ତ ଖେଳାଳିଙ୍କୁ ଅତି କମରେ ଏକ ସପ୍ତାହ ବିଶ୍ରାମ ଦିଆଯିବ । ଏନଗିଡ଼ି ଗତ ୨୫ ତାରିଖରେ ଆହତ ହୋଇଥିଲେ । ଆଜି ବୈଭବ ଓ ଯଶସ୍ୱୀ ଜୈସ୍ୱାଲଙ୍କ ପାଇଁ ଦିଲ୍ଲୀକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ପଡ଼ିବ । ଉଭୟ ୪୫୧ ରନ୍ ଓପନିଂ ଭାଗିଦାରୀ ଗଠନ କରିସାରିଛନ୍ତି । ବୈଭବ ଇତି ମଧ୍ୟରେ ୨୭ଟି ଟି-ଟ୍ୱେଣ୍ଟି ମ୍ୟାଚରେ ବ୍ୟାଟିଂ କରି ୯୯ଟି ଛକା ମାରି ସାରିଛନ୍ତି । ଆଜି ସେ ଶତକ କ୍ଲବରେ ସାମିଲ ହେବେ ।
ଏହା ବି ପଢନ୍ତୁ...ବେଙ୍ଗାଲୁରୁକୁ ୪ୱିକେଟରେ ହରାଇଲା ଗୁଜୁରାଟ ଟାଇଟାନ୍ସ
ରାଜସ୍ଥାନକୁ ହରାଇବାକୁ ହେଲେ ଦିଲ୍ଲୀକୁ ବୋଲିଂ ବିଭାଗରେ ଉନ୍ନତି ଆଣିବାକୁ ହେବ । ଦିଲ୍ଲୀ ୮ଟି ମ୍ୟାଚରୁ ମାତ୍ର ୩୬ଟି ୱିକେଟ୍ ଅକ୍ତିଆର କରିଛି । ଆଜିର ମ୍ୟାଚ ପାଇଁ ପ୍ରସ୍ତୁତ କରାଯାଇଥିବା ପିଚ୍ ବ୍ୟାଟିଂ ପାଇଁ ଅନୁକୂଳ । ଏହି ପିଚ୍ରେ ପୂର୍ବରୁ ଖେଳାଯାଇଥିବା ୩ଟି ମ୍ୟାଚରେ ପ୍ରଥମେ ବ୍ୟାଟିଂ କରିଥିବା ଦଳ ଯଥାକ୍ରମେ ୩/୧୯୬, ୨/୨୧୭ ଓ ୮/୨୦୬ ରନ ସଂଗ୍ରହ କରିଥିଲେ । ଆଜି ମଧ୍ୟ ବିଶାଳ ସ୍କୋର ସଂଗୃହୀତ ହେବା ଆଶା କରାଯାଉଛି । ତେବେ ରାତ୍ରିରେ ମ୍ୟାଚ ଖେଳାଯାଉଥିବାରୁ ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି ।
ସମ୍ଭାବ୍ୟ ଦଳ
ରାଜସ୍ଥାନ: ଯଶସ୍ୱୀ ଜୈସ୍ୱାଲ୍, ବୈଭବ ସୂର୍ଯ୍ୟବଂଶୀ, ଧ୍ରୁବ ଜୁରେଲ, ରିୟାନ ପରାଗ (ଅଧିନାୟକ), ଡୋନୋଭାନ ଫେରେରା, ଶୁଭମ ଦୁବେ, ଡାସୁନ ଶଣକା, ରବିନ୍ଦ୍ର ଜାଡ଼େଜା, ଜୋଫ୍ରା ଆର୍ଚର, ନାନ୍ଦ୍ରେ ବର୍ଗର, ବ୍ରିଜେଶ ଶର୍ମା, ୟଶରାଜ ପୁଞ୍ଜା ।
ଦିଲ୍ଲୀ: କେଏଲ ରାହୁଲ, ସାହିଲ ପରଖ, ନୀତିଶ ରାଣା, ସମୀର ରିଜଭୀ, ଟ୍ରିଷ୍ଟନ ଷ୍ଟବ୍ସ, ଡେଭିଡ୍ ମିଲର, ବିପ୍ରଜ ନିଗମ, ଅକ୍ଷର ପଟେଲ (ଅଧିନାୟକ), ମିଚେଲ ଷ୍ଟାର୍କ, କୁଲଦୀପ ଯାଦବ, ଦୁଷ୍ମନ୍ତ ଚାମୀରା, ଟି ନଟରାଜନ ।
