ନୂଆଦିଲ୍ଲୀ: ଟ୍ରମ୍ପ ପ୍ରଶାସନର ଦାବିକୁ ପ୍ରତ୍ୟାଖ୍ୟାନ କରିଛି ଇରାନ୍, ଯେଉଁଥିରେ କୁହାଯାଇଥିଲା ଯେ, ତେହେରାନ ଏବଂ ୱାଶିଂଟନ ମଧ୍ୟରେ ଯୁଦ୍ଧବିରତି ଆଲୋଚନା ଚାଲିଛି। ପାକିସ୍ତାନରେ ଇରାନୀ ରାଷ୍ଟ୍ରଦୂତ ରେଜା ଅମରି ମୋଘଦମ କହିଛନ୍ତି ଯେ, ଆମେରିକା-ଇରାନ ଆଲୋଚନା ହେବ ନାହିଁ। ଏହା ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟପ୍ରାଚ୍ୟ ଯୁଦ୍ଧରେ ବିଜୟ ଦାବି କରି କହିଥିଲେ ଯେ, ଇରାନ କେବେବି ପରମାଣୁ ଅସ୍ତ୍ର ରଖିବା ନାହିଁ ବୋଲି ରାଜି ହୋଇଛି ଏବଂ ହର୍ମୁଜ ପ୍ରଣାଳୀ ସହିତ ଜଡିତ ଏକ ଗୁରୁତ୍ୱପୂର୍ଣ୍ଣ ଉପହାର ପଠାଇଛି।
ଆମେରିକା ଧୋଖା ଦେଇ ଯୁଦ୍ଧ ଆରମ୍ଭ କରିଛି: ଇରାନ
IRNA ନ୍ୟୁଜ୍ ଅନୁଯାୟୀ, ପାକିସ୍ତାନରେ ଇରାନୀ ରାଷ୍ଟ୍ରଦୂତ କହିଛନ୍ତି ଯେ, ଆଲୋଚନା ସମୟରେ ଆମେରିକା ବିଶ୍ୱାସଘାତକ ଭାବରେ ଆକ୍ରମଣ କରିଥିବାରୁ ଯୁଦ୍ଧ ଆରମ୍ଭ ହୋଇଥିଲା। ଜାତିସଂଘରେ ଇସ୍ରାଏଲୀ ରାଷ୍ଟ୍ରଦୂତ ଡାନି ଡାନନ୍ ଇରାନ, ଆମେରିକା ଏବଂ ଇସ୍ରାଏଲ ମଧ୍ୟରେ ସମ୍ଭାବ୍ୟ ଶାନ୍ତି ଆଲୋଚନା ବିଷୟରେ କୌଣସି ସୂଚନାକୁ ଅସ୍ୱୀକାର କରିଛନ୍ତି। ସେ କହିଛନ୍ତି ଯେ, ଇସ୍ରାଏଲର ଲକ୍ଷ୍ୟ ହେଉଛି ପରମାଣୁ ଅସ୍ତ୍ର ହାସଲ କରିବାରୁ ଇରାନକୁ ରୋକିବା।
ଇରାନ ଉପରେ ଆକ୍ରମଣ ଜାରି ରହିବ : ଇସ୍ରାଏଲ
ସେ କହିଛନ୍ତି, "ଇସ୍ରାଏଲ ଏବଂ ଆମେରିକା ବର୍ତ୍ତମାନ ଇରାନରେ ସାମରିକ ଘାଟି ଗୁଡ଼ିକୁ ଟାର୍ଗେଟ କରୁଛନ୍ତି। ଆମେ ଏପରି ଆକ୍ରମଣ ଜାରି ରଖିବୁ।" ଆମେ ନିଶ୍ଚିତ କରିବୁ ଯେ ଇରାନର ପରମାଣୁ କ୍ଷମତା କିମ୍ବା ବାଲିଷ୍ଟିକ୍ କ୍ଷେପଣାସ୍ତ୍ର ନାହିଁ। ଆମେ ଇରାନୀ ସରକାରଙ୍କୁ ଦୁର୍ବଳ କରିଦେଇଛୁ। ସମସ୍ତେ ବୁଝିବା ଉଚିତ ଯେ ଏହି ଅଞ୍ଚଳରେ କିଏ ସ୍ଥିରତା ଆଣୁଛି ଏବଂ କିଏ ଅଶାନ୍ତି ବିସ୍ତାର କରୁଛି।
ଆମେରିକାର କୂଟନୈତିକ ପ୍ରୟାସ ଏକ ପ୍ରହସନ: ଇରାନ
ଇରାନର ଜଣେ ବରିଷ୍ଠ ସାମରିକ ଅଧିକାରୀ ବର୍ତମାନର ଆମେରିକାର କୂଟନୈତିକ ପ୍ରୟାସକୁ ଏକ ପ୍ରହସନ ବୋଲି କହିଛନ୍ତି। ସେ ଦାବି କରିଛନ୍ତି ଯେ, ଆମେରିକା ପୂର୍ବରୁ ଯେଉଁ ବିଶ୍ୱ ପ୍ରଭାବ ଉପଭୋଗ କରୁଥିଲା ତାହା ଏବେ ଶେଷ ହୋଇଯାଇଛି। ଇରାନର ସରକାରୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଖାମାତ ଅଲ-ଆନବିୟା କେନ୍ଦ୍ରୀୟ ମୁଖ୍ୟାଳୟର ମୁଖପାତ୍ର କହିଛନ୍ତି, "ଆମେରିକାର ରଣନୈତିକ ଶକ୍ତି ଏହାର ରଣନୈତିକ ପରାଜୟରେ ପରିଣତ ହୋଇଛି। ଯଦି ବିଶ୍ୱର ଆତ୍ମଘୋଷିତ ମହାଶକ୍ତି ଏହି ସଙ୍କଟକୁ ଏଡାଇ ପାରିଥାନ୍ତା, ତେବେ ଏହା ବର୍ତ୍ତମାନ ସୁଦ୍ଧା କରି ସାରିଥାନ୍ତା। ସେମାନେ ସେମାନଙ୍କର ପରାଜୟକୁ ଏକ ବୁଝମଣା ବୋଲି କହୁଛନ୍ତି।"
