ତେଲ୍ଅଭିଭ୍/ବେରୁଟ୍,୨୮/୧୧: ପ୍ରାୟ ୧୩ ମାସ ଧରି ଲେବାନନ୍ରେ ଇରାନ ସମର୍ଥିତ ହିଜ୍ବୁଲ୍ଲା ଆତଙ୍କୀ ଗୋଷ୍ଠୀ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧରେ ବିରାମ ଲାଗିଛି । ଆମେରିକା ରାଷ୍ଟ୍ରପତି ଜୋ ବାଇଡେନ୍ ଯୁଦ୍ଧବିରତି ନେଇ ଘୋଷଣା କରିଛନ୍ତି । ଫ୍ରାନ୍ସ ମଧ୍ୟ ଆମେରିକା ସହ ମିଶି ଯୁଦ୍ଧବିରତି ବାବଦରେ ସଂଯୁକ୍ତ ବୟାନ ଜାରି କରିଥିଲା । ୬୦ ଦିନର ଯୁଦ୍ଧବିରତିକୁ ମଙ୍ଗଳବାର ବିଳମ୍ବିତ ରାତିରେ ଇସ୍ରାଏଲ ୱାର କ୍ୟାବିନେଟ ମଧ୍ୟ ମଞ୍ଜୁରି ଦେଇଥିଲା । ଏହାର କିଛି ସମୟ ପରେ ଉତ୍ତର ଲେବାନନ୍ରୁ ପଳାୟନ କରିଥିବା ଲେବାନନ୍ବାସୀ ନିଜ ଘର ମୁହାଁ ହୋଇଛନ୍ତି ।
ଗତ ସେପ୍ଟେମ୍ବର ୨୩ରେ ଇସ୍ରାଏଲର ଘାତକ ମିସାଇଲ ମାଡ଼ ପରେ ହଜାର ହଜାର ସଂଖ୍ୟାରେ ପରିବାର ଘର ଛାଡ଼ି ଦକ୍ଷିଣ ଲେବାନନ୍କୁ ଶରଣ ନେବାକୁ ପଳାୟନ କରିଥିଲେ । ବୁଧବାର ସକାଳୁ ସକାଳୁ ସେମାନେ ବାଇକ୍ ଏବଂ ଅନ୍ୟ ଗାଡ଼ିରେ ଜିନିଷପତ୍ର ଧରି ନିଜ ନିଜ ସହରକୁ ଫେରିଛନ୍ତି । ସେମାନଙ୍କ ହାତରେ ହିଜ୍ବୁଲ୍ଲା ପତାକା ଏବଂ ନିପାତ ହିଜ୍ବୁଲ୍ଲା ନେତା ନସରଲ୍ଲାହ ଫଟୋ ଥିବା ଦେଖିବାକୁ ମିଳିଛି । ଅନେକଙ୍କ ଘର ମିସାଇଲ ମାଡ଼ରେ ଧ୍ୱଂସସ୍ତୂପ ପାଲଟିଥିବାବେଳେ ସେମାନେ ସେଠାରେ ନିଜ ନିଜ ଜିନିଷ ପତ୍ର ଖୋଜିବାରେ ଲାଗିଛନ୍ତି ।
ଯୁଦ୍ଧବିରତି ସର୍ତ୍ତ ଅନୁସାରେ, ଇସ୍ରାଏଲ ଏବଂ ହିଜ୍ବୁଲ୍ଲା ମଧ୍ୟରେ ସ୍ଥାୟୀ ଭାବେ ଏହି ଯୁଦ୍ଧବିରତି ହୋଇଛି । ଏହା ଅନୁସାରେ ୬୦ ଦିନ ଭିତରେ ହିଜବୁଲ୍ଲା ନିଜ ଲଢ଼ୁଆ ଏବଂ ଅସ୍ତ୍ରଶସ୍ତ୍ରକୁ ବ୍ଲୁ ଲାଇନ୍ ମଧ୍ୟରୁ ହଟାଇବ । ବ୍ଲୁ ଲାଇନ ହେଉଛି ଇସ୍ରାଏଲ ଏବଂ ଲେବାନନ୍ ଭିତରେ ଥିବା ଅନୌପଚାରିକ ସୀମା । ଏହି ଅଞ୍ଚଳରେ ହିଜ୍ବୁଲ୍ଲା ବଦଳରେ ଲେବାନନ ସୈନିକ ମୁତୟନ ହେବେ । ହିଜ୍ବୁଲ୍ଲା ଯେପରି ସେଠାରେ କୌଣସି ପ୍ରକାର ଢାଞ୍ଚା ବା ଭିତ୍ତିଭୂମି ନିର୍ମାଣ କରି ନ ପାରେ ତାହା ଲେବାନନ୍ ସେନା ସୁନିଶ୍ଚିତ କରିବ ଏବଂ ସେଠାରୁ ହିଜ୍ବୁଲ୍ଲାର ସମସ୍ତ ଢାଞ୍ଚାକୁ ହଟାଯିବ ।
ସେହିପରି ୬୦ ଦିନ ଭିତରେ ଇସ୍ରାଏଲ ଧୀରେ ଧୀରେ ସେଠାରୁ ସେନା ପ୍ରତ୍ୟାହାର କରିବ । ସାଧାରଣ ଲୋକେ ଯେପରି ସେମାନଙ୍କ ଘରକୁ ସୁରକ୍ଷିତ ଭାବେ ଫେରନ୍ତି ତାହା ଉଭୟ ପକ୍ଷ ସୁନିଶ୍ଚିତ କରିବେ ବୋଲି ବାଇଡେନ୍ କହିଛନ୍ତି । ଲେବାନନ୍ ସେନା ଦକ୍ଷିଣରେ ୫ ହଜାର ସୈନିକ ମୁତୟନ କରିବ । ତେବେ ଯୁଦ୍ଧବିରତି ପରେ ଏହି ସୈନିକଙ୍କ ଭୂମିକା କ’ଣ ରହିବ ତାହା ଜଣାଯାଇନାହିଁ । ଆବଶ୍ୟକ ପଡ଼ିଲେ ଲେବାନନ୍ ସୈନ୍ୟ ହିଜ୍ବୁଲ୍ଲା ଲଢ଼ୁଆଙ୍କ ସହ ଲଢ଼ିବେ କି ନା ତାହା ମଧ୍ୟ ସ୍ପଷ୍ଟ ହୋଇନାହିଁ । ଅପରପକ୍ଷେ ହିଜ୍ବୁଲ୍ଲା ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରତିକୁ ଭାରତ ସ୍ୱାଗତ କରିଛି । ଉତ୍ତେଜନା ଏବଂ ସଂଘର୍ଷ ହ୍ରାସ କରିବା, ସଂଯମତା ବଜାୟ ରଖି କୂଟନୈତିକ ଉପାୟରେ ସମସ୍ୟା ସମାଧାନ କରିବା ସପକ୍ଷରେ ଭାରତ ସର୍ବଦା ରହିଛି ।
ଯୁଦ୍ଧବିରତି ଦ୍ୱାରା ସେହି ଅଞ୍ଚଳରେ ଏବେ ଶାନ୍ତି ଫେରିବା ଆଶା ଥିବା ବିଦେଶ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ତେବେ ଇରାନ୍ ଉପରେ ଧ୍ୟାନ କେନ୍ଦ୍ରୀଭୂତ କରିବା, ଥକ୍କି ଯାଇଥିବା ସୈନିକଙ୍କୁ ବିଶ୍ରାମ ଦେବା ଏବଂ ହମାସ୍କୁ ଏକଘରକିଆ କରିବା ଉଦ୍ଦେଶ୍ୟରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଯୁଦ୍ଧବିରତିକୁ ମଞ୍ଜୁରି ଦେଇଥିବା କୁହାଯାଇଛି ।
ପ୍ରକାଶଥାଉ କି, ୨୦୨୩ ଅକ୍ଟୋବର ୭ରେ ଇସ୍ରାଏଲ ଉପରେ ହମାସ୍ ଆକ୍ରମଣ କରିବା ପରେ ଇସ୍ରାଏଲ ଗାଜାରେ ପାଲଟା ଆକ୍ରମଣ ଆରମ୍ଭ କରିଥିଲା । ହମାସ୍ ସପକ୍ଷରେ ବାହାରି ହିଜ୍ବୁଲ୍ଲା ଇସ୍ରାଏଲ ଉପରକୁ ଲେବାନନ୍ ପଟୁ ଘନ ଘନ ଆକ୍ରମଣ କରିଥିଲା । ତେଣୁ ଇସ୍ରାଏଲ ମଧ୍ୟ ଏହାର ଜବାବ ଦେଇଥିଲା । ଲେବାନନ୍ରେ ଇସ୍ରାଏଲ ଆକ୍ରମଣରେ ଅଦ୍ୟାବଧି ୩,୭୬୮ ଜଣଙ୍କ ମୃତ୍ୟୁ ହୋଇଛି । ପ୍ରାୟ ୯ ଲକ୍ଷ ଲୋକ ଘରଦ୍ୱାର ଛାଡ଼ି ପଳାୟନ କରିଥିଲେ ।
