ନୂଆଦିଲ୍ଲୀ: ଇସ୍ରାଏଲର ପ୍ରତିରକ୍ଷା ମନ୍ତ୍ରୀ କାଟଜେ କହିଛନ୍ତି ଯେ,ସେ ଗ୍ରେଟା ଥନବର୍ଗ ଏବଂ ଅନ୍ୟ କର୍ମୀଙ୍କୁ ଗାଜା ପଟ୍ଟି ପର୍ଯ୍ୟନ୍ତ ପହଞ୍ଚିବାକୁ ଦେବେ ନାହିଁ। ଏହି ସମସ୍ତ କର୍ମୀ ମାଡେଲାଇନ୍ ନାମକ ଏକ ସହାୟତା ଜାହାଜରେ ଅଛନ୍ତି, ଯାହା ଗାଜାର ସମୁଦ୍ର ଅବରୋଧ ଭାଙ୍ଗି ମାନବିକ ସହାୟତା ଯୋଗାଇବାକୁ ଚେଷ୍ଟା କରୁଛି।
ଗ୍ରେଟା ଥନବର୍ଗ ହେଉଛନ୍ତି ଜଣେ ଜଣାଶୁଣା ପରିବେଶ କର୍ମୀ। ସେ ୧୨ ଜଣ ଅନ୍ୟ କର୍ମୀଙ୍କ ସହିତ ଏହି ମିଶନରେ ବାହାରିଛନ୍ତି। ଜାହାଜଟି ଗତ ରବିବାର ଇଟାଲୀର ସିସିଲିଆନ୍ ଉପକୂଳରୁ ଛାଡିଥିଲା। ଏହି ମିଶନର ଉଦ୍ଦେଶ୍ୟ ହେଉଛି ଗାଜାରେ ବଢ଼ୁଥିବା ମାନବିକ ସଙ୍କଟ ପ୍ରତି ବିଶ୍ୱର ଦୃଷ୍ଟି ଆକର୍ଷଣ କରିବା।
ତେବେ ଏହି ଜାହାଜରେ ଅଛନ୍ତି ଫରାସୀ ସଂସଦ ସଦସ୍ୟ ରୀମା ହାସନ, ଯିଏକି ଜଣେ ପାଲେଷ୍ଟାଇନୀ ବଂଶୋଦ୍ଭବ। ଇସ୍ରାଏଲ ପାଲେଷ୍ଟାଇନ ନୀତିକୁ ବିରୋଧ କରିଥିବାରୁ ସେମାନଙ୍କୁ ପୂର୍ବରୁ ଇସ୍ରାଏଲରେ ପ୍ରବେଶ କରିବାକୁ ବାରଣ କରାଯାଇଛି। ଇସ୍ରାଏଲୀ ମନ୍ତ୍ରୀ କହିଛନ୍ତି ଯେ ଗାଜା ଅବରୋଧ ହମାସକୁ ଅସ୍ତ୍ରଶସ୍ତ୍ର ଯୋଗାଣ ବନ୍ଦ କରିବା ପାଇଁ କରାଯାଇଛି। ସେ ସ୍ପଷ୍ଟ କରିଛନ୍ତି ଯେ ଯଦି କେହି ସେହି ଅବରୋଧ ଭାଙ୍ଗିବାକୁ ଚେଷ୍ଟା କରନ୍ତି, ତେବେ ତାଙ୍କୁ ଅଟକାଯିବ।
ସୂଚନାଥାଉକି, ମେ ମାସ ପୂର୍ବରୁ, ସମାନ ସଂଗଠନର ଅନ୍ୟ ଏକ ଜାହାଜକୁ ସମୁଦ୍ରରେ ଡ୍ରୋନ୍ ଆକ୍ରମଣର ସମ୍ମୁଖୀନ ହେବାକୁ ପଡିଥିଲା, ଯେଉଁଥିରେ ଜାହାଜର ସମ୍ମୁଖ ଅଂଶ କ୍ଷତିଗ୍ରସ୍ତ ହୋଇଥିଲା। କାର୍ଯ୍ୟକର୍ତ୍ତା ମାନେ ଏହି ଆକ୍ରମଣ ପାଇଁ ଇସ୍ରାଏଲକୁ ଦାୟୀ କରିଥିଲେ। ଯଦିଓ ଇସ୍ରାଏଲ ସମ୍ପ୍ରତି ଗାଜାକୁ କିଛି ମୌଳିକ ସହାୟତା ଯିବାକୁ ଅନୁମତି ଦେଇଛି, ରିଲିଫ୍ କର୍ମୀମାନେ ଚେତାବନୀ ଦେଇଛନ୍ତି ଯେ ଯଦି ଯୁଦ୍ଧ ଏବଂ ଅବରୋଧ ଶୀଘ୍ର ସମାପ୍ତ ନ ହୁଏ,ତେବେ ସେଠାରେ ଦୁର୍ଭିକ୍ଷ ପରିସ୍ଥିତି ସୃଷ୍ଟି ହୋଇପାରେ।
