ଭୁବନେଶ୍ୱର,୩୧/୧୦ : ଚାକିରୀରୁ ବାହାର କରିଦେଲେ ବୋଲି ପ୍ରତିଶୋଧ ନେବାକୁ ଯୋଜନା କଲେ । ଗ୍ୟାଙ୍ଗସ ଅଫ ଗଞ୍ଜାମର ୫କୁଖ୍ୟାତ ଅପରାଧୀଙ୍କ ସହାୟତାରେ ଏକ କେମିକାଲ ଫାକ୍ଟ୍ରିରେ ଧସେଇ ପଶିଲେ । ଆଉ ବନ୍ଧୁକ ମୁନରେ ଡରେଇ ଅଢେଇ ଲକ୍ଷ ଲୁଟିନେଲେ । ପୁରୁଣା ରାଗ ସୁଝାଇବାକୁ ଦୁଇ ଡ୍ରାଇଭରଙ୍କ ଡକାୟତିର ପର୍ଦ୍ଦାଫାଶ ହେଇଛି ।
ଜୋନ ୫ଏସପି ବିଶ୍ବରଂଜନ ସେନାପତି କହିଛନ୍ତି, ରାଜଧାନୀରେ ଯେତେବେଳେ ଚାଲିଥିଲା ଦଶହରା ଭସାଣି ସେତେବେଳେ ଆଇଆରସି ଭିଲେଜ ଏନ୪/୧୮୪ର ଫର୍ଟିଜ୍ କେମିକାଲ ପ୍ରାଇଭେଟ୍ ଲିମିଟେଡ଼ ଅଫିସରେ ଏହି ଡକାୟତି ହେଇଥିଲା । ନୟାପଲ୍ଲୀ ଥାନା ପୁଲିସ ୨ ଡ୍ରାଇଭରଙ୍କ ସମେତ ୭ଜଣଙ୍କୁ ଗିରଫ କରିଛି । ପାଖାପାଖି ୧ମାସ ବ୍ୟବଧାନ ପରେ ଉଭୟ ସ୍ପେଶଲ ସ୍କ୍ୱାର୍ଡ଼ ଏବଂ ନୟାପଲ୍ଲୀ ଥାନା ଏହି ଡକାୟତି ଗ୍ୟାଙ୍ଗକୁ କାବୁ କରିଛନ୍ତି । ଅଭିଯୁକ୍ତମାନେ ହେଲେ ସାଗର କୁମାର ସାହୁ, ହର୍ସା ରାଉତ, ବିପିନ ବେହେରା, କାଳୁ ଚରଣ ପ୍ରଧାନ, ନିରଞ୍ଜନ ନନ୍ଦ, ରାଜେନ୍ଦ୍ର ରାଉତ, ରମାକାନ୍ତ ପାତ୍ର । ଜଣେ ଫେରାର ଅଭିଯୁକ୍ତକୁ ଧରିବାକୁ ପୁଲିସ ଚଢଉ ଜାରି ରଖିଛି ।
