ନୂଆଦିଲ୍ଲୀ: ତାମିଲନାଡୁର ଭେଲୋର ଜିଲ୍ଲାର ଅନାଇକାଟୁ ବ୍ଲକରେ ଥିବା କାଟୁକୋଲାଇ ଗାଁରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ସେଠାକାର ସ୍ଥାନୀୟ ବାସିନ୍ଦାମାନେ ତାଙ୍କ ଜାଗା ଉପରେ ତାମିଲନାଡୁ ଓ୍ଵାକଫ୍ ବୋର୍ଡର ମାଲିକାନା ଦାବିକୁ ବିରୋଧ କରି ବିକ୍ଷୋଭ ପ୍ରଦର୍ଶନ କରିଛନ୍ତି। ଗାଁବାସୀମାନେ ଦାବି କରୁଛନ୍ତି ଯେ ସେମାନଙ୍କ ପୂର୍ବଜମାନେ ଦୀର୍ଘ ବର୍ଷ ଧରି ଏହି ଜାଗାରେ ଚାଷ କରିଆସୁଛନ୍ତି ଏବଂ ସେମାନଙ୍କ ପାଖରେ ଜାଗାର ପଟ୍ଟା ଓ ଅନ୍ୟାନ୍ୟ ସମସ୍ତ ଦଲିଲ ମଧ୍ୟ ରହିଛି। ହେଲେ ଓ୍ଵାକଫ୍ ବୋର୍ଡ ଏହି ଜାଗାକୁ ନିଜ ସମ୍ପତ୍ତି ବୋଲି ଦାବି କରୁଛି। ଯାହା ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି।
ଏପ୍ରିଲ ୧୪, ୨୦୨୫ରେ କାଟୁକୋଲାଇ ଗାଁରେ ଶତାଧିକ ଗ୍ରାମବାସୀ ଏକତ୍ରିତ ହୋଇ ଓ୍ଵାକଫ୍ ବୋର୍ଡର ଏହି ଦାବି ବିରୋଧରେ ସ୍ଵର ଉତ୍ତୋଳନ କରିଥିଲେ। ସେମାନେ ସ୍ଥାନୀୟ ପ୍ରଶାସନକୁ ଜାଗା ମାଲିକାନା ସମସ୍ୟାର ସମାଧାନ ପାଇଁ ହସ୍ତକ୍ଷେପ କରିବାକୁ ଅନୁରୋଧ କରିଛନ୍ତି। ବିକ୍ଷୋଭକାରୀମାନେ କହିଛନ୍ତି ଯେ ଓ୍ଵାକଫ୍ ବୋର୍ଡର ଦାବି ଅନୁଯାୟୀ ସେମାନେ ଜାଗା ବିକ୍ରି କିମ୍ବା ଅନ୍ୟ କୌଣସି କାରବାର ପାଇଁ ‘ନୋ ଅବଜେକ୍ସନ ସାର୍ଟିଫିକେଟ୍’ (ଏନଓସି) ନେବାକୁ ପଡିବ, ଯାହା ସେମାନଙ୍କ ଅଧିକାରକୁ କ୍ଷୁର୍ଣ୍ଣ କରୁଛି।
ଗାଁର ବାସିନ୍ଦାମାନେ କହୁଛନ୍ତି ଯେ ସେମାନଙ୍କ ଜାଗା ସହିତ ଜଡିତ ସମସ୍ତ ଦଲିଲ ସେମାନଙ୍କ ପାଖରେ ଅଛି। ଯେଉଁଥିରେ ଓ୍ଵାକଫ୍ ବୋର୍ଡର ମାଲିକାନ ନେଇ କୌଣସି ଦାବି ନାହିଁ। ସେମାନେ ଏହା ମଧ୍ୟ ଅଭିଯୋଗ କରିଛନ୍ତି ଯେ ଏହି ଦାବି ସେମାନଙ୍କ ଜୀବନଜୀବିକା ଓ ଅଧିକାର ଉପରେ ଆଘାତ ପହଞ୍ଚାଉଛି। କାରଣ ଗାଁର ଅନେକ ପରିବାର ଏହି ଜାଗା ଉପରେ ଚାଷବାସ କରି ଜୀବନ ନିର୍ବାହ କରୁଛନ୍ତି।
ଓ୍ଵାକଫ୍ ବୋର୍ଡ ପକ୍ଷରୁ କୁହାଯାଇଛି ଯେ ସେମାନଙ୍କ ପାଖରେ ଜାଗାର ମାଲିକାନା ସମ୍ବନ୍ଧୀୟ ଦଲିଲ ରହିଛି। ତେବେ ଏହି ଦାବିକୁ ସମର୍ଥନ କରୁଥିବା ଭଳି କିଛି ସ୍ପଷ୍ଟ ପ୍ରମାଣ ସାର୍ବଜନୀନ ଭାବେ ଉପସ୍ଥାପନ କରାଯାଇନାହିଁ, ଯାହା ବିବାଦକୁ ଆହୁରି ଜଟିଳ କରିଛି।
ସ୍ଥାନୀୟ ପ୍ରଶାସନ ଏହି ବିବାଦରେ ହସ୍ତକ୍ଷେପ କରି ଗାଁବାସୀ ଓ ଓ୍ଵାକଫ୍ ବୋର୍ଡ ମଧ୍ୟରେ ଶାନ୍ତିପୂର୍ଣ୍ଣ ଆଲୋଚନା ପାଇଁ ଚେଷ୍ଟା କରୁଛି। ଗ୍ରାମବାସୀମାନେ ସରକାରଙ୍କୁ ଏକ ତଦନ୍ତ କମିଟି ଗଠନ କରି ଜାଗାର ମାଲିକାନା ସମ୍ବନ୍ଧୀୟ ସତ୍ୟତା ଯାଞ୍ଚ କରିବାକୁ ଦାବି କରିଛନ୍ତି।
ଏହି ଘଟଣା ତାମିଲନାଡୁରେ ଓ୍ଵାକଫ୍ ବୋର୍ଡ ସମ୍ବନ୍ଧୀୟ ଜାଗା ବିବାଦର ଏକ ନୂଆ ଅଧ୍ୟାୟ ସୃଷ୍ଟି କରିଛି। ଗ୍ରାମବାସୀମାନେ ନିଜ ଅଧିକାର ରକ୍ଷା ପାଇଁ ସଂଘର୍ଷ ଜାରି ରଖିଛନ୍ତି। ତେବେ ଏହି ସମସ୍ୟାର ସମାଧାନ ପାଇଁ ସରକାରୀ ହସ୍ତକ୍ଷେପ ଏବଂ ସ୍ପଷ୍ଟ ଦଲିଲ ଉପସ୍ଥାପନ ଅପରିହାର୍ଯ୍ୟ ହୋଇପଡିଛି।
