ଗୁଜରାଟ ୦୮/୦୧: ଫ୍ୟାଶନ୍ ଇଣ୍ଡଷ୍ଟ୍ରିରେ ଷ୍ଟାଇଲ୍ ଓ ଟେକ୍ନୋଲୋଜିରେ ନୂଆ ଟ୍ରେଣ୍ଡ୍ ଭାବେ ହାଇ-ଟେକ୍ ଚଷମା ବଜାରକୁ ଆସିଛି । ଜଣେ ବ୍ୟକ୍ତି ଏଭଳି ଏକ ଚଷମା ପିନ୍ଧି ଅଯୋଧ୍ୟା ରାମ ମନ୍ଦିର ଭିତରକୁ ଯାଇଥିବାରୁ ତାଙ୍କୁ ଗିରଫ କରାଯାଇଛି । ଏହି ସ୍ମାର୍ଟ ମେଟା ରେ-ବ୍ୟାନ୍ ଚଷମାରେ ଅନେକ ବୈଶିଷ୍ଟ୍ୟଯୁକ୍ତ ଏକ ଚିପ୍ ଲାଗିଛି, ଯାହା ସାଧାରଣ ଚଷମାଠୁ ଭିନ୍ନ । ଚଷମାର ପ୍ରତ୍ୟେକ ଲେନ୍ସର ଧାରରେ ୧୨-ମେଗାପିକ୍ସେଲର ଅଲ୍ଟ୍ରା-ୱାଇଡ୍ କ୍ୟାମେରା ଲାଗିଛି, ଯାହା ସୁନ୍ଦର ଫଟୋ ଓ ଭିଡିଓ ରେକର୍ଡ କରିପାରେ । ୟୁଜର୍ ଏହା ଜରିଆରେ ୬୦ ସେକେଣ୍ଡ୍ ପର୍ଯ୍ୟନ୍ତ ୧୦୮୦ପି ଭିଡିଓ ରେକର୍ଡ କରିପାରିବେ ଏବଂ ଏଆଇ ଓ ଭଏସ୍ କମାଣ୍ଡ ମାଧ୍ୟମରେ ତାକୁ ନିଜର ସମ୍ପର୍କୀୟଙ୍କୁ ଶେୟାର କରିପାରିବେ ।
ଗୁଜରାଟର ବଡୋଦରା ବାସିନ୍ଦା ଜୟକୁମାର ନାମକ ଜଣେ ଯୁବକ ପିନ୍ଧିଥିବା ଏହି ଚଷମାରେ ସଂଲଗ୍ନ ଗୁପ୍ତ କ୍ୟାମେରା ଜରିଆରେ ଅଯୋଧ୍ୟା ରାମ ମନ୍ଦିର ଭିତରର ଫଟୋ ଉଠାଇବାକୁ ଚେଷ୍ଟା କରୁଥିଲେ । ମନ୍ଦିରର ସୁରକ୍ଷା ବ୍ୟବସ୍ଥା ଉଲ୍ଲଂଘନ ପାଇଁ କର୍ତ୍ତୃପକ୍ଷ ତାଙ୍କୁ ଗିରଫ କଲେ । ଜୟକୁମାର ଏହି ଗୁପ୍ତ କ୍ୟାମେରାରେ ଅନୌପଚାରିକ ଭାବେ ମନ୍ଦିର ଗର୍ଭଗୃହର ଫଟୋ ଉଠାଇବାକୁ ଯୋଜନା କରୁଥିଲେ । ରାମ ମନ୍ଦିରର ସୁରକ୍ଷା ଓ ଗୋପନୀୟତା ଦୃଷ୍ଟିରୁ ମନ୍ଦିର ଭିତରକୁ ମୋବାଇଲ ଫୋନ୍ ଓ କ୍ୟାମେରା ଉପରେ କଟକଣା ଲାଗୁ ହୋଇଛି । ଅତ୍ୟାଧୁନିକ ଟେକ୍ନୋଲୋଜିଯୁକ୍ତ ଏହି ଚଷମାରେ ଓପନ୍-ଇୟର ଅଡିଓ ସିଷ୍ଟମ୍ ରହିଛି । ଆଖପାଖ ଲୋକଙ୍କୁ ହଇରାଣ ନ କରି ଫୋନ୍ କଲ୍ର ସୁବିଧା ଏହା ପ୍ରଦାନ କରେ । ସ୍ପଷ୍ଟ ଭଏସ୍ କମାଣ୍ଡ୍ ଓ ରେକର୍ଡିଂ ପାଇଁ ୫-ମାଇକ୍ରୋଫୋନ୍ ସିଷ୍ଟମ୍ ରହିଛି । ସ୍ପର୍ଶ-ରହିତ ଭଏସ୍ ଓ ଟଚ୍ କଣ୍ଟ୍ରୋଲ ସୁବିଧା ଏହା ପ୍ରଦାନ କରେ, ଯାହା ମାଧ୍ୟମରେ ୟୁଜର୍ ଫୋନ୍ କଲ୍ କରିପାରିବେ । ମେସେଜ୍ ମଧ୍ୟ ପଠାଇପାରିବେ । ଫୋନ୍ ନ ଧରି ବିଭିନ୍ନ ଫିଚର୍କୁ ନିୟନ୍ତ୍ରଣ କରିପାରିବେ । ସିଧାପ୍ରସାରଣ ସୁବିଧା ଯୋଗୁ ୟୁଜର୍ ସେହି ସମୟର ଅନୁଭବକୁ ଶେୟାର କରିପାରିବେ ।
