ମୁମ୍ବାଇ,୧୮/୦୧: ବମ୍ବେ ହାଇକୋର୍ଟଙ୍କ ନାଗପୁରସ୍ଥିତ ଖଣ୍ଡପୀଠ ବୁଧବାର ଜଣେ ମହିଳାଙ୍କୁ ଆତ୍ମହତ୍ୟା ଲାଗି ଉସ୍କାଇବା ମାମଲାରେ ରାୟ ଶୁଣାଇଥିଲେ । କୋର୍ଟ କହିଥିଲେ, ବିବାହ ପାଇଁ ମନା କରିବା ଆତ୍ମହତ୍ୟାକୁ ପ୍ରୋତ୍ସାହିତ କରିବା ନୁହେଁ । ପୁରୁଷଜଣକ ସଂପର୍କକୁ ଶେଷ କରିଦେବା ପରେ ମହିଳା ଆତ୍ମହତ୍ୟା କରିଥିବା କାରଣରୁ କେବଳ ବ୍ୟକ୍ତିଙ୍କ ବିରୋଧରେ ଆତ୍ମହତ୍ୟା ଲାଗି ଉସ୍କାଇବା ମାମଲା ରୁଜୁ ହୋଇପାରିବ ନାହିଁ । ଏଥିସହିତ ଜଷ୍ଟିସ୍ ଉର୍ମିଳା ଯୋଶୀ- ଫାଲ୍କେ ଜଣେ ୨୬ ବର୍ଷୀୟ ଯୁବକଙ୍କୁ ମୁକ୍ତ କରି ଦେଇଛନ୍ତି । ତାଙ୍କ ବିରୋଧରେ ଜଣେ ମହିଳାଙ୍କୁ ଆତ୍ମହତ୍ୟା ଲାଗି ଉସ୍କାଇବାର ମାମଲା ରୁଜୁ ହୋଇଥିଲା । ସେହି ମହିଳାଙ୍କ ସହିତ ସେ ୯ ବର୍ଷ ଧରି ପ୍ରେମ ସଂପର୍କରେ ଥିଲେ । ବୁଲଧାନା ଜିଲ୍ଲାର ଖାମଗାଓଁ ସେସନ୍ସ କୋର୍ଟ ତାଙ୍କୁ ଏହି ମାମଲାରେ ମୁକ୍ତ ନ କରିବାରୁ ସେ ସେସନ୍ସ କୋର୍ଟଙ୍କ ରାୟକୁ ହାଇକୋର୍ଟରେ ଚାଲେଞ୍ଜ କରିଥିଲେ ।
ବିଚାରପତି ଜଷ୍ଟିସ୍ ଉର୍ମିଳା ଯୋଶୀ ଫାଲ୍କେଙ୍କ ଅନୁସାରେ, ଅଭିଯୁକ୍ତ ମୃତକଙ୍କୁ ଆତ୍ମହତ୍ୟା ଲାଗି ପ୍ରୋତ୍ସାହିତ କରିବା ସଂପର୍କରେ ତଦନ୍ତରେ କେଉଁଠି ଉଲ୍ଲେଖ ନାହିଁ । ବରଂ ବ୍ରେକ୍ଅପ୍ ପରେ ବି ଉଭୟଙ୍କ ମଧ୍ୟରେ କଥାବର୍ତ୍ତା ଜାରି ଥିବାର ପ୍ରମାଣ ରହିଛି । ଯଦି ଅଭିଯୁକ୍ତ ତାଙ୍କୁ ବିବାହ ଲାଗି ମନା କରିଦେଇଥିଲେ ତେବେ ଏହା ମହିଳାଙ୍କୁ ଆତ୍ମହତ୍ୟା ଲାଗି ଉସ୍କାଇବା କିମ୍ବା ସେଥିସହ ସମାନ ହେବନାହିଁ । ସେହିପରି ମହିଳାଙ୍କର ସୁଇସାଇଡ୍ ନୋଟ୍ କିମ୍ବା ହ୍ୱାଟସଆପ୍ ଚାଟ୍ରୁ ଅଭିଯୁକ୍ତ ତାଙ୍କୁ ବିବାହ ପ୍ରତିଶ୍ରୁତି ଦେଇ ଶାରିରୀକ ସଂପର୍କ ରକ୍ଷା କରିବା ଓ ପରେ ସେମାନଙ୍କର ସଂପର୍କ ଭାଙ୍ଗିଥିବା ଜଣାପଡୁନାହିଁ । ମହିଳା ମଧ୍ୟ ବ୍ରେକ୍ଅପ୍ର ତୁରନ୍ତ ପରେ ଆତ୍ମହତ୍ୟା କରିନଥିଲେ । ଉଭୟଙ୍କ ମଧ୍ୟରେ ଜୁଲାଇ ୨୦୨୦ରେ ବ୍ରେକଅପ୍ ହୋଇଥିବାବେଳେ ମହିଳା ସେହିବର୍ଷ ଡିସେମ୍ବର ୩ରେ ଆତ୍ମହତ୍ୟା କରିଥିଲେ । ଏହାର ଅର୍ଥ ବ୍ରେକଅପ୍ ଓ ସୁଇସାଇଡ୍ ମଧ୍ୟରେ କୌଣସି ସଂପର୍କ ନାହିଁ । ଏଥିସହିତ ହାଇକୋର୍ଟ ସେସନ୍ସ କୋର୍ଟଙ୍କ ରାୟକୁ ରଦ୍ଦ କରିଦେଇଛନ୍ତି।
