ନୂଆଦିଲ୍ଲୀ, ୦୭/୦୫ : ଭାରତର ଏୟାରଷ୍ଟ୍ରାଇକ୍ରେ କୁଖ୍ୟାତ ଆତଙ୍କବାଦୀ ମାସୁଦ ଅଜହର୍ର ପରିବାର ନିପାତ। ଅଜହର୍ ପରିବାରର ୧୦ରୁ ଉର୍ଦ୍ଧ୍ଵ ସଦସ୍ୟଙ୍କ ମୃତ୍ୟୁ ହୋଇଛି। ଜୈଶ-ଏ-ମହମ୍ମଦ ପକ୍ଷରୁ ଏନେଇ ସୂଚନା ଦିଆଯାଇଛି। ଏହି ଆକ୍ରମଣରେ ଅଜହର୍କୁ ଶକ୍ତ ଧକ୍କା ଲାଗିଛି। ଭଲ ହୋଇଥାନ୍ତା ଯଦି ମୁଁ ମରି ଯାଇଥାନ୍ତି ବୋଲି କୁଆଡ଼େ ଅଜହର୍ କହିଥିବା ଜାତୀୟ ଗଣମାଧ୍ୟମରୁ ସୂଚନା ମିଳୁଛି।
ସୂଚନାନୁଯାୟୀ, ପାକିସ୍ତାନର ବହାବଲପୁର ସ୍ଥିତ ଜୈଶ-ଏ-ମହମ୍ମଦର ପ୍ରମୁଖ ଆଡ୍ଡା ମରକଜ ସୁଭାନ ଆଲହା ଉପରେ ଭାରତୀୟ ସେନା ଏୟାର ଷ୍ଟ୍ରାଇକ୍ କରିଥିଲା। ଏଥିରେ ଅଜହର୍ର ପତ୍ନୀ, ପୁଅ, ବଡ଼ ଭଉଣୀ, ଭିଣୋଇ ସମେତ ୧୦ ଜଣଙ୍କର ମୃତ୍ୟୁ ହୋଇଛି। ଆଜି ସେମାନଙ୍କୁ କବର ଦିଆଯିବ ବୋଲି ସୂଚନା ମିଳିଛି। ଭାରତର ଏୟାରଷ୍ଟ୍ରାଇକ୍ ବେଳେ ଏମାନେ ମରକଜ ପରିସରରେ ଥିଲେ।
ସୂଚନା ଥାଉକି, ପଲଗାମ୍ ଆଟାକ୍ର ପ୍ରତିଶୋଧ ଭାରତ ନେଇଛି। ମଙ୍ଗଳବାର ବିଳମ୍ବିତ ରାତିରେ ପାକିସ୍ତାର ୯ ଆତଙ୍କୀ ଠିକଣାରେ ବାୟୁସେନା ଏୟାରଷ୍ଟ୍ରାଇକ୍ କରିଛି। ଏଥିରେ ଆତଙ୍କୀ ଶିବିର ଛାରଖାର୍ ହୋଇଯାଇଛି। ଜୈଶ-ଏ-ମହମ୍ମଦ ଏବଂ ଲଶ୍କର-ଏ-ତୋଏବାର ଟ୍ରେନିଂ କ୍ୟାମ୍ପ ଧ୍ଵସ୍ତ ହୋଇଯାଇଛି। ୯୦ ରୁ ଉର୍ଦ୍ଧ୍ଵ ଆତଙ୍କୀ ନିପାତ ହୋଇଥିବା ସୂଚନା ମିଳିଛି।
ଏହି ଖବରଟିକୁ ପଢନ୍ତୁ-Operation Sindoor: ଅର୍ଦ୍ଧ ସାମରିକ ବାହିନୀର ଛୁଟି ରଦ୍ଦ, ଆଲର୍ଟରେ ଗୃହ ମନ୍ତ୍ରାଳୟ
