ଜୟପୁର,୧୧/୦୯: କୋରାପୁଟ ଜିଲ୍ଲା ଜୟପୁର ସହର ସ୍ଥାନୀୟ ମାଛବନ୍ଧସାହିର ଶ୍ୟାମସୁନ୍ଦର ପରଜା(୩୫) । ଶିକ୍ଷାଗତ ଯୋଗ୍ୟତା ମାତ୍ର ଦ୍ୱିତୀୟ ଶ୍ରେଣୀ । ଅଧିକ ପାଠ ପଢିନଥିଲେ ବି ମନରେ ରହିଛି ଦୃଢ ଆତ୍ମବିଶ୍ୱାସ । ମୋବାଇଲ ମରାମତି କାମକୁ ପେସା ଭାବେ ଗ୍ରହଣ କରିଛନ୍ତି । ମାସକୁ ରୋଜଗାର କରୁଛନ୍ତି ୨୦ ହଜାରରୁ ଅଧିକ ଟଙ୍କା । ଦୋକାନଟିଏ ଖୋଲି ନିଜେ ମୋବାଇଲ୍ ମରାମତି କରିବା ସହ ଅନ୍ୟ ବେକାର ଯୁବକଙ୍କୁ ପ୍ରଶିକ୍ଷଣ ଦେଉଛନ୍ତି । ଦକ୍ଷତା ହାସଲ କରିବାକୁ ହେଲେ ଶିକ୍ଷାଗତ ଯୋଗ୍ୟତାର ଆବଶ୍ୟକତା ନାହିଁ । ଭଲ ଗୁରୁ ମିଳିଗଲେ ଯେକୌଣସି କାମ ସହଜରେ କରିହେବ ବୋଲି କହିଛନ୍ତି ଶ୍ୟାମସୁନ୍ଦର ।
ଶ୍ୟାମସୁନ୍ଦର କହିଛନ୍ତି, ବିକ୍ରମନଗର ପ୍ରାଥମିକ ବିଦ୍ୟାଳୟରେ ଦ୍ୱିତୀୟ ଯାଏଁ ପାଠ ପଢିଥିଲେ । ଆଗ୍ରହ ନଥିବାରୁ ପାଠ ଛାଡିଦେଇଥିଲେ । ବେକାର ହୋଇ ବୁଲାବୁଲି କରୁଥିଲେ । ତାଙ୍କୁ ୧୫ ବର୍ଷ ହୋଇଥିବା ବେଳେ ରଜାନଅର ନିକଟରେ ନୂଆରେ ମୋବାଇଲ ବିକ୍ରି ଓ ମରାମତି ଦୋକାନ ଖୋଲିଥିଲା । ଏହାର ମାଲିକ ଥିଲେ ମୁନା ଭାଇନା । ସେ ମୋବାଇଲ ମରାମତି ପ୍ରଶିକ୍ଷକ ଥିଲେ । ତାଙ୍କ ଦୋକାନରେ ପ୍ରଥମେ ମାସକୁ ୩ ହଜାର ଟଙ୍କାରେ କାମ କରୁଥିଲେ । ଅନ୍ୟମାନଙ୍କୁ ମୁନା ମୋବାଇଲ ମରାମତି କାମ ଶିଖାଉଥିବା ବେଳେ ଧ୍ୟାନରେ ଦେଖୁଥିଲେ । ଏହା ପରେ ଆସ୍ତେ ଆସ୍ତେ ଦୋକାନ କାମ ସହ ମୋବାଇଲ ମରାମତି କାମ ଶିଖିବା ଆରମ୍ଭ କରିଥିଲେ । ମରାମତି କାମ ଭଲ ଭାବରେ ଶିଖିବାକୁ ପ୍ରାୟ ତିନିବର୍ଷ ଲାଗିଥିଲା । ତାଙ୍କ ଦୋକାନରେ ହିଁ ଗ୍ରାହକଙ୍କ ମୋବାଇଲ ମରାମତି କରିବାକୁ ସୁଯୋଗ ମିଳିଥିଲା ।
ଗତ ୪ ବର୍ଷ ହେଲା ଲାଲ୍ ସାହିରେ ନିଜ ଦୋକାନ ଖୋଲିଛନ୍ତି । ଏଠାରେ ମୋବାଇଲ ମରାମତି ଓ ପାର୍ଟସ୍ ବିକ୍ରି କରୁଛନ୍ତି । ଦିନକୁ ଦିନ ଟେକ୍ନୋଲୋଜି ବଦଳୁଛି । ନୂଆନୂଆ ମୋବାଇଲ ବଜାରକୁ ଆସୁଛି । ଏହାକୁ ଦେଖି ନିଜକୁ ଅପଡେଟ୍ କରିବାକୁ ପଡୁଛି । କାମ ଶିଖିଥିବାରୁ ଅପଡେଟ ହେବାକୁ ଅସୁବିଧା ହେଉନି। ସାନ ଦୁଇଭାଇଙ୍କୁ ମଧ୍ୟ ମୋବାଇଲ ମରାମତି ଶିଖାଇଛନ୍ତି । ସେମାନଙ୍କ ମଧ୍ୟରୁ ଜଣେ ଏକ ମୋବାଇଲ କମ୍ପାନିରେ ମେକାନିକ ଭାବେ କାମ କରୁଛନ୍ତି । ଶ୍ୟାମସୁନ୍ଦର ଆହୁରି କହିଛନ୍ତି ଯେ ମୋବାଇଲ ମରାମତି ଶିଖିବା କଷ୍ଟ କାମ ନୁହେଁ । ଏଥିଲାଗି ନିଜର ଆତ୍ମବିଶ୍ୱାସ ଓ ଏକାଗ୍ରତା ରହିବା ଦରକାର । ପ୍ରଶିକ୍ଷକଙ୍କ ପରାମର୍ଶ ଗ୍ରହଣ କଲେ ହିଁ ଜଣେ ଭଲ ମୋବାଇଲ ମେକାନିକ ହୋଇପାରିବ ।
