ଆଠଗଡ଼,୦୪/୦୪: ବୁଣାକାରଙ୍କ ଅଗୋଚରରେ ଅଢ଼େଇ କୋଟିର ଘୋଟାଲା । ଭୂତ ହିତାଧିକାରୀଙ୍କ ଆକାଉଣ୍ଟ୍କୁ ଯାଇଛି ଲକ୍ଷ ଲକ୍ଷ ଟଙ୍କା । କେନ୍ଦ୍ର ସରକାରଙ୍କ ଅଣୁ କ୍ଷୁଦ୍ର ଓ ମଧ୍ୟମ ଶିଳ୍ପ ବିଭାଗ ଅଧୀନରେ ସ୍ଫୁର୍ତି (ଏସ୍ଏଫ୍ୟୁଆର୍ଆଇଟି) କ୍ଲଷ୍ଟର୍ ଯୋଜନାରେ ଏହି ହରିଲୁଟ୍ ହୋଇ ଥିବା ଆଠଗଡ଼ ଉପଜିଲ୍ଲାପାଳଙ୍କ ନିକଟରେ ଅଭିଯୋଗ ହୋଇଛି ।
ସୂଚନା ମୁତାବକ, ଗତ ୨୦୦୬-୦୭ ମସିହାରେ ବଡ଼ମ୍ବା ବ୍ଲକ ଅଧୀନ ମାଣିଆବନ୍ଧରେ କେନ୍ଦ୍ର ସରକାରଙ୍କ ବୟନଶିଳ୍ପ ମନ୍ତ୍ରାଳୟ ପକ୍ଷରୁ ମାଣିଆବନ୍ଧ ହ୍ୟାଣ୍ଡ୍ଲୁମ୍ ପ୍ରତିଷ୍ଠା କରାଯାଇଥିଲା । କିନ୍ତୁ ୨୦୨୧ ମସିହାରେ ଅଣୁ କ୍ଷୁଦ୍ର ଓ ମଧ୍ୟମ ଶିଳ୍ପ ଉଦ୍ୟୋଗ ମନ୍ତ୍ରାଳୟ ପକ୍ଷରୁ ବୁଣାକାରମାନଙ୍କ ଅଗୋଚରରେ ମାଣିଆବନ୍ଧ ହ୍ୟାଣ୍ଡ୍ଲୁମ୍ କ୍ଲଷ୍ଟର୍ ନାମରେ ଏହା କାର୍ଯ୍ୟକାରୀ ହେଉଥିବା ଜଣାପଡ଼ିଛି । ଏହି କ୍ଲଷ୍ଟର୍ଟି ସୋସାଇଟି ଆକ୍ଟ ଅନୁସାରେ ପଞ୍ଜିକୃତ ହୋଇଥିବା ଜଣାପଡ଼ିଛି । ବଡ଼ମ୍ବା ତହସିଲ କିରିକିଚା, ମହୁଲିଆ ମୌଜା ଖାତା ନଂ. ୨୯୫/୨୭୨ ପ୍ଲଟ ନଂ. ୧୬୨୮, ୧୮୩୦, ୧୮୮୧ର ୧୬ ଡେସିମିଲି ବା ୬୯୬୮ ବର୍ଗଫୁଟ ଜାଗାକୁ ୨୦୨୧ ମସିହାରୁ ୨୦୩୬ ମସିହା ପର୍ଯ୍ୟନ୍ତ ସୋସାଇଟି ବା ସ୍ଫୁର୍ତି ନାମରେ ଲିଜ୍ ଦିଆଯାଇଛି । ତେବେ ଏହାର ମ୍ୟାନେଜିଂ ଟ୍ରଷ୍ଟି ଏବଂ ତାଙ୍କ ସ୍ୱାମୀ ମାଣିଆବନ୍ଧ ବୁଣାକାର ସମବାୟ ସମିତିର ସମ୍ପାଦକ ତଥା ଲିଜ୍ ଜମିର ମାଲିକ ଏହି ଚୁକ୍ତି ଖିଲାପ କରି ଉକ୍ତ ଜମିକୁ ଅନ୍ୟତ୍ର ବିକ୍ରି କରିଥିବା ଅଭିଯୋଗ ହୋଇଛି । ଏଥିସହିତ ଚଞ୍ଚକତା କରି ଭୂତ ହିତାଧିକାରୀଙ୍କ ନାଁରେ ୨ କୋଟି ୫୪ ଲକ୍ଷ ଟଙ୍କା ହରିଲୁଟ୍ କରିଥିବା ଅଭିଯୋଗ ହୋଇଛି ।
ବାହାରୁ କପଡ଼ା କିଣି ଦରଜୀଙ୍କ ପାଖରେ ସିଲେଇ କରି ଏହାକୁ ହସ୍ତତନ୍ତ କହି ସୋସାଇଟି ନାମରେ ବୟନିକାକୁ ବିକ୍ରି କରୁଥିବା ଅଭିଯୋଗ ହୋଇଛି । ସୂଚନା ଅଧିକାର ଆଇନ ବଳରେ ତଥ୍ୟ ସାମ୍ନାକୁ ଆସିବା ପରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏନେଇ ଉଚ୍ଚସ୍ତରୀୟ ତଦନ୍ତ ସହିତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମାଣିଆବନ୍ଧର ବଟକୃଷ୍ଣ ପ୍ରଧାନ, ଶକ୍ତି ପ୍ରସାଦ ସାହୁ, ଅଶୋକ ସ୍ୱାଇଁ, ରବୀନ୍ଦ୍ର ନାୟକ, କାଳନ୍ଦୀ ନାୟକ ପ୍ରମୁଖ ଆଠଗଡ଼ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମାଙ୍କୁ ଦାବିପତ୍ର ପ୍ରଦାନ କରାଯାଇଛି । ସେପଟେ ଆସିଷ୍ଟାଣ୍ଟ ଡ଼ାଇରେକ୍ଟର ଟେକ୍ସଟାଇଲ କହିଛନ୍ତି, ଏ ନେଇ ତଦନ୍ତ ଚାଲିଛି ରିପୋର୍ଟ ଆସିବା ପରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ।
