ମୁମ୍ବାଇ ୦୭/୦୩: ଏକ ଚେକ୍ ବାଉନ୍ସ ମାମଲାରେ ଚଳଚ୍ଚିତ୍ର ନିର୍ମାତା ରାମ ଗୋପାଳ ବର୍ମାଙ୍କୁ ବଡ଼ ଝଟକା ଲାଗିଛି । ତାଙ୍କ ବିରୋଧରେ ଜାମିନ ବିହୀନ ପରୱାନା (ଏନ୍ବିଡବ୍ଲ୍ୟୁ) ଜାରି ହୋଇଛି । ମୁମ୍ବାଇର ଏକ ସେସନ୍ସ କୋର୍ଟ ମଙ୍ଗଳବାର ଏହି ଏନ୍ବିଡବ୍ଲ୍ୟୁ ଜାରି କରିଛନ୍ତି । ବର୍ମା ଜାମିନ ପାଇଁ ଆବେଦନ କରିଥିଲେ । ତତ୍ସହିତ ଜେଲ ଦଣ୍ଡାଦେଶ ଉପରେ ରହିତାଦେଶ ନିମନ୍ତେ ଅନୁରୋଧ କରିଥିଲେ । ଅଦାଲତ ଏହାକୁ ଖାରଜ କରିଦେଇଛନ୍ତି ।
୨୦୧୮ର ଚେକ୍ ବାଉନ୍ସ ମାମଲାରେ ଜଣେ ମାଜିଷ୍ଟ୍ରେଟ୍ ବର୍ମାଙ୍କୁ ୩ ମାସ ଜେଲ ଦଣ୍ଡାଦେଶ ଦେଇଛନ୍ତି । ଏଥିସହ ଅଭିଯୋଗକାରୀଙ୍କୁ ୩ ମାସ ମଧ୍ୟରେ ୩,୭୨,୨୧୯ ଟଙ୍କା ପରିଶୋଧ ଲାଗି ନିର୍ଦ୍ଦେଶ ଦେଇଛନ୍ତି । ମଙ୍ଗଳବାର ଅତିରିକ୍ତ ସେସନ୍ସ ବିଚାରପତି ଏ ଏ କୁଲକର୍ଣ୍ଣୀ ତାଙ୍କ ବିରୋଧରେ ଏନ୍ବିଡବ୍ଲ୍ୟୁ ଜାରି କରିବା ସହ ତାଙ୍କୁ ଜାମିନ ଓ ଜେଲ ଦଣ୍ଡାଦେଶ ଉପରେ ରହିତାଦେଶ ଲାଗି କୋର୍ଟରେ ଦ୍ୱାରସ୍ଥ ହେବା ପାଇଁ ସ୍ୱାଧୀନତା ବି ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଜୁଲାଇ ୨୭ରେ ହେବ ।
ଏହା ପୂର୍ବରୁ ଉକ୍ତ ମାମଲାରେ ଅନେ୍ଧରିର ଏକ ମାଜିଷ୍ଟ୍ରେଟ୍ କୋର୍ଟ ନିକଟରେ ବର୍ମାଙ୍କୁ ଦୋଷୀ ସାବ୍ୟସ୍ତ କରିବା ସହ ୩ ମାସ ଜେଲ ଦଣ୍ଡାଦେଶ ପ୍ରଦାନ କରିଥିଲେ । ଜାନୁଆରୀ ୨୧ରେ ମାଜିଷ୍ଟ୍ରେଟ୍ ୱାଇ ପି ପୂଜାରୀ ତାଙ୍କୁ ଦୋଷୀ ସାବ୍ୟସ୍ତ କରିବା ବେଳେ ସେ ଉପସ୍ଥିତ ନ ଥିଲେ । ତେଣୁ ତାଙ୍କ ଆତ୍ମସମର୍ପଣକୁ ସୁନିଶ୍ଚିତ କରିବା ସକାଶେ ଏନ୍ବିଡବ୍ଲ୍ୟୁ ଜାରି କରିଥିଲେ । ଏହାପରେ ବର୍ମା ମାଜିଷ୍ଟ୍ରେଟ୍ଙ୍କ ଆଦେଶ ବିରୋଧରେ ଦିଣ୍ଡୋସି ସେସନ୍ସ କୋର୍ଟ ଯାଇଥିଲେ । ଫେବ୍ରୁଆରୀ ୧୩ରେ ସେସନ୍ସ କୋର୍ଟ ଜବାବ ମାଗିବା ସହ ମାମଲାର ପରବର୍ତ୍ତୀ ଶୁଣାଣି ମାର୍ଚ୍ଚ ୪କୁ ଧାର୍ଯ୍ୟ କରିଥିଲେ । ୨୦୧୮ ଜାନୁଆରୀ ୧ ତାରିଖର ୨.୩୮ ଲକ୍ଷ ଟଙ୍କାର ଏକ ଚେକ୍ ବାଉନ୍ସ ହେବା ଯୋଗୁ ତାଙ୍କ ବିରୋଧରେ ମାମଲା ହୋଇଥିଲା । କିନ୍ତୁ ଉକ୍ତ ଚେକ୍ ତାଙ୍କ ଦ୍ୱାରା ଜାରି ହୋଇ ନ ଥିଲା ବୋଲି ବର୍ମା ଦାବି କରିଥିଲେ ।
