ନୂଆଦିଲ୍ଲୀ,୨୭ା୧(ଏଜେନ୍ସି): ୧୩,୫୦୦ କୋଟି ଟଙ୍କାର ପିଏନ୍‌ବି ସ୍କାମ୍‌ ମାମଲାର ମୁଖ୍ୟ ଅଭିଯୁକ୍ତ ନିରବ ମୋଦି ଏବଂ ତାଙ୍କ ମାମୁ ମେହୁଲ୍‌ ଚୋକ୍‌ସିଙ୍କୁ ଭାରତ ଅଣାଯିବ । ମୋଦି ସରକାର ଏହାକୁ ବାସ୍ତବ ରୂପ ଦେବା ପାଇଁ ଅଣ୍ଟା ଭିଡ଼ିଛନ୍ତି । ଏହି ଅଭିଯୁକ୍ତଦ୍ୱୟଙ୍କୁ ଭାରତ ଆଣିବା ପାଇଁ ଏୟାର ଇଣ୍ଡିଆ ବିମାନ ବ୍ୟବହାର କରାଯିବ ବୋଲି ଜଣାପଡ଼ିଛି । ସୂତ୍ର ମୁତାବକ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏମାନଙ୍କୁ ଭାରତ ଫେରାଇ ଆଣିବା ପାଇଁ ୱେଷ୍ଟ ଇଣ୍ଡିଜ୍‌ ଗସ୍ତ କରିବେ ।
ଉଲ୍ଲେଖଥାଉ କି ପଳାତକ ଅରବପତି ବ୍ୟବସାୟୀ ମେହୁଲ ଚୋକ୍‌ସି ଏବଂ ୱିନ୍‌ସମ୍‌ ଡାଏମଣ୍ଡ୍‌ସର ପ୍ରମୋଟର ଜତିନ୍‌ ମେହେଟ୍ଟା ଭାରତର କାର୍ଯ୍ୟାନୁଷ୍ଠାନକୁ ଏଡ଼ାଇବା ପାଇଁ କିଛି କ୍ୟାରିବିୟାନ୍‌ ରାଷ୍ଟ୍ରର ନାଗରିକ କାର୍ଯ୍ୟକ୍ରମକୁ ଅପବ୍ୟବହାର କରିଛନ୍ତି । ବିପୁଳ ଅର୍ଥ ବ୍ୟୟ କରି ସେମାନେ ନାଗରିକତ୍ୱ ହାସଲ କରିଛନ୍ତି । ଜତିନ୍‌ ମେହେଟ୍ଟା କିଛି ବର୍ଷ ପୂର୍ବେ ସେଣ୍ଟ କିଟ୍‌ସ ଓ ନେଭିସ୍‌ର ନାଗରିକତ୍ୱ ହାସଲ କରିଥିବା ବେଳେ ଚୋକ୍‌ସି ନିକଟରେ ଆଣ୍ଟିଗୁଆ ଏବଂ ବାର୍‌ବୁଆଡ଼ାର ନାଗରିକତା ହାସଲ କରିଛନ୍ତି । ଏହି ଦେଶଗୁଡ଼ିକ ୧୩୨ ଦେଶକୁ ଭିସାମୁକ୍ତ ଭ୍ରମଣ ସୁଯୋଗ ପ୍ରଦାନ କରୁଛନ୍ତି । ଫଳରେ ଏମାନେ ଅବାଧରେ ବିଦେଶ ଭ୍ରମଣ କରୁଛନ୍ତି । ତଦନ୍ତକାରୀ ସଂସ୍ଥାଗୁଡ଼ିକ ମୁତାବକ ଭାରତୀୟ ଅର୍ଥନୈତିକ ଅପରାଧୀମାନେ କିଛି ପରିମାଣର ନିବେଶ କରି ସହଜରେ କ୍ୟାରିବିୟାନ୍‌ ରାଷ୍ଟ୍ରଗୁଡ଼ିକର ନାଗରିକତ୍ୱ ହାସଲ କରିପାରୁଛନ୍ତି । ଏହି ଦେଶଗୁଡ଼ିକ ସହ ପ୍ରତ୍ୟର୍ପଣ ଚୁକ୍ତି ହୋଇନଥିବାରୁ ଏହା ସେମାନଙ୍କୁ ଅଧିକ ସୁହାଉଛି ଏବଂ ସେମାନେ ଏହି ଦେଶଗୁଡ଼ିକରେ ସହଜରେ ଆତ୍ମଗୋପନ କରିପାରୁଛନ୍ତି । ଏମାନଙ୍କୁ ଭାରତ ଆଣିବା ପାଇଁ କେନ୍ଦ୍ର ସରକାର ଅଣ୍ଟା ଭିଡ଼ିଛନ୍ତି ।