ଭୁବନେଶ୍ୱର, ୨୪/୦୫: ଭାରତୀୟ ଜାତୀୟ ବିଜ୍ଞାନ ଏକାଡେମୀ ଦ୍ୱାରା ପ୍ରକାଶିତ କମିକ୍ ପୁସ୍ତକ ‘ହର୍ ଷ୍ଟୋରୀ’ରେ ଓଡ଼ିଶାର ବୈଜ୍ଞାନିକ ଡ.ସ୍ୱାତୀ ନାୟକଙ୍କୁ ସ୍ଥାନିତ କରାଯାଇଛି । ଏହି କମିକ୍ ପୁସ୍ତକରେ ବିଭିନ୍ନ କ୍ଷେତ୍ରରେ ଭାରତର ଶ୍ରେଷ୍ଠ ୧୦ଜଣ ମହିଳା ବୈଜ୍ଞାନକଙ୍କୁ ସ୍ଥାନ ମିଳିଛି । ଡ.ସ୍ୱାତୀ ନାୟକ ଏଥିରେ କୃଷିକୁ ପ୍ରତିନିଧିତ୍ୱ କରିଛନ୍ତି । ଯିଏ ବିଜ୍ଞାନ ମାଧ୍ୟମରେ ବିଶ୍ୱକୁ ପରିବର୍ତ୍ତନ କରିଛନ୍ତି ସେହିଭଳି ୧୦ ମହିଳାଙ୍କୁ ନେଇ ପୁସ୍ତକ ଲେଖାଯାଇଛି ।
ଡକ୍ଟର ସ୍ୱାତୀ ଅନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନ(ଆଇଆରଆରଆଇ)ର ଜଣେ ପ୍ରଶଂସିତ ବୈଜ୍ଞାନିକ । ବର୍ତ୍ତମାନ ଦକ୍ଷିଣ ଏସିଆର ସିଡ୍ ଆଣ୍ଡ ପ୍ରଡକ୍ଟ ମ୍ୟାନେଜମେଣ୍ଟ ମୁଖ୍ୟ ଏବଂ ସିଜିଆଇଆର ସାଇନ୍ସ ପ୍ରୋଗ୍ରାମ ଅଧୀନରେ ସିଡ ଡେଲିଭରିର ଗ୍ଲୋବାଲ କୋଡିନେଟର୍ ଭାବରେ କାର୍ଯ୍ୟ କରୁଛନ୍ତି । କୃଷି କ୍ଷେତ୍ରରେ କିଭଳି ଫସଲରେ ଜନେଟିକ୍ ଲାଭ ପ୍ରଦାନ କରି ପ୍ରଜନନକୁ ବୃଦ୍ଧି କରାଯାଇ ପାରିବ ତା ଉପରେ କାର୍ଯ୍ୟ କରୁଛନ୍ତି ।
ବୈଜ୍ଞାନିକ ଡ.ସ୍ୱାତୀଙ୍କୁ ୨୦୨୩ରେ ବିଶ୍ୱ ଖାଦ୍ୟ ପୁରସ୍କାର ଫାଉଣ୍ଡେସନ୍ରୁ ନର୍ମାନ ବାରଲାଗ୍ ପୁରସ୍କାର ମିଳିଥିଲା । ଡ. ସ୍ୱାତୀ ୧୫ବର୍ଷରୁ ଅଧିକ ହେବ ଗ୍ରାମୀଣ ନବସୃଜନ ମଡେଲ, ସ୍ଥାୟୀ ଏବଂ ଜଳବାୟୁ ସ୍ମାର୍ଟ କୃଷିର ସ୍କେଲିଂ ଏବଂ ଗ୍ରହଣ, ନୋବେଲ ଜର୍ମପ୍ଲାଜମ୍ସ ଏବଂ ଗୁଣାତ୍ମକ ବିହନ ଉପରେ ଗବେଷଣା କରୁଛନ୍ତି । ଡ.ସ୍ୱାତୀ ଏନ୍ଡି ଟିଭି ଇଣ୍ଡିଆ ଦ୍ୱାରା ୨୦୨୪ କ୍ଲାଇମେଟ୍ ଚାମ୍ପିଅନ ପୁରସ୍କାର ପ୍ରାପ୍ତ । ସେ ୧୦ ହଜାରରୁ ଅଧିକ ଫାର୍ମ ପରୀକ୍ଷଣ ଆୟୋଜନ କରିଛନ୍ତି । ୨୦ରୁ ଅଧିକ ଉଚ୍ଚ ଅମଳକ୍ଷମ ଜଳବାୟୁ ପ୍ରତିରୋଧୀ ଜୈବ-ସୁରକ୍ଷିତ କିସମର ପ୍ରସାରକୁ ପ୍ରୋତ୍ସାହିତ କରିଛନ୍ତି ।
