ଭୁବନେଶ୍ୱର,୦୪/୦୮: ଚିଲିକାଫ୍ରେସ ଭଳି ଓପୋଲଫେଡ୍ ପରିଚାଳିତ ଚିକେନଫ୍ରେସର ସ୍ଥିତି ସଙ୍ଗୀନ ହୋଇପଡ଼ିଛି । ଆବଶ୍ୟକ ପରିମାଣର କୁକୁଡ଼ା ଆସୁନଥିବାରୁ ରାଜଧାନୀରେ ଥିବା ବିଭିନ୍ନ ଚିକେନ୍ଫ୍ରେସ କାଉଣ୍ଟରରେ ତାଲା ପଡ଼ିଛି । ଶିରିପୁର ଓ ଏକାମ୍ରକାନନ ରୋଡ୍ରେ ଥିବା କାଉଣ୍ଟର ଦୀର୍ଘଦିନ ହେବ ବନ୍ଦ ଥିବା ବେଳେ ଗ୍ରାହକ ଆସି ଫେରିଯାଉଛନ୍ତି । ଅନ୍ୟ କିଛି କାଉଣ୍ଟର ସକାଳେ ଖୋଲୁଛି, ସଂଧ୍ୟାରେ ବନ୍ଦ ହୋଇଯାଉଛି । କାଉଣ୍ଟରରେ କାର୍ଯ୍ୟରତ କର୍ମଚାରୀମାନେ ୭ମାସ ହେଲାଣି ଦରମା ପାଉନଥିବାରୁ ଅସନ୍ତୋଷ ପ୍ରକାଶ କରିଛନ୍ତି । ସେଥିପାଇଁ କାମ କରିବାକୁ ଆଗ୍ରହ ଦେଖାଉନାହାନ୍ତି । ସେହିପରି କୁକୁଡ଼ା ଓ ଅଣ୍ଡା ଯୋଗାଉଥିବା ଟ୍ରେଡ୍ରମାନେ ମଧ୍ୟ ଟଙ୍କା ପାଉନାହାନ୍ତି । ଏସବୁ ମଧ୍ୟରେ ଓପୋଲଫେଡ୍ କର୍ତ୍ତୃପକ୍ଷ ନିଦାବିଷ୍ଣୁ ପାଲଟିଥିବା ବେଳେ ଆଗକୁ କାଉଣ୍ଟ ପରିଚାଳନା କିପରି ହେବ ତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ରାଜଧାନୀବାସୀଙ୍କୁ ଫ୍ରେସ ଓ ସୁଲଭ ମୂଲ୍ୟରେ କୁକୁଡ଼ା ମାଂସ ମିଳିବ । ଚିଲିକାଫ୍ରେସର ପ୍ରାରମ୍ଭିକ ସଫଳତା ପରେ ରାଜ୍ୟ ସରକାର କୁକୁଡ଼ା ମାଂସ ଯୋଗାଇବା ପାଇଁ ଯୋଜନା ଆରମ୍ଭ କଲେ । ଏଥିପାଇଁ ଓଡ଼ିଶା ଷ୍ଟେଟ୍ ପୋଲଟ୍ରୀ ପ୍ରଡକ୍ଟସ କୋ- ଅପରେଟିଭ୍ ମାର୍କେଟିଂ ଫେଡେରେସନ୍ ଲିମିଟେଡ୍ (ଓପୋଲଫେଡ୍) ପକ୍ଷରୁ ୨୦୧୫ ମସିହାରେ ଭୁବନେଶ୍ୱରରେ ୫ଟି ଓ କଟକରେ ଗୋଟିଏ ଚିକେନ୍ଫ୍ରେସ ଖୋଲିଥିଲା । ଭୁବନେଶ୍ୱରର ସହିଦନଗର ସ୍ଥିତ ପ୍ରାଣୀ ଚିକିତ୍ସାଳୟ ନିକଟ, ଆଇଆରସି ଭିଲେଜ୍, ଶିରିପୁର ଓୟୁଏଟି କ୍ୟାମ୍ପସ, ଚନ୍ଦ୍ରଶେଖରପୁର ଓ ଲକ୍ଷ୍ମୀସାଗରଠାରେ ୫ଟି କାଉଣ୍ଟର ଖୋଲାଯାଇଥିଲା ।
ସେହିପରି କଟକର ଖପୁରିଆରେ ମଧ୍ୟ ଗୋଟିଏ କାଉଣ୍ଟର ରହିଛି । କେବଳ ସେତିକି ନୁହେଁ, ସାରା ରାଜ୍ୟରେ ଏହାକୁ ବିସ୍ତାର କରିବା ଉଦ୍ଦେଶ୍ୟରେ ପରବର୍ତ୍ତୀ ପର୍ଯ୍ୟାୟରେ ଜଗତସିଂହପୁର, ଫୁଲବାଣୀ, ଖୋର୍ଦ୍ଧା, ଭବାନୀପାଟଣା, ଜୟପୁର, ବ୍ରହ୍ମପୁର ସହର, ସୁନାବେଡ଼ା, ଛତାବର, ସୁବର୍ଣ୍ଣପୁର ଆଦି ସ୍ଥାନରେ ମଧ୍ୟ ଚିକେନଫ୍ରେସ କାଉଣ୍ଟର ରହିଛି । ଭୁବନେଶ୍ୱର, କଟକକୁ ଛାଡିଦେଲେ ଅନ୍ୟ ଜିଲ୍ଲାରେ ଥିବା ଚିକେନଫ୍ରେସ କାଉଣ୍ଟର ପବ୍ଲିକ-ପ୍ରାଇଭେଟ୍ ପାର୍ଟନରସିପ୍(ପିପିପି) ମୋଡ୍ରେ ଚାଲୁଛି । ଏହି ଚିକେନଫ୍ରେସରେ ଅଣ୍ଡା, ପ୍ୟାକେଟ୍ ଅଣ୍ଡା ସହ ପ୍ୟାକେଟ୍ କୁକୁଡ଼ା ମାଂସ ମିଳୁଛି । ସେହିପରି ବନରାଜ୍, ଦେଶି, ବ୍ରଏଲର ଭଳି କୁକୁଡ଼ା ଏଠାରେ ରହିଛି । କରୋନା ପରେ ପରେ ଚିକେନଫ୍ରେସ କ୍ଷତିରେ ଚାଲୁଛି ।
ରାଜ୍ୟ ପୋଲଟ୍ରି ଟ୍ରେଡର୍ସ ପକ୍ଷରୁ ଓପୋଲଫେଡ୍କୁ କୁକୁଡ଼ା ଓ ଅଣ୍ଡା ଯୋଗାଇଦିଆଯାଉଥିବା ବେଳେ ତାହା ଏହି କାଉଣ୍ଟରକୁ ଆସୁଛି । ଦୈନିକ ୧୦ ଟନ୍ରୁ ଅଧିକ ମାଂସ ଓ ୧ଲକ୍ଷ ଅଣ୍ଡା ଆସିବା କଥା, ହେଲେ ବହୁତ କମ୍ ଆସୁଛି । ଏହାର କାରଣ ଓପୋଲଫେଡ୍ ନିୟମିତ ଭାବରେ ଟ୍ରେଡର୍ସଙ୍କୁ ଟଙ୍କା ଦେଉନି । ସପ୍ତାହକରେ ଯେଉଁ ଟଙ୍କା ମିଳିବା କଥା, ତାହା ପାଇବାକୁ ମାସ ମାସ ସମୟ ଲାଗୁଛି । ଏହି ଅନିୟମିତତା ନେଇ ପୋଲଟ୍ରି ମହାସଂଘ ସମ୍ପାଦକ ଜ୍ୟୋତିକାନ୍ତ ମହାପାତ୍ର କିଛିଦିନ ତଳେ ଓପୋଲଫେଡ୍ ଓ ସରକାରଙ୍କୁ ଦାବିପତ୍ର ପ୍ରଦାନ କରିଥିଲେ। ହେଲେ ଟଙ୍କା ମିଳିନଥିବା ସେ ଅଭିଯୋଗ କରିଛନ୍ତି । ଏବେ ଦୁଇଜଣ ଟ୍ରେଡର୍ସଙ୍କୁ ୧୦ଲକ୍ଷରୁ ଅଧିକ ଟଙ୍କା ବାକି ପଡ଼ିଥିବା ସେ କହିଛନ୍ତି।
ସେହିପରି ରକ୍ଷଣାବେକ୍ଷଣା ଅଭାବରୁ ଚିକେନ୍ ଫ୍ରେସ କାଉଣ୍ଟର ଜରାଜୀର୍ଣ୍ଣ ହୋଇଗଲାଣି । ଶିରିପୁରରେ ଥିବା କାଉଣ୍ଟରର ସମ୍ମୁଖଭାଗ ଭାଙ୍ଗିପଡ଼ିଥିବା ବେଳେ ସଫେଇ ହେଉନଥିବା ଦେଖିବାକୁ ମିଳିଛି । ସେହିପରି ଭୁବନେଶ୍ୱରରେ ଥିବା ସମସ୍ତ କାଉଣ୍ଟରରେ କାର୍ଯ୍ୟରତ ୩୯ଜଣ କର୍ମଚାରୀ ଦରମା ପାଉନାହାନ୍ତି । ଯାହାକୁ ନେଇ କିଛିଦିନ ତଳେ ସେମାନେ ଆନ୍ଦୋଳନ କରିଥିଲେ । ଏସଂକ୍ରାନ୍ତରେ ଓପୋଲଫେଡ୍ ନିର୍ଦ୍ଦେଶକ ଭକ୍ତହରି ମଲ୍ଲିକ କହିଛନ୍ତି, କର୍ମଚାରୀଙ୍କ ଯେଉଁ ଅସୁବିଧା ଥିଲା ତାହା ଦୂରେଇ ଯାଇଛି । ଏବେ ଦରମା ଦିଆଯାଉଛି । କୋଭିଡ୍ ବେଳେ ଦରମା ପ୍ରଦାନରେ ଅସୁବିଧା ହୋଇଥିଲା । ଆମର ପରିଚାଳନା ନିର୍ଦ୍ଦେଶକ(ଏମ୍ଡି) ମଧ୍ୟ ନଥିଲେ । ସେହିପରି ଶିରିପୁର କାଉଣ୍ଟର ଜୁଲାଇ ୧ରୁ ୨୨ ତାରିଖ ପର୍ଯ୍ୟନ୍ତ ବନ୍ଦ ଥିଲା । ହେଲେ ଏବେ କେବଳ ସକାଳେ ଖୋଲୁଛି । ଶ୍ରାବଣ ମାସ ଓ ବାର୍ଡଫ୍ଲୁ ପାଇଁ ସଂଧ୍ୟା ବେଳେ ବନ୍ଦ ରହୁଛି ।
