ନୂଆଦିଲ୍ଲୀ,୦୨/୧୨; ଏବେ ସବୁ ନୂଆ ସ୍ମାର୍ଟଫୋନରେ ସାଇବର ସୁରକ୍ଷା ଆପ ‘ସଂଚାର ସାଥୀ’ ପ୍ରି-ଇନଷ୍ଟଲ ମିଳିବ । କେନ୍ଦ୍ର ସରକାର ସ୍ମାର୍ଟଫୋନ କମ୍ପାନିଗୁଡ଼ିକୁ ନିର୍ଦ୍ଦେଶ ଦେଇଛନ୍ତି ଯେ, ସେମାନେ ସ୍ମାର୍ଟଫୋନରେ ସରକାରୀ ସାଇବର ସୁରକ୍ଷା ଆପକୁ ପୂର୍ବରୁ ଇନଷ୍ଟଲ କରି ବିକ୍ରି କରନ୍ତୁ । ଏ ନେଇ କମ୍ପାନୀକୁ ୯୦ଦିନର ସମୟ ମିଳିଛି । ସରକାରଙ୍କ ଏହି ନିଷ୍ପତ୍ତିକୁ ନେଇ ହଙ୍ଗାମା ଆରମ୍ଭ ହୋଇଛି । ବିରୋଧୀ ସରକାରଙ୍କୁ ଟାର୍ଗେଟ କରି ସଞ୍ଚାର ଆପକୁ ପେଗାସସ ସହ ତୁଳନା କରିଛନ୍ତି । 

ଫୋନରେ ସଞ୍ଚାର ସାଥୀ ଆପକୁ ନେଇ କଂଗ୍ରେସ ସାଂସଦ ପ୍ରିୟାଙ୍କା ଗାନ୍ଧୀ କହିଛନ୍ତି, ଏହା ଏକ ଗୁପ୍ତଚର ଆପ୍ । ଅତ୍ୟନ୍ତ ହାସ୍ୟସ୍ପଦ । ନାଗରିକଙ୍କର ଗୋପନୀୟତା ଅଧିକାର ଅଛି । ପ୍ରତ୍ୟେକଙ୍କ ପାଖରେ ପରିବାର, ବନ୍ଧୁମାନଙ୍କୁ ବାର୍ତ୍ତା ପଠାଇବାର ଗୋପନୀୟତାର ଅଧିକାର ରହିବା ଆବଶ୍ୟକ, ସରକାର ସବୁକିଛି ନଦେଖି ଦେଶକୁ ଏକଛତ୍ରବାଦୀରେ ପରିଣତ କରୁଥିବା କହିଛନ୍ତି ପ୍ରିୟାଙ୍କା ଗାନ୍ଧୀ । ସେହିପରି ଶିବସେନା ସାଂସଦ ପ୍ରିୟାଙ୍କା ଚର୍ତୁବେଦୀ କହିଛନ୍ତି, ଏହା ସମ୍ପୂର୍ଣ୍ଣ ହାସ୍ୟାସ୍ପଦ । ଆପ୍ କରି ନଜର ରଖିବାର ଏହା ଆଉ ଏକ ଉପାୟ । ଏହାର ଅର୍ଥ ହେଉଛି ମୋବାଇଲ ଫୋନ ମାଧ୍ୟମରେ କରାଯାଉଥିବା ସମସ୍ତ କାର୍ଯ୍ୟକଳାପକୁ ଟ୍ରାକ କରାଯିବା । ଗୋପନୀୟତା ଆମର ଅଧିକାର । ଏମିତି କରି ସେମାନେ ଆକ୍ରମଣ କରୁଛନ୍ତି ।

​​​​​​​ସେହିପରି କଂଗ୍ରେସ ଜେନେରାଲ ସେକ୍ରେଟାରୀ  କେସି ବେଣୁଗୋପାଳ ଏହା ସମ୍ପୂର୍ଣ୍ଣ ଅସାମ୍ବିଧାନିକ ବୋଲି କହିଛନ୍ତି । ସୋସିଆଲ ମିଡିଆ ପୋଷ୍ଟରେ କହିଛନ୍ତି.'' ବିଗ୍‌ ବ୍ରଦର ଆମକୁ ଦେଖିପାରିବେ ନାହିଁ । ଏହି ଆଦେଶ ସମ୍ପୂର୍ଣ୍ଣ ବେଆଇନ । ଗୋପନୀୟତା ଅଧିକାରୀ ସମ୍ବିଧାନର ଧାରା ୨୧ ଅନୁଯାୟୀ ସୁନିଶ୍ଚିତ ନାଗରିକଙ୍କ ମୌଳିକ ଅଧିକାରର ଅପରିହାର୍ଯ୍ୟ ଅଂଶ । ଏହି ଆପ୍ ଏକ ବିପତ୍ତଜନକ ଉପକରଣ । ଆଦେଶକୁ ପ୍ରତ୍ୟାହାର କରାଯାଉ । ''