ନୂଆଦିଲ୍ଲୀ: ପହଲଗାମ ଅଞ୍ଚଳରେ ହୋଇଥିବା ଆତଙ୍କୀ ଆକ୍ରମଣ ଉପରେ ପ୍ରଥମ ଥର ପାଇଁ ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓୱେସି ନିଜ ମନ୍ତବ୍ୟ ରଖିଛନ୍ତି। ସେ ଏହି ଆକ୍ରମଣକୁ କଡା ନିନ୍ଦା କରିବା ସହ ଏଥିପାଇଁ ଗୁଇନ୍ଦା ବିଭାଗର ବିଫଳତାକୁ ଦାୟି କରିଛନ୍ତି। ଏହା ସହ ଉରି ଓ ପୁଲୱାମାରେ ହୋଇଥିବା ଆକ୍ରମଣଠୁ ଏହା ବହୁତ ଭୟଙ୍କର ଓ ଯନ୍ତ୍ରଣାଦାୟକ ବୋଲି ମଧ୍ୟ ସେ କହିଛନ୍ତି। ଏହି ମାମଲାରେ ମୋଦି ସରକାର ଯେଉଁ ନିଷ୍ପତ୍ତି ଗ୍ରହଣ କରିବେ ତାହା ସହ ଦଳ ରହିବ ବୋଲି ସେ ଘୋଷଣା କରିଛନ୍ତି।
ହାଇଦ୍ରାବାଦରେ ଏକ ସାମ୍ୱାଦିକ ସମ୍ମିଳନି ଆୟୋଜନ କରି ଓୱେସି ଏପରି ମତ୍ତପ୍ରକାଶ କରିଛନ୍ତି। ଏହା ସହ ଭାରତ ସରକାର ବହୁ ଜଲଦି ଆତଙ୍କବାଦି ମାନଙ୍କୁ ଉପଯୁକ୍ତ ଶିକ୍ଷା ଦେବା ସହ ପୀଡିତ ମାନଙ୍କ ପରିବାରକୁ ଉପଯୁକ୍ତ ନ୍ୟାୟ ଦେବେ ବୋଲି କହିଛନ୍ତି। ଏନେଇ ଓୱେସି କହିଛନ୍ତି ଯେ “ପହଲଗାମରେ ହୋଇଥିବା ଆତଙ୍କୀ ଆକ୍ରମଣରେ ଆତଙ୍କବାଦୀମାନେ ସାଧାରଣ ଲୋକଙ୍କୁ ତାଙ୍କ ଜାତି ପଚାରି ନରସଂହାର କରିଛନ୍ତି। ଆମେ ଏହାର କଡା ବିରୋଧ କରୁଛୁ। ମୁଁ ଚାହେଁ, ସରକାର ଏନେଇ କଠୋରରୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ। ଏହାସହ ଏହି ଆକ୍ରମଣ ପଛରେ ଆମ ଦେଶର ଗୁଇନ୍ଦା ବିଭାଗର ବିଫଳତା ମଧ୍ୟ ରହିଛି।”
ସେ ଆହୁରି ମଧ୍ୟ କହିଛନ୍ତି ଯେ ଏଆଇଏମଆଇଏମ ଦଳ ସମସ୍ତ ପୀଡିତ ଓ ତାଙ୍କ ପରିବାର ସହ ଠିଆ ହୋଇଛି। ଯେଉଁମାନେ ଏହି ଆକ୍ରମଣରେ ଆହତ ହୋଇଛନ୍ତି ସେମାନେ ଜଲଦି ସୁସ୍ଥ ହୋଇ ଯାଆନ୍ତୁ ବୋଲି ଦଳ ଚାହେଁ। ଏହି ନରସଂହାରର ଜବାବ ଭାରତ ସରକାର ଉପଯୁକ୍ତ ଢଙ୍ଗରେ ଦେବେ ବୋଲି ସେ କହିଛନ୍ତି।
ଆକ୍ରମଣ କରିବାକୁ ଆସିଥିବା ଆତଙ୍କୀ ମାନେ ପଡୋଶୀ ଦେଶ ପାକିସ୍ତାନର ନାଗରିକ। ସେମାନେ ଭାରତକୁ ଆସି ଏଠାରେ ଆତଙ୍କ ସୃଷ୍ଟି କରିବା ସହ ସାଧାରଣ ଲୋକମାନଙ୍କୁ ହତ୍ୟା କରିଛନ୍ତି। ଯାହା ଆଦୌ ଗ୍ରହଣୀୟ ନୁହେଁ। ଭାରତ ଭିତରେ ଭାରତ ବିରୋଧି କାର୍ଯ୍ୟକୁ ଗ୍ରହଣ କରାଯାଇ ପାରିବ ନାହିଁ। ମୋଦି ସରକାର ଏନେଇ ଜଲଦି ଆକ୍ସନ ନେବେ ବୋଲି ମୋର ଆଶା ରହିଛି ବୋଲି ଓୱେସି କହିଛନ୍ତି।
ଆପଣଙ୍କୁ ଜଣାଇରଖୁ ଯେ, କାଶ୍ମୀରର ଦକ୍ଷୀଣରେ ଥିବା ପହଲଗାମ ଅଞ୍ଚଳରେ ଗତ ମଙ୍ଗଳବାର ଦିନ ଏକ ଭଯଙ୍କର ଆତଙ୍କୀ ଆକ୍ରମଣ ସଂଗଠିତ ହୋଇଥିଲା। ଏହି ଆକ୍ରମଣରେ ୨୬ ଜଣଙ୍କ ମୃତ୍ୟୁ ହୋଇଥିଲା ଯେଉଁଥିରେ ଦୁଇଜଣ ବିଦେଶୀ ନାଗରିକ ଥିବା ବେଳେ ଦୁଇଜଣ ସ୍ଥାନିୟ ଲୋକ ମଧ୍ୟ ରହିଛନ୍ତି ଓ ଅନେକ ଆହତ ହୋଇଛନ୍ତି।
