ନୂଆଦିଲ୍ଲୀ: ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଏହି ସମୟରେ, ଭାରତୀୟ ସଶସ୍ତ୍ର ବାହିନୀର ଚିଫ୍ ଅଫ୍ ଡିଫେନ୍ସ ଷ୍ଟାଫ୍ (ସିଡିଏସ୍) ଜେନେରାଲ ଅନିଲ ଚୌହାନ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ତାଙ୍କ ନୂଆଦିଲ୍ଲୀସ୍ଥିତ ବାସଭବନରେ ଭେଟିଛନ୍ତି। ଏହି ବୈଠକ ପ୍ରାୟ ଉଭୟଙ୍କ ମଧ୍ୟରେ ୪୦ ମିନିଟ୍ ଧରି ଚାଲିଥିଲା। ବୈଠକରେ ଜେନେରାଲ ଚୌହାନ ପ୍ରତିରକ୍ଷା ମନ୍ତ୍ରୀଙ୍କୁ ବିଭିନ୍ନ ଅପରେସନ୍ ବିଷୟରେ ବିସ୍ତୃତ ଭାବରେ ଅବଗତ କରାଇଥିବା ସୂଚନା ମିଳିଛି। ସେମାନଙ୍କର ବହୁମୁଖୀ ରଣନୀତି ଏବଂ ସେମାନଙ୍କର ସ୍ଥାୟୀତ୍ୱ ବିଷୟରେ ଆଲୋଚନା ମଧ୍ୟ କରିଛନ୍ତି । 

୨୨ ଏପ୍ରିଲରେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣ ପରେ ଏହି ବୈଠକ ଅନୁଷ୍ଠିତ ହୋଇଥିଲା । ଏହି ଆକ୍ରମଣରେ ୨୬ ଜଣ ଲୋକ ପ୍ରାଣ ହରାଇଛନ୍ତି। ଯେଉଁଥିରେ ଅଧିକାଂଶ ପର୍ଯ୍ୟଟକ ଏବଂ ଜଣେ ନେପାଳୀ ନାଗରିକ ରହିଛନ୍ତି । ଆକ୍ରମଣଟି ଅପରାହ୍ନ ପ୍ରାୟ ୨:୦୦ ଟାରେ ବୈସାରଣ ଅଞ୍ଚଳରେ ହୋଇଥିଲା। ୨୦୧୯ ପୁଲୱାମା ଆକ୍ରମଣ ପରେ ଏହି ଘଟଣା କାଶ୍ମୀରରେ ସବୁଠାରୁ ଭୟଙ୍କର ଆକ୍ରମଣ ଥିଲା, ଯେଉଁଥିରେ ୪୦ ଜଣ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (CRPF) ଯବାନ ସହିଦ ହୋଇଥିଲେ। 

ଆକ୍ରମଣ ପରେ, ଜାତୀୟ ତଦନ୍ତକାରୀ ସଂସ୍ଥା (NIA) ଏପ୍ରିଲ ୨୩ ତାରିଖରୁ ପହଲଗାମରେ ଘଟଣାସ୍ଥଳରୁ ପ୍ରମାଣ ଖୋଜିବାକୁ ଜୋରଦାର କରିଛନ୍ତି। ତଦନ୍ତରେ NIA IG, DIG ଏବଂ SPଙ୍କ ନେତୃତ୍ୱରେ ଅଧିକାରୀ ମାନେ ସାମିଲ ଅଛନ୍ତି, ଯେଉଁମାନେ ଆକ୍ରମଣର ପ୍ରତ୍ୟକ୍ଷଦର୍ଶୀଙ୍କୁ ପଚରାଉଚରା କରୁଛନ୍ତି।

ଏହା ବ୍ୟତୀତ, ଆକ୍ରମଣ ପରେ ଭାରତୀୟ ସେନା ହାଇ ଆଲର୍ଟ ବଜାୟ ରଖିଛି ଏବଂ ଆତଙ୍କବାଦୀ ମାନଙ୍କୁ ନିଷ୍କ୍ରିୟ କରିବା ପାଇଁ ଅନେକ ସର୍ଚ୍ଚ ଅପରେସନ୍ ଆରମ୍ଭ କରିଛି। ଏହି ଆକ୍ରମଣ ପରେ ସାରା ଦେଶରେ କ୍ରୋଧ ପ୍ରକାଶ ପାଇଛି ଏବଂ ପାକିସ୍ତାନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଦାବି କରି ଦେଶବ୍ୟାପୀ ବିଶାଳ ପ୍ରତିବାଦ କରାଯାଉଛି।