ନୂଆଦିଲ୍ଲୀ,୩୧।୫: ପହଲଗାମରେ ବର୍ବର ଆତଙ୍କବାଦୀ ଆକ୍ରମଣ ପରେ, ପାକିସ୍ତାନ ଉପରେ ଭାରତ ରାଗନୈତିକ ଚାପ ବୃଦ୍ଧି କରିଛି। 'ଅପରେସନ୍ ସିନ୍ଦୂର'ର ସଫଳତା ଏବଂ ଆତଙ୍କବାଦ ବିରୁଦ୍ଧରେ ଭାରତ ଦ୍ୱାରା ଗ୍ରହଣ କରାଯାଇଥିବା ପଦକ୍ଷେପକୁ ବିଶ୍ୱ ସମ୍ମୁଖରେ ଉପସ୍ଥାପନ କରିବା ପାଇଁ ସାତଟି ସର୍ବଦଳୀୟ ପ୍ରତିନିଧି ଦଳ ବିଭିନ୍ନ ଦେଶ ଗସ୍ତ କରୁଛନ୍ତି। ଏହି ପରିପ୍ରେକ୍ଷୀରେ, ବରିଷ୍ଠ ବିଜେପି ନେତା ଏବଂ ଲୋକସଭା ସାଂସଦ ରବି ଶଙ୍କର ପ୍ରସାଦଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଶୁକ୍ରବାର ଡେନମାର୍କର ରାଜଧାନୀ କୋପେନହେଗେନରେ ପହଞ୍ଚିଛନ୍ତି।
ଭାରତୀୟ ପ୍ରତିନିଧିମଣ୍ଡଳୀ କୋପେନହେଗେନ୍ରେ ଭାରତୀୟ ସମୁଦାୟକୁ ସମ୍ବୋଧିତ କରୁଥିଲେ, ଏହି ସମୟରେ କିଛି ପାକିସ୍ତାନୀ ନାଗରିକ କାର୍ଯ୍ୟକ୍ରମ ସ୍ଥଳରେ ଜମା ହୋଇ ନାରାବାଜି କରିବାରେ ଲାଗିଥିଲେ। ତେବେ ଭାରତୀୟ ସାଂସଦ ଓ ଅଧିକାରୀ ଏହି ବିରୋଧକୁ ‘ଧ୍ୟାନ ହଟାଇବାର ଅସଫଳ ଚେଷ୍ଟା’ ବୋଲି କହିଛନ୍ତି।
ରବି ଶଙ୍କର ପ୍ରସାଦ କଡା ପ୍ରତିକ୍ରିୟା ଦେଇ କହିଛନ୍ତି, ମୁଁ ଆଶ୍ଚର୍ଯ୍ୟ ହୋଇଯାଇଥିଲି ଯେ, ପାକିସ୍ତାନୀଙ୍କୁ ଏଠାରେ ନାରାବାଜି କରିବା ପାଇଁ ପଠାଯାଇଛି। ଆମର କାର୍ଯ୍ୟକ୍ରମ ଖୁବ୍ ସଫଳ ଥିଲା। ପାକିସ୍ତାନ ଏକ ହତାଶ ଦେଶ, ଯିଏକି ହତାଶରେ ବଞ୍ଚିଥାଏ। ଏହି ଲୋକଙ୍କୁ ଅଣଦେଖା କରିବା ହିଁ ଭଲ।’ ଶିବସେନା ସାଂସଦ ପ୍ରିୟଙ୍କା ଚର୍ତୁବେଦୀ ମଧ୍ୟ ମଞ୍ଚରୁ ପାକିସ୍ତାନୀ ପ୍ରଦର୍ଶନକାରୀଙ୍କୁ କଟାକ୍ଷ କରିଥିଲେ। ସେ କହିଥିଲେ ଆମେ ଯେତେବେଳେ ଏଠାରେ ପହଁଞ୍ଚିଥିଲୁ କିଛି ଲୋକ ପତାକା ନେଇ ହଲାଉଥିଲେ। ମୋତେ ଲାଗିଲା ଆଇଏମ୍ଏଫ୍ରୁ ମିଳିଥିବା ଋଣର ଏଠାରେ ବ୍ୟବହାର ହେଉଛି। ଦୁଇ ମିନିଟ ପୂର୍ବରୁ ମୁଁ ବାହାରକୁ ଯାଇ ଦେଖିଲି, ସେତେବେଳେ କୁହାଗଲା ସେମାନେ ଯାଇ ସାରିଛନ୍ତି। ଏପଟେ ଆମେ ମାତୃଭୂମି ସହ ମଜବୁତିର ସହ ଠିଆ ହୋଇଛୁ।’
