ବାଲେଶ୍ୱର, ୧।୧୨: ବେଆଇନ ଗୋ ଚାଲାଣ ବେଳେ ଏକ ପିକଅପ୍ ଭ୍ୟାନ୍ ଓଲଟିପଡ଼ିଥିବା ଜଣାପଡ଼ିଛି । ଘଟଣାସ୍ଥଳରେ ୫ଟି ଷଣ୍ଢଙ୍କ ମୃତ୍ୟୁ ହୋଇଛି । ପିକଅପ୍ରେ ୧୫ଟି ଷଣ୍ଢଙ୍କୁ ବେଆଇନ ଭାବେ ଭଦ୍ରକରୁ ବାଲେଶ୍ଵରକୁ ଚାଲାଣ କରାଯାଉଥିବା ବେଳେ ଦ୍ରୁତଗତିରେ ଆସୁଥିବା ଗାଡ଼ିଟି ଭାରସାମ୍ୟ ହରାଇ ଏକ ବିଦ୍ୟୁତ୍ ଖୁଣ୍ଟକୁ ଧକ୍କା ଦେଇ ସ୍ଥାନୀୟ ମାଛ ବଜାର ନିକଟର ଥିବା ୫ଟି ବାଇକ୍ ଉପରକୁ ଚଢ଼ିଯାଇଥିଲା । ଫଳରେ ଜଣେ ମାଛ ବ୍ୟବସାୟୀ ଆହତ ହେଇଛନ୍ତି ।
ଦୁର୍ଘଟଣାସ୍ଥଳରେ ୫ ଷଣ୍ଢଙ୍କ ମୃତ୍ୟୁ ଘଟିବାକୁ କେନ୍ଦ୍ରକରି ଉଭୟ ଡ୍ରାଇଭର ଓ ହେଲପରଙ୍କୁ ନିର୍ଦ୍ଧୁମ ମାଡ଼ ମାରିଛନ୍ତି ସ୍ଥାନୀୟ ଲୋକେ । ବାଲେଶ୍ଵର ସଦର ଥାନା ଅନ୍ତର୍ଗତ ସୁନ୍ଦରୀ ନିକଟରେ ଏଭଳି ଘଟଣା ଘଟିଥିବା ବେଳେ ଉଭୟ ଡ୍ରାଇଭର ଓ ହେଲପରଙ୍କୁ ସ୍ଥାନୀୟ ପୁଲିସ୍ ପହଞ୍ଚି ଥାନାରେ ଅଟକ ରଖିଛି । ଦୁର୍ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିବା ବେଳେ ଘଟଣାସ୍ଥଳରେ ସିଟି ଡିଏସ୍ପି, ସଦର ଥାନା ଆଇଆଇସି ପହଞ୍ଚି ଲୋକଙ୍କୁ ବୁଝାସୁଝା କରିଛନ୍ତି ।
