ଭୁବନେଶ୍ୱ, ୧୭/୦୨: ପ୍ରଧାନମନ୍ତ୍ରୀ ଆବାସ ଯୋଜନା-ସହରାଞ୍ଚଳ (ପିଏମ୍ଏୱାଇ-ୟୁ) ରେ ରାଜ୍ୟରେ ୧.୮ ଲକ୍ଷ ବାସଗୃହ ମଞ୍ଜୁର ହୋଇଥିଲା । ୨୦୨୩- ୨୪ରେ ପ୍ରାୟ ୧.୩ ଲକ୍ଷ ଘର ସମ୍ପୂର୍ଣ୍ଣ ହୋଇଛି । ପିଏମ୍ଏୱାଇ ୨.୦ରେ ଏହି ଧାରାକୁ ଆହୁରି ଦୃଢ଼ କରିବା ଲାଗି ରାଜ୍ୟ ସରକାର ଲକ୍ଷ୍ୟ ରଖିଛନ୍ତି । ଏହି ଯୋଜନା ସହ ଆଉ ୫ ଲକ୍ଷ ହିତାଧିକାରୀ ଯୋଡ଼ି ହେବେ ବୋଲି ରାଜ୍ୟ ଅର୍ଥନୈତିକ ସର୍ଭେ ରିପୋର୍ଟରେ କୁହାଯାଇଛି ।
ଏହି ରିପୋର୍ଟ ମୁତାବକ, ଏବେ ରାଜ୍ୟରେ ସହରୀକରଣ ଧାରା ତ୍ୱରାନ୍ୱିତ ହୋଇଛି । ୨୦୨୧ରେ ଏହା ୧୮.୫% ରହିଥିବା ବେଳେ ୨୦୩୬ ବେଳକୁ ୨୧.୧%କୁ ବଢ଼ିବ ବୋଲି ଆକଳନ କରାଯାଇଛି । ଏହାକୁ ନଜରରେ ରଖି ରାଜ୍ୟ ସରକାର ବାସଗୃହ, ପାନୀୟ ଜଳ ଯୋଗାଣ, ପରିମଳ ଏବଂ ବର୍ଜ୍ୟବସ୍ତୁ ପରିଚାଳନା ବ୍ୟବସ୍ଥାକୁ ମଧ୍ୟ ବ୍ୟବସ୍ଥିତ କରୁଛନ୍ତି ।
ସହରାଞ୍ଚଳରେ ୧୦୦% ପାନୀୟ ଜଳ ଯୋଗାଣ ବ୍ୟବସ୍ଥାକୁ ପ୍ରାଥମିକତା ଦିଆଯାଇଛି । ୧୦୯ ସହରାଞ୍ଚଳ ସ୍ଥାନିୟ ନିକାୟ ସାର୍ବଜନୀନ ଲକ୍ଷ୍ୟ ହାସଲ କରିବାକୁ ସକ୍ଷମ ହୋଇଛନ୍ତି । ଜଳସାଥୀ କାର୍ଯ୍ୟକ୍ରମ ଦ୍ୱାରା ୱାଟ୍କୋ ଏବଂ ପିଏଚ୍ଇଓ ପାନିୟ ଜଳ ଯୋଗାଣ ଦିଗରେ ଏବେ କାର୍ଯ୍ୟକ୍ରମ ଜାରି ରଖିଛନ୍ତି । ସ୍ୱଚ୍ଛ ଏବଂ ନିରାପଦ ପାନୀୟ ଜଳ ଯୋଗାଣ ଦିଗରେ ୨୦୨୩-୨୪ରେ ୬୦,୬୫୮ ଜଳ ପରୀକ୍ଷଣ କରାଯାଇଛି ।
୧୨ ଏସ୍ଟିପି ଏବଂ ୧୧୨ ଏଫ୍ଏସ୍ଟିପି ଜରିଆରେ ଯଥାକ୍ରମେ ୩୭୩.୫ ଏମ୍ଏଲ୍ଡି ଏବଂ ୦.୩ ଏମ୍ଏଲ୍ଡି ବର୍ଜ୍ୟବସ୍ତୁ ପରିଚାଳନା କରାଯାଇଛି । ସହରାଞ୍ଚଳ ପରିମଳ ବ୍ୟବସ୍ଥାରେ ଆମ ସହର ଆପ୍ଲିକେସନ ଦ୍ୱାରା ୫୯୮୫ ଏସ୍ଏଚ୍ଜି ମହିଳାଙ୍କୁ କଠିନ ବର୍ଜ୍ୟବସ୍ତୁ ପରିଚାଳନା ଲାଗି ନିୟୋଜିତ କରାଯାଇଛି । ଗରିମା ସ୍କିମ୍ ଦ୍ୱାରା କୋର ସାନିଟେସନ ୱାର୍କରଙ୍କୁ ନିରାପତ୍ତା ତାଲିମ ଏବଂ ବିଭିନ୍ନ ଉପକରଣ ପ୍ରଦାନ କରାଯାଉଛି ।
