ଭୁବନେଶ୍ୱର ୧୬/୧୨(ରଞ୍ଜନ ସାହୁ, ହେମନ୍ତ ପରିଡ଼ା, ମାନସୀ ଶୁକ୍ଳା, ଭାଗ୍ୟଶ୍ରୀ ସାହୁ): ବିଦାୟୀ ୨୦୨୪ ଥିଲା ରାଜନୀତିର ବର୍ଷ । ସାଧାରଣ ନିର୍ବାଚନକୁ ନେଇ ପ୍ରଚାର ଅଭିଯାନରେ କମ୍ପିଥିଲା ଦେଶ । ଜନାଦେଶ ନିଜ ପକ୍ଷକୁ ନେବା ପାଇଁ ଦଳଗୁଡ଼ିକ ପ୍ରାଣମୂର୍ଚ୍ଛା ଉଦ୍ୟମ କରିଥିଲେ । ବିଜେପି ନେତୃତ୍ୱାଧୀନ ଏନ୍ଡିଏକୁ ତୃତୀୟ ଥର ଗାଦିରେ ବସାଇ ନ ଦେବା ପାଇଁ ବିରୋଧୀଙ୍କ ‘ଇଣ୍ଡିଆ’ ମେଣ୍ଟ ଶତତ ଚେଷ୍ଟା କରିଥିଲା । ହେଲେ ମୋଦି-ଶାହଙ୍କ ରଣନୀତିରେ ସେମାନଙ୍କ ଉଦ୍ୟମ ନିଷ୍ଫଳ ହୋଇଥିଲା । ହାଟ୍ରିକ୍ ମାରି ଗାଦି ଦଖଲ କରିଥିଲା ଏନ୍ଡିଏ। ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ନେଇଥିଲେ ନରେନ୍ଦ୍ର ମୋଦି । ଏମିତିକି ବିହାର, ମହାରାଷ୍ଟ୍ର ଓ ଆନ୍ଧ୍ର ପ୍ରଦେଶ ଭଳି ରାଜ୍ୟରେ ବି ଗାଦି ଦଖଲ କରିଥିଲା ଏନ୍ଡିଏ । ହରିଆଣାରେ ବିଜେପି ହାଟ୍ରିକ୍ ମାରିବା ସହ ଓଡ଼ିଶାରେ ଐତିହାସିକ ବିଜୟ ହାସଲ କରିଥିଲା । ବିଦାୟୀ ବର୍ଷରେ ମେଣ୍ଟ ରାଜନୀତି ମ୍ୟାଜିକ୍ ଦେଖାଇଥିଲା । ଝାଡ଼ଖଣ୍ଡରେ ଜେଏମ୍ଏମ୍-କଂଗ୍ରେସ ଏବଂ ଜମ୍ମୁ କାଶ୍ମୀରରେ ଏନ୍ସି-କଂଗ୍ରେସ ମେଣ୍ଟ କମାଲ୍ କରିଥିଲା । ୨୦୨୪ରେ ଘଟିଥିବା ରାଜନୈତିକ ଘଟଣାକ୍ରମକୁ ନେଇ ଏ ଉପସ୍ଥାପନା ।
ମୋଦି ୩.୦
ଚଳିତବର୍ଷ ଅନୁଷ୍ଠିତ ସାଧାରଣ ନିର୍ବାଚନରେ ହାଟ୍ରିକ୍ ମାରିଥିଲା ଏନ୍ଡିଏ । ଐତିହାସିକ ବିଜୟ ହାସଲ କରି ସମସ୍ତଙ୍କୁ ଚକିତ କରିଦେଇଥିଲା। ବିରୋଧୀଙ୍କ ‘ଇଣ୍ଡିଆ’ ମେଣ୍ଟ ଏନ୍ଡିଏକୁ ଗାଦିଚ୍ୟୁତ ପାଇଁ ସବୁ ପ୍ରକାର ଉଦ୍ୟମ କରିଥିଲେ । ଦେଶବ୍ୟାପୀ ପ୍ରମୁଖ ନେତାମାନେ ବିଜେପିକୁ ରୋକିବା ଲାଗି ବ୍ୟାପକ ପ୍ରଚାର କରିଥିଲେ । କିନ୍ତୁ ଏନ୍ଡିଏକୁ କ୍ଷମତାସୀନ ହେବାରୁ ରୋକିପାରି ନ ଥିଲେ । ଜେଡିୟୁ ଓ ଟିଡିପି ଭଳି ପ୍ରମୁଖ ମେଣ୍ଟ ଦଳ ଏନ୍ଡିଏକୁ ସରକାର ଗଢ଼ିବା ଲାଗି ଭିଟାମିନ୍ ସାଜିଥିଲେ । ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କ ପରେ ଦ୍ୱିତୀୟ ନେତା ଭାବେ ନରେନ୍ଦ୍ର ମୋଦି ତୃତୀୟ ଥର ପାଇଁ ଦେଶର ପ୍ରଧାନମନ୍ତ୍ରୀ ଭାବେ ଶପଥ ନେଇଥିଲେ । ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୋଦିଙ୍କୁ ଶପଥପାଠ କରାଇଥିଲେ । ତାଙ୍କ ପରେ ରାଜନାଥ ସିଂହ, ଅମିତ ଶାହ, ନୀତିନ ଗଡ଼କରୀ, ଜେ ପି ନଡ୍ଡା, ଶିବରାଜ ସିଂହ ଚୌହାନ ପ୍ରମୁଖ ୭୧ ଜଣ ନେତା ବି ଶପଥ ନେଇଥିଲେ ।
୪୦୦ ପାର୍ ଆଶା ଅଧୁରା
ଏନ୍ଡିଏ ଯଦିଓ ଏଥର ହାଟ୍ରିକ୍ ମାରିଥିଲା, କିନ୍ତୁ ଏହାର ୪୦୦ ପାର୍ ଆଶା ଅଧୁରା ରହିଯାଇଥିଲା । ଭୋଟ ଫଳ ବିଜେପି କିମ୍ବା ଏନ୍ଡିଏର ଆଶାଜନକ ହୋଇ ନ ଥିଲା । ଏନ୍ଡିଏ ୪୦୦ ପାର୍ କରିବା ନେଇ ଆଶା ରଖିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଦୃଢ଼ ଦାବି କରିଥିଲେ । ବିଜେପି ଅତିକମ୍ରେ ୩୭୦ ଆସନ ପାଇବାକୁ ଟାର୍ଗେଟ୍ ରଖିଥିଲା । କିନ୍ତୁ ଏହାଠାରୁ ବହୁ ପଛରେ ପଡ଼ିଥିଲା । ୩୭୦ ଦୂର କଥା ଏକକ ବହୁମତ (୨୭୨) ମିଳିପାରି ନ ଥିଲା । ଦଳକୁ ୨୪୦ ଆସନ ମିଳିଥିଲା ବେଳେ ଏନ୍ଡିଏ ୨୯୩ରେ ସୀମିତ ରହିଥିଲା। ଅନ୍ୟପକ୍ଷରେ ‘ଇଣ୍ଡିଆ’ ମେଣ୍ଟକୁ ୨୩୪ ମିଳିଥିଲା । ୨୦୧୯ ନିର୍ବାଚନରେ ବିଜେପି ଏକାକୀ ୩୦୩ ଆସନ ପାଇଥିଲା ବେଳେ ୨୦୨୪ରେ ଏନ୍ଡିଏ ପକ୍ଷେ ୩୦୦ ପାର୍ କରିବା ସମ୍ଭବ ହୋଇ ନ ଥିଲା।
ଟିଡିପି, ଜେଡିୟୁ ତ୍ରାଣକର୍ତ୍ତା
ଏଥର ଲୋକସଭା ନିର୍ବାଚନ ପୂର୍ବରୁ ବିଜେପି ଠୋସ ରଣନୀତି ବନାଇଥିଲା । ତେଲୁଗୁ ଦେଶମ୍ ପାର୍ଟି (ଟିଡିପି) ଏବଂ ଜନତା ଦଳ ୟୁନାଇଟେଡ୍ (ଜେଡିୟୁ)କୁ ଏନ୍ଡିଏରେ ସାମିଲ କରିଥିଲା । ଫଳରେ ସରକାର ଗଢ଼ିବା ପାଇଁ ଏନ୍ଡିଏକୁ ସହଜ ହୋଇଥିଲା । ବିଜେପି ଏକାକୀ ୨୪୦ ଆସନ ପାଇଥିଲେ ହେଁ ବହୁମତ (୨୭୨) ଠାରୁ ଏହା କମ୍ ଥିଲା । ଟିଡିପିର ୧୬ ଓ ଜେଡିୟୁର ୧୨ ଆସନ ବେଶ୍ ସହାୟକ ହୋଇଥିଲା । ଅନ୍ୟ ସହଯୋଗୀ ଦଳ ଜିତିଥିବା ଆସନ ଏନ୍ଡିଏର ମୋଟ ଅଙ୍କକୁ ୨୯୩ରେ ପହଞ୍ଚାଇଥିଲା । ତେଣୁ ଟିଡିପି ଓ ଜେଡିୟୁ ସହ ମେଣ୍ଟ ଅନେକ ଫାଇଦା ପହଞ୍ଚାଇଥିଲା ।
ଓମ୍ ବିର୍ଲା ପୁଣି ବାଚସ୍ପତି
ଏନ୍ଡିଏର ହାଟ୍ରିକ୍ ବିଜୟ ଓମ୍ ବିର୍ଲାଙ୍କ ପାଇଁ ଲାଭଦାୟକ ହୋଇଥିଲା । ସେ ଲଗାତର ଦ୍ୱିତୀୟ ଥର ପାଇଁ ଲୋକସଭା ବାଚସ୍ପତି ନିର୍ବାଚିତ ହୋଇଥିଲେ । ୨୦୨୪ ଜୁନ୍ ୨୬ରେ ଲୋକସଭା ଗୃହକାର୍ଯ୍ୟ ଆରମ୍ଭ ହେବା କ୍ଷଣି କାମଚଳା ବାଚସ୍ପତି ଭର୍ତ୍ତୃହରି ମହତାବ ବାଚସ୍ପତି ନିର୍ବାଚନ ପାଇଁ ଘୋଷଣା କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିର୍ଲାଙ୍କ ନାମ ନେଇ ପ୍ରସ୍ତାବ ରଖିଥିଲେ । ଏହାପରେ ଶିବସେନା (ଉଦ୍ଧବ ଗୋଷ୍ଠୀ) ସାଂସଦ ଅରବିନ୍ଦ ସାୱନ୍ତ କଂଗ୍ରେସ ସାଂସଦ କେ ସୁରେଶଙ୍କ ନାମ ପ୍ରସ୍ତାବ ରଖିଥିଲେ । ବାଚନିକ ଭୋଟରେ ବିର୍ଲାଙ୍କ ନାମରେ ମୋହର ବାଜିଥିଲା । ରାଜସ୍ଥାନର କୋଟାରୁ ବିଜେପି ସାଂସଦ ଥିବା ବିର୍ଲା ସପ୍ତଦଶ ଲୋକସଭାର ବି ବାଚସ୍ପତି ରହିଥିଲେ । ଓମ୍ ବିର୍ଲା ବାଚସ୍ପତି ନିର୍ବାଚିତ ହେବା ପରେ ପ୍ରଧାନମନ୍ତ୍ରୀ ମୋଦି ଓ ବିରୋଧୀ ଦଳ ନେତା ରାହୁଲ ଗାନ୍ଧୀ ପରମ୍ପରା ଅନୁସାରେ ବିର୍ଲାଙ୍କୁ ତାଙ୍କ ଚୌକି ପର୍ଯ୍ୟନ୍ତ ଛାଡ଼ିବାକୁ ଯାଇଥିଲେ ।
ହରିଆଣାରେ ବିଜେପିର ହାଟ୍ରିକ୍ ବିଜୟ
ହରିଆଣାରେ ବିଧାନସଭା ନିର୍ବାଚନ ଫଳକୁ ନେଇ ସମସ୍ତ ଏକ୍ଜିଟ୍ ପୋଲ୍ ଭୁଲ ପ୍ରମାଣିତ ହୋଇଥିଲା । ରାଜ୍ୟରେ ହାଟ୍ରିକ୍ ମାରିଥିଲା ବିଜେପି । ତୃତୀୟ ଥର ପାଇଁ ଗଢ଼ିଥିଲା ସରକାର । ବିଜେପି ରାଜ୍ୟର ଦୀର୍ଘ ୫୭ ବର୍ଷ ଇତିହାସରେ ପ୍ରଥମ ଦଳ ଭାବେ ତୃତୀୟଥର ପାଇଁ କ୍ଷମତାସୀନ ହୋଇଥିଲା । ହରିଆଣାର ମୋଟ ୯୦ ଆସନ ପାଇଁ ଗୋଟିଏ ପର୍ଯ୍ୟାୟରେ ଭୋଟ ଗ୍ରହଣ ହୋଇଥିଲା । ଫଳାଫଳ ଅନୁସାରେ ବିଜେପିକୁ ୪୮ ଆସନ ମିଳିଥିଲା । କଂଗ୍ରେସକୁ ୩୭ ଆସନ ମିଳିଥିଲା । ଓମ୍ ପ୍ରକାଶ ଚୌତାଲାଙ୍କ ଆଇଏନ୍ଏଲ୍ଡିକୁ ୨ଟି ଆସନ ମିଳିଥିଲା ବେଳେ ୩ଟି ଆସନରେ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଥିଲେ । ଦୁଶ୍ୟନ୍ତ ଚୌତାଲାଙ୍କ ଜେଜେପି (ଜନନାୟକ ଜନତା ପାର୍ଟି) ଖାତା ଖୋଲିପାରି ନ ଥିଲା । ଆପ୍ ସଂଯୋଜକ ଅରବିନ୍ଦ କେଜ୍ରିୱାଲଙ୍କ ଗୃହ ରାଜ୍ୟ ହରିଆଣା ହୋଇଥିଲେ ମଧ୍ୟ ଦଳ ଏଠାରେ ଖାତା ଖୋଲିପାରି ନ ଥିଲା । ୧୯୬୬ରେ ପଞ୍ଜାବରୁ ପୃଥକ ହୋଇ ହରିଆଣା ସ୍ୱତନ୍ତ୍ର ରାଜ୍ୟ ହେବା ପରେ ପ୍ରଥମ ଦଳ ଭାବେ ବିଜେପି କ୍ରମାଗତ ତୃତୀୟଥର ପାଇଁ କ୍ଷମତା ଦଖଲ କରିଥିଲା ।
ମହାୟୁତିକୁ ଜିତାପଟ
ମହାରାଷ୍ଟ୍ରର ୨୮୮ ବିଧାନସଭା ଆସନରେ ଏ ବର୍ଷ ଭୋଟ ହୋଇଥିଲା । ରାଜ୍ୟରେ ଶିବସେନା ଓ ଏନ୍ସିପି ଦୁଇଫାଳ ହୋଇଥିବା ଦୃଷ୍ଟିରୁ ଏଥର ନିର୍ବାଚନ ଉପରେ ସମଗ୍ର ଦେଶର ଜନତାଙ୍କ ନଜର ଥିଲା । ଉଦ୍ଧବ ଠାକରେ, ଏକନାଥ ସିନ୍ଦେ, ଶରଦ ପାୱାର ଓ ଅଜିତ ପାୱାରଙ୍କ ପାଇଁ ଏହା ଅଗ୍ନି ପରୀକ୍ଷା ଭଳି ହୋଇଥିଲା । ଏହି ନିର୍ବାଚନରେ ଯେ ମୋଦି ମ୍ୟାଜିକ୍ ଚାଲିଥିଲା, ତାହା ଭୋଟ ଫଳରୁ ସ୍ପଷ୍ଟ ଜଣାପଡ଼ିଥିଲା। ବିଜେପି ଏକାକୀ ୧୩୨ ଆସନ ପାଇଥିଲା । ଫଳରେ ବିଜେପି ନେତୃତ୍ୱାଧୀନ ମହାୟୁତି ମେଣ୍ଟକୁ ବିପୁଳ ଫାଇଦା ମିଳିଥିଲା । ମେଣ୍ଟ ଦଳ ଶିବସେନା ସିନ୍ଦେକୁ ୫୭ ଓ ଏନ୍ସିପି ଅଜିତକୁ ୪୧ ଆସନ ମିଳିଥିଲା । ମହାୟୁତି ମୋଟ ୨୩୦ ଆସନ ପାଇ ସରକାର ଗଢ଼ିଥିଲା । ଅନ୍ୟପକ୍ଷରେ ଶିବସେନା ଉଦ୍ଧବ ୨୦, କଂଗ୍ରେସ ୧୬ ଓ ଏନ୍ସିପି ଶରଦ ଗୋଷ୍ଠୀ ୧୦ଟି ଆସନରେ ଜିତିଥିଲା । ବିଜେପିକୁ ବିପୁଳ ସମର୍ଥନକ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟବାସୀଙ୍କୁ ଧନ୍ୟବାଦ ଜଣାଇଥିଲେ । ମହାରାଷ୍ଟ୍ରରେ ମହା ବିଜୟ ବିଜେପିକୁ ଜାତୀୟ ରାଜନୀତିରେ ଆହୁରି ସବଳ କରିଥିଲା ।
ଚମକିଲେ ସିନ୍ଦେ, ଅଜିତ
ମହାରାଷ୍ଟ୍ର ରାଜନୀତି ପାଇଁ ବିଦାୟୀ ବର୍ଷ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । କିଛିବର୍ଷ ଧରି ଲାଗିରହିଥିବା ରାଜନୈତିକ ହଟଚମଟ ୨୦୨୪ରେ ଶେଷ ହେବା ନେଇ ଆଶା ରହିଥିଲା । ସମଗ୍ର ଦେଶବାସୀଙ୍କ ନଜର ଏଥର ରାଜ୍ୟ ବିଧାନସଭା ନିର୍ବାଚନ ଉପରେ ନିବଦ୍ଧ ରହିଥିଲା । ଶିବସେନା ଓ ଏନ୍ସିପି ଦୁଇଫାଳ ହୋଇଯିବା ପରେ ଜନତା ପ୍ରକୃତରେ କାହାକୁ ଚାହିଁବେ, ତାହା ଜାଣିବାକୁ ସମସ୍ତେ ବ୍ୟଗ୍ର ଥିଲେ । ତେବେ ନଭେମ୍ବର ୨୩ରେ ଭୋଟ ଫଳ ଆସିଥିଲା । ଚମକିଥିଲେ ଶିବସେନା ସିନ୍ଦେ ଓ ଏନ୍ସିପି ଅଜିତ ଗୋଷ୍ଠୀ । ଅନ୍ୟପକ୍ଷରେ ଶିବସେନା ଉଦ୍ଧବ ଓ ଏନ୍ସିପି ଶରଦ ଗୋଷ୍ଠୀ ଫ୍ଲପ୍ ସୋ’ ପ୍ରମାଣିତ ହୋଇଥିଲେ ।
ଅଜିତ ଗୋଷ୍ଠୀ ପ୍ରକୃତ ଏନ୍ସିପି
ଲୋକସଭା ନିର୍ବାଚନ ପୂର୍ବରୁ ଏନ୍ସିପି ନେତା ଶରଦ ପାୱାରଙ୍କୁ ନିର୍ବାଚନ କମିଶନଙ୍କଠାରୁ ଶକ୍ତ ଧକ୍କା ଲାଗିଥିଲା । କମିଶନ ଅଜିତ ପାୱାରଙ୍କ ନେତୃତ୍ୱାଧୀନ ଏନ୍ସିପିକୁ ପ୍ରକୃତ ଏନ୍ସିପି ବୋଲି ଘୋଷଣା କରିଥିଲେ । ଏଥିସହ ଦଳୀୟ ନାମ ଓ ଚିହ୍ନ ବ୍ୟବହାର ପାଇଁ ଅଜିତଙ୍କୁ ଅନୁମତି ବି ଦେଇଥିଲେ । ଏହା ତାଙ୍କୁ ଫାଇଦା ଦେଇଥିଲା ।
ସିନ୍ଦେ ଗୋଷ୍ଠୀ ପ୍ରକୃତ ଶିବସେନା
ପ୍ରକୃତ ଶିବସେନା କାହାର ତାକୁ ନେଇ ବିଦାୟୀ ବର୍ଷରେ ବଳ କଷାକଷି ଚାଲିଥିଲା । ଏକନାଥ ସିନ୍ଦେ ଓ ଅନ୍ୟ ୧୫ ବିଧାୟକଙ୍କ ଅଯୋଗ୍ୟତା ମାମଲାକୁ ନେଇ ବାଚସ୍ପତି ରାହୁଲ ନାର୍ୱେକର ନିଷ୍ପତ୍ତି ନେଇଥିଲେ । ବାଚସ୍ପତି ନିଜର ୧୨୦୦ ପୃଷ୍ଠା ସମ୍ବଳିତ ନିଷ୍ପତ୍ତିରେ ସିନ୍ଦେଙ୍କ ସମେତ ସମସ୍ତ ୧୬ ବିଧାୟକଙ୍କ ସଦସ୍ୟତାକୁ କାଏମ ରଖିଥିଲେ । ଏଥିସହ ସିନ୍ଦେ ଗୋଷ୍ଠୀ ହିଁ ଅସଲି ଶିବସେନା ବୋଲି ଦର୍ଶାଇଥିଲେ ।
ହେମନ୍ତ-ଚମ୍ପାଇ କଳି
ବିଦାୟ ୨୦୨୪ ବର୍ଷରେ ଝାଡ଼ଖଣ୍ଡ ରାଜନୀତି ଦୃଷ୍ଟି ଆକର୍ଷଣ କରିଥିଲା । ଜମି ଦୁର୍ନୀତି ମାମଲାରେ ଜେଏମ୍ଏମ୍ ନେତା ହେମନ୍ତ ସୋରେନ ଜେଲ ଯିବା ପରେ ତାଙ୍କ ସ୍ଥାନରେ ଚମ୍ପାଇ ସୋରେନ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ସମ୍ଭାଳିଥିଲେ । ତେବେ ଜେଲରୁ ଫେରିବା କ୍ଷଣି ହେମନ୍ତ ପୁଣି ଗାଦି ଦଖଲ କରିଥିଲେ । ଏହାକୁ ନେଇ ଚମ୍ପାଇ ଅସନ୍ତୁଷ୍ଟ ହୋଇ ବିଦ୍ରୋହ କରିଥିଲେ । ଶେଷରେ ଦଳ ଛାଡ଼ି ବିଜେପିରେ ସାମିଲ ହୋଇଥିଲେ । ତାଙ୍କ ଯୋଗଦାନ ବିଜେପିକୁ ଫାଇଦା ଦେଇ ନ ଥିଲା । ଜେଏମ୍ଏମ୍-କଂଗ୍ରେସ ମେଣ୍ଟ ଜିତିଥିଲା ଏବଂ ହେମନ୍ତ ପୁଣି ମୁଖ୍ୟମନ୍ତ୍ରୀ ଚୌକିରେ ବସିଥିଲେ।
ହେମନ୍ତଙ୍କ ଦବ୍ଦବା
ଝାଡ଼ଖଣ୍ଡରେ ଏ ବର୍ଷ ବିଧାନସଭା ନିର୍ବାଚନ ହୋଇଥିଲା । ପୁଣି ଦବ୍ଦବା ଜାହିର କରିଥିଲେ ମୁଖ୍ୟମନ୍ତ୍ରୀ ହେମନ୍ତ ସୋରେନ । ହେମନ୍ତଙ୍କ ଜେଏମ୍ଏମ୍ ନେତୃତ୍ୱାଧୀନ ମେଣ୍ଟ କ୍ଷମତାସୀନ ହୋଇଥିଲା । ରାଜ୍ୟର ୮୧ଟି ବିଧାନସଭା ଆସନ ମଧ୍ୟରୁ ଜେଏମ୍ଏମ୍ ମେଣ୍ଟ ୫୬ଟି ଆସନ ଜିତିଥିଲା । ଏହା ବହୁମତ ସଂଖ୍ୟା ୪୧ରୁ ଅଧିକ ଥିଲା । କେବଳ ଜେଏମ୍ଏମ୍କୁ ୩୪ଟି ଆସନ ମିଳିଥିଲା ବେଳେ କଂଗ୍ରେସକୁ ୧୬ ଓ ଆର୍ଜେଡିକୁ ୪ଟି ଓ ସିପିଆଇ(ଏମ୍ଏଲ୍)କୁ ୨ଟି ଆସନ ମିଳିଥିଲା । ଅନ୍ୟପକ୍ଷରେ ଏନ୍ଡିଏ ମେଣ୍ଟ ୨୪ଟି ଆସନ ପାଇଥିଲା । ବିଜେପି ଏକାକୀ ୨୧ଟି ଆସନ ଜିତିଥିଲା । ଜେଏମ୍ଏମ୍ ମେଣ୍ଟ ଜିତିବା ପରେ ହେମନ୍ତ ସୋରେନ ପୁଣି ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଏ ବର୍ଷ ଜେଏମ୍ଏମ୍ରୁ ପୃଥକ୍ ହୋଇ ଚମ୍ପାଇ ସୋରେନ ବିଜେପି ଟିକଟରୁ ଲଢ଼ିଥିଲେ । ହେମନ୍ତଙ୍କ ପାଇଁ ଏହା ସମସ୍ୟା ସୃଷ୍ଟି କରିପାରେ ବୋଲି କୁହାଯାଉଥିଲା । କିନ୍ତୁ ସେଭଳି କିଛି ହୋଇ ନ ଥିଲା । ଚମ୍ପାଇଙ୍କ ଯୋଗଦାନ ବିଜେପିକୁ ଫାଇଦା ଦେଇ ନ ଥିଲା । ଜମି ଦୁର୍ନୀତି ମାମଲାରେ ଜେଲ ଯାଇ ବି ହେମନ୍ତ ନିଜ ପତିଆରା ବଜାୟ ରଖିବାରେ ସମର୍ଥ ହୋଇଥିଲେ ।
ଭାଇ ଗଡ଼ ରଖିଲେ ଭଉଣୀ
ଚଳିତବର୍ଷ ଅନୁଷ୍ଠିତ ଲୋକସଭା ନିର୍ବାଚନରେ କଂଗ୍ରେସ ନେତା ରାହୁଲ ଗାନ୍ଧୀ ୟୁପିର ରାଏବରେଲି ଓ କେରଳର ୱାୟନାଡ ଆସନରୁ ଲଢ଼ି ଉଭୟରେ ଜିତିଥିଲେ । ଏହାପରେ ସେ ରାଏବରେଲି ରଖି ୱାୟନାଡ ଛାଡ଼ିଦେଇଥିଲେ । ଫଳରେ ଏଠାରେ ଉପନିର୍ବାଚନ ହୋଇଥିଲା । ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ପ୍ରାର୍ଥୀ କରିଥିଲା କଂଗ୍ରେସ । ପ୍ରିୟଙ୍କା ନିଜର ପ୍ରଥମ ପ୍ରବେଶରେ ବିଜୟ ଟିକା ପିନ୍ଧିଥିଲେ । ସେ ଭାଇ ରାହୁଲଙ୍କ ଗଡ଼ ରଖିବାରେ ସମର୍ଥ ହୋଇଥିଲେ । ପ୍ରିୟଙ୍କାଙ୍କୁ ୬.୨୨ ଲକ୍ଷରୁ ଅଧିକ ଭୋଟ ମିଳିଥିଲା ବେଳେ ଦ୍ୱିତୀୟ ସ୍ଥାନରେ ଥିବା ସିପିଆଇର ସତ୍ୟନ ମୋକେରି ୨.୧୧ ଲକ୍ଷ ଓ ବିଜେପିର ନବ୍ୟା ହରିଦାସଙ୍କୁ ୧.୦୯ ଲକ୍ଷ ଭୋଟ ମିଳିଥିଲା ।
କଂଗ୍ରେସକୁ ବିରୋଧୀ ଆସନ
ତମାମ ଏକ୍ଜିଟ୍ ପୋଲ୍କୁ ଭୁଲ ପ୍ରମାଣିତ କରି କଂଗ୍ରେସ ଏଥର ସାଧାରଣ ନିର୍ବାଚନରେ ବଡ଼ ସଫଳତା ପାଇଥିଲା । ଦଳ ଏକାକୀ ୯୯ ଆସନରେ ଜିତିଥିଲା । କଂଗ୍ରେସ ସମେତ ବିରୋଧୀ ଦଳଙ୍କ ‘ଇଣ୍ଡିଆ’ ମେଣ୍ଟକୁ ୨୩୪ ଆସନ ମିଳିଥିଲା । ୧୦ ବର୍ଷ ମଧ୍ୟରେ ପ୍ରଥମ ଥର ପାଇଁ ବିରୋଧୀ ଆସନ ଦଖଲ କରିଥିଲା କଂଗ୍ରେସ । ଦଳୀୟ ସାଂସଦ ରାହୁଲ ଗାନ୍ଧୀ ଲୋକସଭାରେ ବିରୋଧୀ ଦଳ ନେତା ହୋଇଥିଲେ । କଂଗ୍ରେସର ଏହି ସଫଳତା ଦେଶବ୍ୟାପୀ ଦଳର ନେତା ଓ କର୍ମୀଙ୍କ ମଧ୍ୟରେ ନୂଆ ଉତ୍ସାହ ଭରିଥିଲା । ବର୍ଷ ଶେଷ ବେଳକୁ କଂଗ୍ରେସ ସାଂସଦ ସଂଖ୍ୟା ବଢ଼ିଥିଲା । ଉପନିର୍ବାଚନରେ ଦଳକୁ ଫାଇଦା ମିଳିଥିଲା । ୱାୟନାଡ ଓ ନାନ୍ଦେଡ଼ ଲୋକସଭା ଆସନ କଂଗ୍ରେସ ଖାତାକୁ ଆସିଥିଲା ।
ଫ୍ଲପ୍ ମାରିଲା ‘ଇଣ୍ଡିଆ’
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିଜେପିକୁ ରୋକିବା ପାଇଁ ବିରୋଧୀ ଦଳଗୁଡ଼ିକ ୨୦୨୩ରେ ହାତ ମିଳାଇଥିଲେ । ‘ଇଣ୍ଡିଆ’ ନାମରେ ଗଢ଼ିଥିଲେ ମହାମେଣ୍ଟ । ଦିଲ୍ଲୀ, ପାଟନା ଭଳି ସ୍ଥାନରେ ଏହାର ସଭା ବସିଥିଲା । ନୀତି ଓ ରଣନୀତି ବି ପ୍ରସ୍ତୁତ ହୋଇଥିଲା । ପ୍ରଭାବ ବି ବଢ଼ିବାକୁ ଲାଗିଥିଲା । କିନ୍ତୁ ପ୍ରଧାନମନ୍ତ୍ରୀ ଚେହେରା ନ ଥିବାରୁ ମେଣ୍ଟକୁ ଅକୁଣ୍ଠ ସମର୍ଥନ ମିଳି ନ ଥିଲା । ଏହାକୁ ନେଇ ଫାଟ ବି ସୃଷ୍ଟି ହୋଇଥିଲା । ମେଣ୍ଟ ଗଢ଼ିଥିବା ପ୍ରମୁଖ ନେତା ନୀତୀଶ କୁମାର ଶେଷରେ ଏନ୍ଡିଏରେ ସାମିଲ ହୋଇଥିଲେ । ଫଳରେ ଲୋକସଭା ନିର୍ବାଚନରେ ଫ୍ଲପ୍ ମାରିଥିଲା ‘ଇଣ୍ଡିଆ’ । ବର୍ଷ ଶେଷ ବେଳକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହାର ନେତୃତ୍ୱ ନେବାକୁ ଇଚ୍ଛା ପ୍ରକାଶ କରିଥିଲେ । ଶିବସେନା ୟୁବିଟି ଓ ସପା ସମର୍ଥନ ଦେବେ ବୋଲି କହିଥିଲେ ।
ଜମ୍ମୁ-କାଶ୍ମୀରରେ ଏନ୍ସି-କଂଗ୍ରେସ
ଧାରା ୩୭୦ ହଟିବା ପରେ ଚଳିତବର୍ଷ ପ୍ରଥମ ଥର ପାଇଁ ଜମ୍ମୁ-କାଶ୍ମୀରରେ ବିଧାନସଭା ନିର୍ବାଚନ ହୋଇଥିଲା ।୯୦ ଆସନ ପାଇଁ ଅକ୍ଟୋବର ୫ରେ ଗୋଟିଏ ପର୍ଯ୍ୟାୟରେ ମତଦାନ ହୋଇଥିଲା । ଏଥିରେ ବିଜେପି ଜିତିବା ନେଇ ଆଶା ରଖିଥିଲା । ଦଳର ହେଭିୱେଟ୍ ନେତାମାନେ ଘନଘନ ଜମ୍ମୁ-କାଶ୍ମୀର ଗସ୍ତ କରି ପ୍ରଚାର ଅଭିଯାନକୁ ତୀବ୍ର କରିଥିଲେ । କିନ୍ତୁ ନ୍ୟାସନାଲ କନ୍ଫରେନ୍ସ (ଏନ୍ସି)କୁ ବିପୁଳ ସଫଳତା ମିଳିଥିଲା । ଏନ୍ସି-କଂଗ୍ରେସ-ସିପିଏମ୍ ମେଣ୍ଟ ୪୯ ଆସନ ପାଇ ସରକାର ଗଢ଼ିଥିଲା । ଏନ୍ସି ନେତା ଓମାର ଅବଦୁଲ୍ଲା ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଏନ୍ସିକୁ ୪୨ ଆସନ ମିଳିଥିଲା ବେଳେ ଏହାର ସହଯୋଗୀ କଂଗ୍ରେସକୁ ୬ ଓ ସିପିଏମ୍କୁ ଗୋଟିଏ ଆସନ ମିଳିଥିଲା । ବିଜେପି ୨୯ ଆସନ ଜିତିଥିଲା ବେଳେ ମେହବୁବା ମୁଫତିଙ୍କ ପିଡିପିକୁ ୩ଟି ଆସନ ମିଳିଥିଲା । ଅନ୍ୟ ୯ଟି ଆସନରୁ ୭ଟିରେ ସ୍ୱାଧୀନ ପ୍ରାର୍ଥୀ ଜିତିଥିଲା ବେଳେ ଆପ୍ ଏବଂ ଜେକେପିସି ଗୋଟିଏ ଲେଖାଏ ଆସନ ହାସଲ କରିଥିଲେ ।
