- ବାଇକ୍, ଫ୍ରିଜ୍ ଥିଲେ ବି ମିଳିବ
- ତଥ୍ୟ ଯାଞ୍ଚ କରିବେ କ୍ଷେତ୍ର ଅଧିକାରୀ, ବିଡିଓ
- ଲୋକଙ୍କୁ ଶିଖାଇବାକୁ ୨ ତାରିଖରୁ ପଞ୍ଚାୟତରେ କର୍ମଶାଳା
- ବିପର୍ଯ୍ୟୟ ପ୍ରତିରୋଧୀ ନକ୍ସା ଅନୁସାରେ ହେବ ଘର
ଭୁବନେଶ୍ୱର,୨୮/୧୧: ଆବାସ ଘର ବଣ୍ଟାରେ ଏଣିକି ରାଜନୈତିକ ହସ୍ତକ୍ଷେପ କାଟୁ କରିବନି । କେହି ଚାହିଁଲେ ବି ଯୋଗ୍ୟ ହିତାଧିକାରୀକୁ ଆବାସ ଘର ଦେବାରୁ ଅଟକାଇ ପାରିବେନି । ବ୍ଲକ୍ର କୌଣସି କର୍ମଚାରୀ, ପଞ୍ଚାୟତ ନିର୍ବାହୀ ଅଧିକାରୀ କି ସରପଞ୍ଚଙ୍କ ଜରିଆରେ ଆଉ ଆବାସ ସର୍ଭେ ହେବନି । ଲୋକେ ନିଜେ ନିଜର ସର୍ଭେ କରିବେ । ଆପ ଖୋଲି ଗୋଟି ଗୋଟି କରି ନିଜ ତଥ୍ୟ ଭରିବେ । ପୁରୁଣା ଘରର ଫଟୋ ଉଠାଇ ଅପଲୋଡ୍ କରିବେ । ସବୁ ତଥ୍ୟ ସିଧାସଳଖ ଆବାସ ପ୍ଲସ୍ ପୋର୍ଟାଲକୁ ଚାଲିଯିବ । ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ) ଘର ଦେବାକୁ ପଞ୍ଚାୟତିରାଜ ବିଭାଗ ପ୍ରସ୍ତୁତ କରିଥିବା ନୂଆ ଗାଇଡ୍ଲାଇନରେ ଏଭଳି ବ୍ୟବସ୍ଥା ଯୋଡ଼ିଛନ୍ତି ।
ନୂଆ ଗାଇଡଲାଇନ୍ରେ ଅନେକ ପୁରୁଣା ବ୍ୟବସ୍ଥାକୁ ହଟାଯାଇଛି । ଆବାସ ଘର ଯୋଜନାରେ ରାଜନୈତିକ ମନମାନି ଓ ଲାଞ୍ଚ କାରବାରକୁ ରୋକିବାକୁ ଏହି ଆପ୍ ବ୍ୟବହାର କରାଯିବ । ଉଦ୍ଦେଶ୍ୟ ହେଲା, ଯୋଗ୍ୟ ହିତାଧିକାରୀ ବଞ୍ଚିତ ହେବେନି ବା ଅଯୋଗ୍ୟ ହିତାଧିକାରୀ ଘର ହାତେଇବେନି । ଯଦି କିଏ କାରସାଦି କରିବ ତେବେ ନିଜ ଫାନ୍ଦରେ ନିଜେ ଫସିବ । ଆବାସ ଯୋଜନାରେ ଥିବା ବ୍ୟବସ୍ଥାକୁ ନୂଆ ସରକାର ଆମୂଳଚୁଳ ପରିବର୍ତ୍ତନ କରିଛନ୍ତି । ପୂର୍ବରୁ ବାଇକ୍, ଫ୍ରିଜ୍ ଓ ଲ୍ୟାଣ୍ଡଲାଇନ ଫୋନ୍ ଥିଲେ ଆବାସ ଘର ମିଳିବନି ବୋଲି ନିୟମ ଥିଲା । କିନ୍ତୁ ଏହାକୁ ବଦଳା ଯାଇଛି । ଏ ସବୁ ଥିଲେ ବି ଆବାସ ଘର ଦିଆଯିବ । ପୂର୍ବରୁ ପରିବାରର ମାସିକ ଆୟ ସୀମା ସର୍ବାଧିକ ୧୦ ହଜାର ରହିଥିଲା । ଏହାକୁ ୧୫ ହଜାର କରାଯାଇଛି ।
ଲୋକେ କିଭଳି ନିଜେ ନିଜର ସର୍ଭେ କରିବେ, ତାହା ଶିଖାଇବାକୁ ପଞ୍ଚାୟତସ୍ତରରେ କର୍ମଶାଳା ହେବ । ୧୫ ବା ୧୫ରୁ କମ୍ ସଂଖ୍ୟକ ପଞ୍ଚାୟତ ଥିବା ବ୍ଲକ୍ରେ ଡିସେମ୍ବର ୨ ତାରିଖରେ କର୍ମଶାଳା ହେବ । ୧୬ରୁ ୨୫ଟି ପଞ୍ଚାୟତ ଥିବା ବ୍ଲକ୍ରେ ୨ ଓ ୩ ତାରିଖରେ କର୍ମଶାଳା ହେବ । ୨୫ରୁ ଅଧିକ ପଞ୍ଚାୟତ ଥିବା ବ୍ଲକ୍ରେ ୨, ୩ ଓ ୪ ତାରିଖରେ କର୍ମଶାଳା ହେବ । ସ୍ଥାନୀୟ ଲୋକେ ଯେଭଳି ଏହି ଆବାସ କର୍ମଶାଳା ହେଉଛି ବୋଲି ଜାଣିପାରିବେ ସେଥିପାଇଁ ବ୍ୟାପକ ପ୍ରଚାର ପ୍ରସାର କରିବାକୁ କୁହାଯାଇଛି ।
କର୍ମଶାଳାରେ ଲୋକେ କିଭଳି ନିଜେ ନିଜର ସର୍ଭେ କରିବେ ତାହାର ପ୍ରଶିକ୍ଷଣ ଦିଆଯିବ । ସର୍ଭେ ସମୟରେ ପରିବାର ସଦସ୍ୟଙ୍କ ଆଧାର କାର୍ଡ, ଜବ୍ କାର୍ଡ ଓ ବ୍ୟାଙ୍କ ଖାତା ବିବରଣୀ (ପାସବୁକ୍) ଆବଶ୍ୟକ ପଡ଼ିବ । ଏହାକୁ ପ୍ରସ୍ତୁତ ରଖିବାକୁ ଲୋକଙ୍କୁ କୁହାଯିବ । ଗତ ୧୮ ତାରିଖରେ ସବୁ ବ୍ଲକ୍ ସ୍ତରୀୟ କର୍ମଚାରୀଙ୍କୁ ତାଲିମ ଦିଆଯାଇଛି । ସର୍ଭେ ଠିକ୍ରେ ହେଉଛି କି ନା, ତାହାକୁ ଦେଖିବାକୁ ବ୍ଲକ କର୍ମଚାରୀଙ୍କୁ ଦାୟିତ୍ୱ ବଣ୍ଟାଯିବ । ସେମାନେ ସର୍ଭେ କାମ ପାଇଁ ଉତ୍ତରଦାୟୀ ରହିବେ ।
ଯେଉଁମାନେ ନିଜେ ସର୍ଭେରେ ତଥ୍ୟ ଭରି ନ ପାରିବେ ବ୍ଲକ୍ କର୍ମଚାରୀ ସେମାନଙ୍କୁ ସହାୟତା କରିବେ । ବ୍ଲକ୍ କର୍ମଚାରୀ ଗାଁର ପ୍ରତି ସାହିକୁ ଯାଇ ଘର ନଥିବା ଓ କଚ୍ଚା ଘରେ ରହୁଥିବା ପରିବାରକୁ ସର୍ଭେରେ ଯୋଡ଼ିବେ । ଆବାସ ଘର ପାଇବାକୁ ଯୋଗ୍ୟ ଭାବୁଥିବା ସବୁ ପରିବାରକୁ ତାଲିକାଭୁକ୍ତ କରି ସର୍ଭେରେ ଯୋଡ଼ାଯିବ ।
କୌଣସି ମୂଳ ପରିବାରର ସଦସ୍ୟମାନେ ଅଲଗା ରହୁଥିଲେ ସେମାନଙ୍କୁ ଏହି ସର୍ଭେରେ ଭିନ୍ନ ପରିବାର ଭାବେ ଗଣାଯିବ । ଯୋଗ୍ୟ ଭିନ୍ନକ୍ଷମ ସଦସ୍ୟ, ତୃତୀୟଲିଙ୍ଗୀ, ବିଧବା, ନିରାଶ୍ରୟ, ମୁକ୍ତ ଗୋତି ଶ୍ରମିକଙ୍କ ପରିବାରକୁ ସର୍ଭେରେ ସାମିଲ ପାଇଁ ପ୍ରାଥମିକତା ଦିଆଯିବ । ଏଥିପାଇଁ ପଞ୍ଚାୟତରାଜ ବିଭାଗ ପକ୍ଷରୁ ବିଡିଓଙ୍କୁ ନିର୍ଦ୍ଦେଶ ଦିଆଯାଇଛି ।
ଲୋକେ ସର୍ଭେ କରିବା ପରେ କ୍ଷେତ୍ରସ୍ତରୀୟ ଅଧିକାରୀ ଏହାକୁ ଯାଞ୍ଚ କରିବେ । ସେମାନେ ପରିବାର ସଦସ୍ୟଙ୍କର ବୟସ, ବୃତ୍ତି, ଶିକ୍ଷାଗତ ଯୋଗ୍ୟତା, ଆଧାର ନମ୍ବର, ଜବ୍ କାର୍ଡ ନଂ ଓ ରୋଜଗାର ତଥ୍ୟକୁ ସଂଗ୍ରହ କରିବେ । କେଉଁ କାରଣ ପାଇଁ ଜଣେ ଆବାସ ଯୋଜନା ପାଇଁ ଅଯୋଗ୍ୟ, କ୍ଷେତ୍ର ଅଧିକାରୀ ତାକୁ ଆପ୍ରେ ଉଲ୍ଲେଖ କରିବେ । ପରିବାର ମୁଖ୍ୟଙ୍କଠାରୁ ତଥ୍ୟ ସଂଗ୍ରହ ପରେ ଏହି କାରଣକୁ ଆପସ୍ରେ ସ୍ପଷ୍ଟ ଭାବେ ଦର୍ଶାଯିବ । ସବୁଠୁ ବଡ଼ କଥା ହେଉଛି, ପରିବାରର ମହିଳା ମୁଖ୍ୟଙ୍କୁ ଆବାସ ଯୋଜନାର ହିତାଧିକାରୀ ଭାବେ ଧରାଯିବ । ତାଙ୍କ ନାଁରେ ୱାର୍କ ଅର୍ଡର ଦିଆଯିବ । ଯେଉଁ ପରିବାରରେ ପ୍ରାପ୍ତ ବୟସ୍କା ମହିଳା ନଥିବେ ସେ କ୍ଷେତ୍ରରେ କାହା ନାଁରେ ଆବାସ ୱାର୍କ ଅର୍ଡର ଦିଆଯିବ ତାହା ବ୍ଲକ୍ସ୍ତରୀୟ କର୍ମଚାରୀ ନିଷ୍ପତ୍ତି ନେବେ ।
ଆବାସ ଯୋଜନାରେ ମିଳିବାକୁ ଥିବା ଘର ଯେଭଳି ବନ୍ୟା, ବାତ୍ୟା ଭଳି ବିପର୍ଯ୍ୟୟକୁ ମୁକାବିଲା କରିପାରିବ ସେଥିପାଇଁ ସରକାର ଏକାଧିକ ଘର ନିର୍ମାଣ ଡିଜାଇନ୍ ବା ନକ୍ସା ପ୍ରସ୍ତୁତ କରିଛନ୍ତି । ସର୍ଭେ ସମୟରେ ବ୍ଲକ କର୍ମଚାରୀ ହିତାଧିକାରୀଙ୍କୁ ଏହି ନକ୍ସା ଦେଖାଇବେ । ହିତାଧିକାରୀ ଯେଉଁ ନକ୍ସା ବାଛିବେ ସେହି ହିସାବରେ ଘର ତିଆରି କରିବାକୁ ପଡ଼ିବ । ହିତାଧିକାରୀ ଯଦି ରାଜମିସ୍ତ୍ରୀ ତାଲିମ ନେବାକୁ ଚାହିଁବେ ସରକାର ଏଥିପାଇଁ ବ୍ୟବସ୍ଥା କରିବେ ।
ହିତାଧିକାରୀ ନିଜେ କରିଥିବା ନିଜର ସର୍ଭେ ଓ କ୍ଷେତ୍ର ଅଧିକାରୀ କରିଥିବା ସର୍ଭେକୁ ମିଶାଇ ଗୋଟିଏ ତାଲିକା ପଞ୍ଚାୟତ ଅଫିସ୍ରେ ପ୍ରଦର୍ଶିତ କରାଯିବ । ଏହାର ଆଉ ୧୫ ଦିନ ପରେ ପୁଣି ସର୍ଭେ ହୋଇଥିବା ଲୋକଙ୍କ ତାଲିକା ଝୁଲାଯିବ । ସର୍ଭେରୁ କିଏ ବାକି ରହି ଯାଇଥିଲେ ଗାଁ ଲୋକେ ଜାଣିପାରିବେ । ସର୍ଭେ ସରିବା ପରେ ଚୂଡ଼ାନ୍ତ ତାଲିକା ପ୍ରଦର୍ଶନ କରାଯିବ । କୌଣସି ଅଯୋଗ୍ୟ ବ୍ୟକ୍ତି ତାଲିକାରେ ସାମିଲ ହୋଇଥିଲେ ଲୋକେ ଅଭିଯୋଗ କରିପାରିବେ । ଉଭୟ ଯୋଗ୍ୟ ଓ ହିତାଧିକାରୀଙ୍କ ତାଲିକା ଗ୍ରାମସଭାରେ ଉପସ୍ଥାପନ ହେବ ବୋଲି ପଞ୍ଚାୟତିରାଜ ବିଭାଗ ସୂତ୍ରରୁ ସୂଚନା ମିଳିଛି । ସର୍ଭେ ଆରମ୍ଭ ହେବାର ଦୁଇ ମାସ ଭିତରେ ପୂରା ପ୍ରକ୍ରିୟା ଶେଷ କରିବାକୁ ନିର୍ଦ୍ଦେଶ ଦିଆଯାଇଛି।
