ନୂଆଦିଲ୍ଲୀ ୦୪/୦୩: ସୁପ୍ରିମକୋର୍ଟ ସୋମବାର ବିବାଦୀୟ ୟୁଟ୍ୟୁବର ରଣବୀର ଆହ୍ଲାବାଦିଆଙ୍କୁ ନିଜ ପଡ୍କାଷ୍ଟ ‘ଦ ରଣବୀର ଶୋ’ ପୁନର୍ବାର ଆରମ୍ଭ ନିମନ୍ତେ ଅନୁମତି ଦେଇଛନ୍ତି । ଏଥିପାଇଁ କିଛି ସର୍ତ୍ତ ରହିଛି । କୋର୍ଟ କହିଛନ୍ତି, ଆହ୍ଲାବାଦିଆ ସଭ୍ୟତା ଓ ନୈତିକତା ବଜାୟ ରଖିବା ଉଚିତ । ଶୋ’ ରେ ମାମଲାକୁ ନେଇ ସେ କୌଣସି ଟିପ୍ପଣୀ ଦେବେନାହିଁ । ଅଶ୍ଳୀଳତା ପ୍ରଦର୍ଶନ ବି କରିବେ ନାହିଁ । ସୁପ୍ରିମକୋର୍ଟ ଏହି ପରିପ୍ରେକ୍ଷୀରେ କେନ୍ଦ୍ର ସରକାରଙ୍କୁ ମିଡିଆ କଣ୍ଟେଣ୍ଟର ନିୟନ୍ତ୍ରଣ ଲାଗି ମାର୍ଗଦର୍ଶିକା ପ୍ରସ୍ତୁତ କରିବାକୁ କହିଛନ୍ତି ।
ରଣବୀରଙ୍କ ମାମଲାର ଶୁଣାଣି କରି ବିଚାରପତି ସୂର୍ଯ୍ୟ କାନ୍ତ ଓ ଏନ୍ କୋଟିଶ୍ୱର ସିଂହଙ୍କ ଖଣ୍ଡପୀଠ କହିଛନ୍ତି, ଅଶ୍ଳୀଳ ଭାଷା ବ୍ୟବହାରକୁ ପ୍ରତିଭା ଭାବେ ବିବେଚନା କରାଯିବା ଉଚିତ ନୁହେଁ । ତେଣୁ ଏହା ଉପରେ ନିୟାମକ ପଦକ୍ଷେପ ଗ୍ରହଣ କରାଯିବା ଆବଶ୍ୟକ । ଜଷ୍ଟିସ୍ ସୂର୍ଯ୍ୟ କାନ୍ତ କହିଛନ୍ତି, ହାସ୍ୟ ରସାତ୍ମକ କାର୍ଯ୍ୟକ୍ରମ ଏଭଳି ହେବା ଉଚିତ, ଯାହାକୁ ପୂରା ପରିବାର ବସି ଉପଭୋଗ କରିପାରିବ ଏବଂ କେହି ଏହାକୁ ନେଇ ଲଜ୍ଜା ଅନୁଭବ କରିବେ ନାହିଁ ।
ଉଲ୍ଲେଖଯୋଗ୍ୟ, ୟୁଟ୍ୟୁବର ରଣବୀର ପିଟିସନ ଦାଖଲ କରି କୋର୍ଟଙ୍କର କିଛି ଆଦେଶକୁ କୋହଳ କରିବାକୁ ଅନୁରୋଧ କରିଥିଲେ । ଏଥିରେ ଶୋ’କୁ ପୁନଃ ପ୍ରସାରଣ ଲାଗି ଅନୁମତି ଦେବା ସାମିଲ ଥିଲା । ସମୟ ରାଇନାଙ୍କ ‘ଇଣ୍ଡିଆସ୍ ଗଟ୍ ଲାଟେଣ୍ଟ’ ଶୋ’ରେ ପିତାମାତାଙ୍କ ଉପରେ ଅଶ୍ଳୀଳ ଟିପ୍ପଣୀ ଦିଆଯିବାକୁ ନେଇ ଅନେକ ସହରରେ ଏଫ୍ଆଇଆର୍ ହୋଇଥିଲା । ଏହାପରେ ଆହ୍ଲାବାଦିଆଙ୍କ ପଡ୍କାଷ୍ଟ ‘ଦ ରଣବୀର ଶୋ’ରେ ସେଲିବ୍ରିଟିମାନେ ସାମିଲ ହେବାକୁ ମନା କରିଦେଇଥିଲେ । ଆହ୍ଲାବାଦିଆ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇ ଅନୁରୋଧ କରିଥିଲେ କି ତାଙ୍କ ବିରୋଧରେ ହୋଇଥିବା ଏଫ୍ଆଇଆର୍ ଓ ଗିରଫଦାରି ଉପରେ ରୋକ୍ ଲଗାଯିବା ଉଚିତ । ଫେବ୍ରୁଆରୀ ୧୮ରେ ସର୍ବୋଚ୍ଚ ଅଦାଲତ ଅନ୍ତରୀଣ ଆଦେଶ ପ୍ରଦାନ କରି ରଣବୀରଙ୍କ ଗିରଫଦାରି ଉପରେ ରୋକ୍ ଲଗାଇଥିଲେ । ତତ୍ସହିତ ପରବର୍ତ୍ତୀ ଆଦେଶ ନ ମିଳିବା ଯାଏ ରଣବୀର ଓ ତାଙ୍କ ସାଥୀ କୌଣସି ଶୋ’ କରିପାରିବେ ନାହିଁ ବୋଲି କହିଥିଲେ ।
