ଭୁବନେଶ୍ୱର ୧୦/୧୨: ଆସନ୍ତା ଜାନୁଆରୀ ୮ରୁ ୧୦ ତାରିଖ ଯାଏ ହେବାକୁ ଯାଉଛି ୧୮ତମ ପ୍ରବାସୀ ଭାରତୀୟ ଦିବସ। ଏହି ଦିବସକୁ ନେଇ ପ୍ରତିକ୍ରିୟା ରଖିଛନ୍ତି ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା। ସେ କହିଛନ୍ତି, ପର୍ଯ୍ୟଟନ ବିଭାଗ ସମ୍ପୂର୍ଣ୍ଣ ପ୍ରସ୍ତୁତ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଗୋଟିଏ ହାଇ ପାୱାର କମିଟିରେ ବୈଠକ ଶେଷ ହୋଇଛି । ଆମର ସୌଭାଗ୍ୟ ଯେ ଚଳିତଥର ଭୁବନେଶ୍ବରରେ ହେବ ପ୍ରବାସୀ ଭାରତୀୟ ଦିବସ । ଓଡ଼ିଶା ଅତିଥି ଦେବୋ ଭବରେ ବିଶ୍ୱାସ କରେ । ନୂଆ ବର୍ଷ ନୂଆ ଉଦ୍ଦୀପନା ଦେବ । ପର୍ଯ୍ୟଟନ ବିଭାଗ ରହିବାର ବ୍ୟବସ୍ଥା ଦେଖୁଛି । ଓଡ଼ିଶାକୁ ସାଂସ୍କୃତିକ ରାଜ୍ୟ ଭାବେ ବିଶ୍ଵ ଦରବାରରେ ଦେଖେଇବାକୁ ଆମେ ଚେଷ୍ଟା କରିବୁ ।
ସେ ଆହୁରି କହିଛନ୍ତି, ସୁରକ୍ଷା ଠୁ ନେଇ ରହିବା, ବୁଲିବା ସବୁ ଦାୟିତ୍ୱ ପର୍ଯ୍ୟଟନ ବିଭାଗର । ଭୁବନେଶ୍ୱର ସମେତ କଟକ, ପୁରୀ, କୋଣାର୍କ, ଚିଲିକା, ରତ୍ନଗିରି, ଲଳିତଗିରି, ଚଉଷଠି ଯୋଗିନୀ ,ବେଳାଭୂମି, ଖଣ୍ଡଗିରୀ ଏବଂ ଉଦୟଗିରି, ଚିଲିକା ବର୍ ଫେଷ୍ଟିଭାଲ ଭଳି ସବୁ ସ୍ଥାନରେ ଭିତ୍ତିଭୂମି ସାଜଡ଼ିଛୁ । ପ୍ରବାସୀମାନେ ବୁଲିବାକୁ ଯିବା ପାଇଁ ସବୁଠି ପ୍ରସ୍ତୁତି ହୋଇଛି। ଯେତେ ପ୍ରବାସୀ ରେଜିଷ୍ଟ୍ରେସନ କରିବେ ସମସ୍ତଙ୍କ ପାଇଁ ରହିବାର ବ୍ୟବସ୍ଥା ହୋଇଛି । ଚଳିତ ଥର ନୂଆକରି ହୋମ ଷ୍ଟେ ବ୍ୟବସ୍ଥା ହୋଇଛି । ୩୦୦ ପାଖାପାଖି ରୁମ୍ ଏବେ ସୁଦ୍ଧା ପ୍ରସ୍ତୁତ ରହିଛି । ଲୋକଙ୍କ ଘରେ ଅତିଥି ରହିବେ । ଯେଉଁମାନେ ରହିବେ ନିଜ ଘରେ ଅତିଥିଙ୍କୁ ରଖିବା ପାଇଁ ପର୍ଯ୍ୟଟନ ବିଭାଗର ଅନଲାଇନ ପୋର୍ଟାଲରେ ଆବେଦନ କରିପାରିବେ । ଯାହା ଦ୍ଵାରା ଲୋକଙ୍କ ରୋଜଗାର ବଢିବ । ଟୁରିଜିମ ବିଭାଗ ସବୁ ଦାୟିତ୍ୱ ତୁଲାଇବ ।
ତେବେ ଆସନ୍ତା ଜାନୁଆରୀ ୮ରୁ ୧୦ ତାରିଖ ଯାଏ ହେବାକୁ ଥିବା ୧୮ତମ ପ୍ରବାସୀ ଭାରତୀୟ ଦିବସର ଥିମ୍ ରହିଛି ‘ଡାଏସ୍ପୋରାସ୍ କଣ୍ଟ୍ରିବ୍ୟୁସନ୍ ଟୁ ଏ ବିକଶିତ ଭାରତ’ । ଏଥିରେ ବିଦେଶରେ ରହୁଥିବା ପ୍ରାୟ ୧୦ହଜାର ପ୍ରବାସୀ ଭାରତୀୟ ସାମିଲ ହେବେ । ଏହି ମେଗା କାର୍ଯ୍ୟକ୍ରମକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍ଘାଟନ କରିବେ । କାର୍ଯ୍ୟକ୍ରମ ଅବସରରେ ଯୁବବର୍ଗଙ୍କ ପାଇଁ ଏକ ସ୍ୱତନ୍ତ୍ର ଅଧିବେଶନ ହେବ । କେନ୍ଦ୍ର କ୍ରୀଡ଼ା ଓ ଯୁବବ୍ୟାପାର ମନ୍ତ୍ରାଳୟ ସହଯୋଗରେ ଏହି କାର୍ଯ୍ୟକ୍ରମ ଆୟୋଜିତ ହେବ । ଉଦ୍ଯାପନୀ ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଯୋଗ ଦେବେ । ଦେଶର ବିକାଶ ଓ ଅଭିବୃଦ୍ଧିରେ ଅବଦାନ ଥିବା ପ୍ରବାସୀ ଭାରତୀୟଙ୍କୁ ପ୍ରବାସୀ ଭାରତୀୟ ସମ୍ମାନ ପୁରସ୍କାର ପ୍ରଦାନ କରାଯିବ ବୋଲି ସୂଚନା ମିଳିଛି ।
କାର୍ଯ୍ୟକ୍ରମ ପାଇଁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ । ଓଡ଼ିଶାର ସମୃଦ୍ଧ ଐତିହ୍ୟକୁ ବିଶ୍ୱସ୍ତରରେ ପ୍ରଚାରପ୍ରସାର କରିବାକୁ ଯୋଜନା ହୋଇଛି । ବିଶେଷ କରି ବିଦେଶରେ ରହୁଥିବା ଯୁବବର୍ଗଙ୍କୁ ଦେଶ ବିକାଶରେ ଯୋଡ଼ିବାକୁ ପ୍ରୟାସ କରାଯିବ ବୋଲି ଶିଳ୍ପ ବିଭାଗର ପ୍ରମୁଖ ସଚିବ ହେମନ୍ତ ଶର୍ମା କହିଛନ୍ତି । ଇଡ୍କୋ ଏମ୍ଡି ଶ୍ରୀ ପୁନିଆ କହିଛନ୍ତି, ପ୍ରବାସୀ ଭାରତୀୟ ଦିବସକୁ ସଫଳ କରିବାକୁ ରାଜ୍ୟ ସରକାର କାମ କରୁଛନ୍ତି । ଏଥିପାଇଁ ସବୁ ବିଭାଗ ନିଜ ଭିତରେ ସମନ୍ୱୟ ରଖି କାମ କରିବେ । ସାରା ବିଶ୍ୱରୁ ଅତିଥିମାନେ ଆସିବେ । ସେମାନେ କିଭଳି ସୁବିଧାରେ ରହିବେ ଓ ସହର ଭିତରେ ଯାତାୟାତ କରିବେ ସେଥିପାଇଁ ବ୍ୟାପକ ବନ୍ଦୋବସ୍ତ କରାଯିବ । ଟ୍ରାଫିକ୍ ପରିଚାଳନାକୁ ଆହୁରି ବ୍ୟବସ୍ଥିତ କରାଯିବ । ଏହାକୁ ସଫଳ କରି ଓଡ଼ିଶାର ସଫଳତା ତାଲିକାରେ ଆଉ ଏକ ମାଇଲଖୁଣ୍ଟ ଯୋଡ଼ିବାକୁ ଲକ୍ଷ୍ୟ ରଖିଛୁ ।
